އައިއޭސީއިން ޣައްޒާއަށް ދުވާލަކު 12 ހާސް ލީޓަރުގެ ފެން ފޯރުކޮށްދެނީ

އިންޓަނޭޝަނަލް އެއިޑް ކެމްޕެއިން (އައިއޭސީ)އިން ޣައްޒާއަށް ދުވާލަކު 12 ހާސް ލީޓަރުގެ ފެން ފޯރުކޮށްދެމުން އެބަދެއެވެ.

އެ ޖަމްޢިއްޔާއިން މިއަދު ފޭސްބުކުގައި ކުރި ޕޯސްޓެއްގައި ބުނެވަނީ ޣައްޒާގެ އަވަށެއް ކަމަށްވާ ދައިރް-އަލް-ބަލަޙްގައި، މިދިޔަ މޭ މަހުގެ 30 ވަނަ ދުވަހުން ފެށިގެން ކޮންމެ ދުވަހަކުވެސް، ދުވާލަކު 12 ހާސް ލީޓަރުގެ ފެން ފޯރުކޮށްދެވެމުން ދާކަމަށެވެ.

އައިއޭސީއިން އިތުރަށް ހާމަ ކުރެއްވި ގޮތުގައި ގެދޮރު ގެއްލުމުގެ ސަބަބުން، ޣައްޒާގެ އެކި ސަރަހައްދުތަކުން ހިޖުރަކޮށްފައިވާ އެތަށް ބަޔަކު ދައިރް އަލް ބަލަޙް ގައި ދިރިއުޅެއެވެ. އޭގެ ތެރެއިން ބައެއް މީހުންނަކީ އެކި ތަންތަނުން 9 ފަހަރަށްވުރެ ގިނަ ފަހަރު ހިޖުރަކޮށްފަ ތިބި މީހުންނެވެ. ގިނަ ބަޔަކު އެ އަވަށަށް ހިޖުރަކުރުމުގެ ސަބަބުން މުޅި އަވަށް ތޮއް ޖެހިފައިވާއިރު، އެ އަވަށަކީ ފެނުގެ ދަތިކަން ވަރަށް ބޮޑަށް ތަޙައްމަލު ކުރަމުންދާ ހިސާބެއްކަން އައިއޭސީއިން ފާހަގަކޮށްފައިވެއެވެ.

ޣައްޒާގެ ރައްޔިތުން އެކުރަމުންދާ ހިތްވަރު އެ ޖަމްޢިއްޔާއިންވެސް ކުރާނެކަން ފާަހަގަކޮށް އައިއޭސީއިން ވަނީ، ޣައްޒާގައި ޙާލުގައި ޖެހިފައިވާ ފަރާތްތަކަށް އެހީ ފޯރުކޮށްދެއްވަމުން ގެންދިޔުމަށް އިލްތިމާސް ކުރައްވާފައެވެ.

ނިރުބަވެރި އިސްރާއީލުން މެދުކެނޑުމެއްނެތި ފަލަސްތީނަށް ދެމުންގެންދާ ވަރުގަދަ ހަމަލާތަކުގެ ސަބަބުން އެތައް ބަޔަކު ދަނީ ގެދޮރު ނެތިވެ، ހައިހޫނުކަންމަތީގައި ޝަހީދުވަމުންނެވެ. ކާނެ އެއްޗެއް ނުލިބި މިދިޔަ ރަމަޟާން މަހުވެސް ފަލަސްޠީނުގެ އެތައް ރައްޔިތުންނެއް ވަނީ ދުނިޔެ ދޫކޮށްފައެވެ.