އެމްއެންޔޫގެ "ރޮބޮޓިކްސް ހެކަތަން 2026" ކާމިޔާބުކަމާއެކު ބާއްވައިފި

ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އިން އިންތިޒާމުކޮށްގެން ކުރިއަށްގެންދިޔަ "ރޮބޮޓިކްސް ހެކަތަން 2026: އޮޓޮނޮމަސް މޭޒް ސޯލްވިންގ ޗެލެންޖް" ކާމިޔާބުކަމާއެކު ނިންމާލައިފިއެވެ.

އެމްއެންޔޫއިން ބުނި ގޮތުގައި، މި މަހުގެ 18 އިން 20 އަށް ކުރިއަށްދިޔަ މި ހެކަތަންއަކީ ދަރިވަރުންގެ މެދުގައި އީޖާދީ ފިކުރާއި، އުފެއްދުންތެރިކަން އަދި ރޮބޮޓިކްސް އާއި އިންޖިނިއަރިންގ ދާއިރާއިން ހުރި ފަންނީ ހުނަރުތައް ދައްކާލުމަށް ހުޅުވާލި ފުރުސަތެކެވެ.

"އިލެކްޓްރޯނިކްސް ފޯ ރޮބޮޓިކްސް" މާއްދާގެ ދަށުން އިންތިޒާމުކުރި މި ތިން ދުވަހުގެ ހަރަކާތުގައި ޖުމްލަ 12 ދަރިވަރުން ބައިވެރިވިއެވެ. މި ހެކަތަންގައި ދަރިވަރުންނަށް ހަވާލުކުރެވުނު މައިގަނޑު މަސައްކަތަކީ، އިންސާނެއްގެ އެހީއާ ނުލައި އަމިއްލައަށް މަގު ހޯދައިގެން ދަތުރުކުރާ (އޮޓޮނޮމަސް) ރޮބޮޓް ފަރުމާކޮށް، ބިނާކޮށް، ޕްރޮގްރާމްކޮށް އަދި އޭގެ މަސައްކަތް ދައްކާލުމެވެ.

މި ހަރަކާތުގެ ސަބަބުން ދަރިވަރުންނަށް ކިޔަވައިދެވޭ ތިއަރީ މައުލޫމާތުތައް އަމަލީ މައިދާނުގައި ބޭނުންކުރުމުގެ ފުރުސަތު ލިބިގެންދިޔަ ކަމަށް އެ ފެކަލްޓީން ފާހަގަކުރެއެވެ. ޚާއްޞަކޮށް ރޮބޮޓިކްސް، އިލެކްޓްރޯނިކްސް، ޕްރޮގްރާމިންގ އަދި އިންޖިނިއަރިންގ ޑިޒައިންގެ ދާއިރާއިން ދަރިވަރުންގެ ޢިލްމު މުއްސަނދިވެގެންދިޔައެވެ.

ހެކަތަން ކުރިއަށްދިޔަ މުއްދަތުގައި ދަރިވަރުން ގުޅިގެން މަސައްކަތްކޮށް، ކުރިމަތިވި ފަންނީ ގޮންޖެހުންތަކަށް އީޖާދީ ހައްލުތައް ހޯދާފައިވެއެވެ. މީގެ އިތުރުން، މި ހަރަކާތުގެ ސަބަބުން ދަރިވަރުންގެ މެދުގައި ޓީމްވޯކާއި، ކަންކަމުގައި ފުންކޮށް ވިސްނުމުގެ ހުނަރު އިތުރުވެގެންދިޔަކަން އެމްއެންޔޫއިން ފާހަގަކުރެއެވެ.

މި މުބާރާތުގައި ބައިވެރިވި ދަރިވަރުން ވަނީ ހާޑްވެއަރ އަދި ސޮފްޓްވެއަރ ނިޒާމުތައް އެކުލަވާލައި، ސެންސަރުތަކާއި ކޮންޓްރޯލް ސިސްޓަމްތައް ބޭނުންކޮށްގެން އަމިއްލައަށް ދަތުރުކުރާ ރޮބޮޓްތައް ތައްޔާރުކޮށްފައެވެ. މި ހަރަކާތް ނިމިގެންދިޔައީ ބައިވެރިން ތައްޔާރުކުރި ރޮބޮޓްތަކުގެ މަސައްކަތް ދައްކާލުމަށް ބޭއްވުނު ޚާއްޞަ މުބާރާތަކުންނެވެ.

ދިވެހިރާއްޖޭގެ ގައުމީ ޔުނިވަރސިޓީން ބުނީ، މިފަދަ ހަރަކާތްތަކުގެ މަގްސަދަކީ ކުރިމަގުގައި އަންނަ ބަދަލުތަކަށް ދަރިވަރުން އަހުލުވެރިކުރުވުމާއި، ސައިންސާއި ޓެކްނޮލޮޖީގެ ދާއިރާއިން ރާއްޖެއަށް އީޖާދީ ކުރިއެރުންތައް ހޯދައިދޭނެ ފަންނުވެރިން ބިނާކުރުން ކަމަށެވެ.