ޓޮޓެންހަމް ބަލިކޮށް ޔުނައިޓެޑް ގަދަ ހަތަރަކަށްކުރާ އުންމީދު އާކޮށްފި

ޓޮޓެންހަމް ބަލިކޮށް ޔުނައިޓެޑް ގަދަ ހަތަރަކަށްކުރާ އުންމީދު އާކޮށްފިއެވެ.

މެންޗެސްޓާ ޔުނައިޓެޑުގެ ގޯލް ކީޕަރު ޑޭވިޑް ޑިގެއާގެ ފަރާތުން އާދަޔާހިލާފު މޮޅު ކުޅުމެއް ފެނިގެންދިޔަ މި މެޗު އެޓީމް ކާމިޔާބުކުރީ 1-0 ކުންނެވެ. މިއާއެކު ޔުނައިޓެޑުގެ ކެއާ ޓޭކާ މެނޭޖަރ ޝޯލްޝާ މިހާތަނަށް އެޓީމަށް އިރުޝާދު ދިން ހަ މެޗުންވެސް މޮޅުވީކަން ފާހަގަކޮށްލަންޖެހެއެވެ.

މެޗުގައި ފެނުނު ހަމައެކަނި ލަނޑު ކާމިޔާބުކޮށް ޔުނައިޓެޑް މެޗުން މޮޅުކޮށްދިނީ މާކަސް ރަޝްފޯޑްއެވެ. ރަޝްފޯޑް މި ލަނޑު ކާމިޔާބުކުރީ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައިވަނިކޮށް ޕޯލް ޕޮގްބާ ދިން ރީތި ދިގު ޕާހަކުންނެވެ.

މި މެޗުން ޔުނައިޓެޑް ތިން ޕޮއިންޓް ކަށަވަރު ކުރިނަމަވެސް ދެވަނަ ހާފް އެއްކޮށް ޑޮމިނޭޓްކޮށްފައިވަނީ ޓޮޓެންހަމްއެވެ. ޓޮޓެންހަމްވަނީ ދެވަނަ ހާފުގައި ގިނަ ވަގުތު ބޯޅަ ގެންގުޅެ ނުރައްކާތެރި އެތައް ހަމަލާތަކެއް ޔުނައިޓެޑުގެ ގޯލަށް އަމާޒުކޮށް ފޮނުވާލާފައެވެ. އެގޮތުން ޓޮޓެންހަމް މި މެޗުގައި ފޮނުވާލި 21 ހަމަލާގެ ތެރެއިން 11 ހަމަލާވަނީ ޓާގެޓަށް ފޮނުވާލާފައެވެ.

ހުށިޔާރު ފޯވަޑް ހެރީ ކޭން ގޯލައި އަމާޒުކުރި ހުރިހާ ހަމަލާތަކެއް ޑިގެއާ މަތަކުރިއިރު ޑެލެ އަލީ، އަދި ޓޯބީ އަލްޑެވިއެރެލްޑް ފޮނުވާލި ނުރައްކާތެރި ބޯޅަތަކުގެ ހުރަހަކަށްވީވެސް މެޗުގެ މޮޅު ކުޅުންތެރިޔާކަން ހޯދި ޔުނައިޓެޑުގެ ކީޕަރު ޑިގެއާއެވެ.

މެޗައި ބެހޭ ގޮތުން ވާހަކަ ދައްކަމުން ޝޯލްޝާ ބުނީ ޔުނައިޓެޑުގެ ފަރާތުން ފުރަތަމަ ހާފުގައި ފެނުނު ކުޅުމައި ދޭތެރޭ ހިތްހަމަޖެހޭ ކަމަށައި ނަމަވެސް ދެވަނަ ހާފުގަ އިދިކޮޅު ޓީމުން އޭނާގެ ޓީމް ޕްރެޝަރަށް ވައްޓާލިކަމަށެވެ. ޔުނައިޓެޑުގެ ޑިފެންސް މި މެޗުގައި ރަނގަޅު ކުޅުމެއް ދެއްކިކަމަށައި ކީޕަރު ޑިގެއާގެ ފަރާތުން ފެނުނު މޮޅު ކުޅުންވެސް އޭނާގެ ވާހަކައިގަ ފާހަގަކޮށްފައިވެއެވެ.

ޔުނައިޓެޑް މި މެޗުން ހޯދި ކާމިޔާބީއާއެކު ކެއާ ޓޭކާ މެނޭޖަރ ޝޯލްޝާވަނީ ސަރ މެޓް ބުސްބީގެ ރެކޯޑާއި އަރާ ހަމަކޮށްފައެވެ. އެއީ ލީގުގައި ޔުނައިޓެޑަށް އިރުޝާދު ދީގެން ކުޅުނު ފުރަތަމަ ފަސް މެޗް ކާމިޔާބުކޮށްގެންނެވެ.

ޓޮޓެންހަމްގެ ކޯޗް ޕޮޗެޓީނޯ ބުނީ މެޗުގެ ދެވަނަ ހާފުގަ ޓޮޓެންހަމްގެ ފަރާތުން ފެނުނު ކުޅުމަކީ އޭނާ އެ ކްލަބުގައި ހޭދަކުރި ހަތަރު އަހަރައި ބައިގެ ތެރޭގައި ފެނުނު އެންމެ މޮޅު ކުޅުން ކަމަށެވެ. ފުޓްބޯޅައިގަ އަންނާނީ މޮޅުވާ ފަހަރުތަކައި ބަލިވާ ފަހަރުތައް ކަމުގައިވެސް ޕޮޗެޓީނޯ ބުންޏެވެ.

އަމިއްލަ ދަނޑުގައި ކުޅުނު ހަތަރު މެޗުން މި ސީޒަނުގަ ޓޮޓެންހަމް ބަލިވެފައިވާއިރު މިއީ 2015 ވަނަ އަހަރުގެ މޭ މަހުގެ ފަހުން އެޓީމް ލީގުގައި ޖެހިޖެހިގެން ދެ މެޗުން ބަލިވި ފުރަތަމަ ފަހަރުވެސްމެއެވެ.

ލީގުގެ ކުރިއަށް އޮތް މެޗުގައި ޔުނައިޓެޑް ބްރައިޓަންއައި ދެކޮޅަށް ނުކުންނައިރު ޓޮޓެންހަމް ކުޅުމަށް ހަމަޖެހިފައިވަނީ ރެލިގޭޝަން ޒޯނުގައި އޮތް ފުލަމްއާއެވެ.