ސިވިލް ސާވިސް އިން ވަކިވެފައި ތިބި ފަރާތްތަކަށް އަލުން ވަޒީފާއާ ގުޅޭނެ މަގުފަހިކޮށްދޭން ނިންމަވައިފި

އެކި ސަބަބުތަކާ ހުރެ ސިވިލް ސާވިސްއިން ވަކިވެފައިވާ މުވައްޒަފުންނަށް އަލުން ވަޒީފާއަށް އައުމަށް މަގުފަހިކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ނިންމަވައިފިއެވެ.

ރައީސް އޮފީހުން ވިދާޅުވިގޮތުގައި، ރައީސް ޑރ. މުޙައްމަދު މުޢިއްޒު މިގޮތަށް ނިންމަވާފައިވަނީ އިއްޔެ ބޭއްވި ކެބިނެޓް ބައްދަލުވުމުގައި ހުށަހެޅި ކަރުދާހަކަށް މަޝްވަރާ ކުރުމަށްފަހު އެވެ.

މި ނިންމެވުމާ ގުޅިގެން، ސިވިލް ސާވިސްގައި މީހުން ލިބުން ދަތި ދާއިރާތަކުގެ މަގާމުތަކާއި، ވަގުތީގޮތުން މީހުން ބޭނުންވާ މަގާމުތަކުގައި، ވަޒީފާއަދާކުރުމަށް ޝައުޤުވެރިކަންހުރި، އެ ދާއިރާތަކުގައި ވަޒީފާއަދާކޮށް ވަޒީފާއިން ވަކިވެފައިވާ މީހުންގެ ދަފުތަރެއް އެކުލަވައިލުމަށް ވަނީ ނިންމަވާފައެވެ.

އަދި އެފަދަ މަޤާމުތަކަށް މީހުން ބޭނުންވެއްޖެ ހިނދެއްގައި އެ ދަފުތަރުގައި ރަޖިސްޓަރީވެފައިވާ މީހުންގެ ތެރެއިން ވޭޖް އެމްޕްލޯއިމަންޓް އުސޫލުން މީހުން ހަމަޖައްސާނެކަމަށްވެސް ރައީސް އޮފީހުން ވަނީ ބުނެފައެވެ.

ރައީސް ޑރ. މުޙައްމަދު މުޢިއްޒު މި ނިންމެވުން ނިންމަވާފައިވަނީ ސިވިލް ސާވިސް އަށް މީހުން ނެގުމުގެ އިޖުރާއަތްތައް ހުރި ގޮތުން މީހުން ލިބުން ދަތި ނޫން މަގާމުތަކަށް ވެސް މީހުން ހަމަޖެއްސުން ލަސްވެ، ބައެއް މުއައްސަސާތަކުގެ ޚިދުމަތް ލަސްވާތީއެވެ.

މި ނިންމުމާއެކު، އެކި ސަބަބުތަކަށްޓަކައި ދިގު މުއްދަތުގެ ޗުއްޓީ ނަގާ މުވައްޒަފުންގެ ބަދަލުގައި ވަގުތީ ގޮތުން މަސައްކަތް ކުރާނެ މީހުން ހަމަޖެއްސުމަށް ހުރި ދަތިކަން ވެސް ހައްލުވެގެންދާނެއެވެ.

ޚިދުމަތުން ދުރުވެފައި ތިބި ސިވިލް ސާވިސް މުވައްޒަފުންނާއި ސިއްހީ ޚިދުމަތްތެރިންނަށް ވެސް އަލުން ވަޒީފާ ލިބޭނެ އިންތިޒާމުތައް ހަމަޖެއްސުމަކީ ރައީސް މުޢިއްޒުގެ ވައުދުފުޅެކެވެ.