އުއްމީދަކީ ނަޝީދުގެ ވެރިކަމުގައި މަސައްކަތް ކުރެއްވެވި ގޮތަށް މިހާރުވެސް މަސައްކަތް ކުރައްވާނެކަމަށް: ސަފީރު
އުއްމީދަކީ ރައީސް ނަޝީދުގެ ވެރިކަމުގައި ދެ ޤައުމުގެ ގުޅުން ވަރުގަދަ ކުރުމަށް ކުރެއްވި މަސައްކަތް މިހާރުވެސް އަދާކުރެއްވުން ކަމަށް ޗައިނާއިން ރާއްޖެއަށް ކަނޑައަޅާފައިވާ ސަފީރު ޖަންގް ލީ ޖޮންގް ވިދާޅުވެއްޖެއެވެ.
އަވަސް އޮންލައިންއަށް ދެއްވި ބަސްދީގަތުމެއްގައި ޗައިނާ ސަފީރުވަނީ ނަޝީދުގެ ވެރިކަމުގައި ދެ ޤައުމުގެ ގުޅުން ބަދަހިކުރައްވަން ކުރެއްވި މަސައްކަތް މިހާރުވެސް ކުރައްވާނެކަމަށް އުންމީދުކުރައްވާކަމަށެވެ.
ޗައިނާ ސަފީރު ވިދާޅުވީ ނަޝީދާދެމެދު އުފެދިފައިވާ ނުތަނަވަސްކަމާ ގުޅޭގޮތުން އެމަނިކުފާނާ ދެފަހަރެއްގެ މަތީން ބައްދަލުކުރައްވައި ރާއްޖެ-ޗައިނާ ގުޅުމާބެހޭ ގޮތުން ވަރަށް ފުޅާކޮށް މަޝްވަރާކުރެވުނު ކަމަށެވެ.
މަޖިލިސް ރައީސް ނަޝީދު ވަނީ ޓޫރިޒަމާއި، އިންވެސްޓް އަދި ތިމާވެށި ހިމާޔަތްކުރުމަށް ދެ ގައުމު ގުޅިގެން ކުރާ މަސައްކަތްތަކަށް ވަރަށް ތައުރީފު ކުރެއްވިކަންވެސް ސަފީރު ހާމަކުރެއްވި އެވެ.
"އެހެންވީމާ، ނަޝީދުގެ ވާހަކަފުޅުން އަޅުގަނޑަށް ދޭހަވީ، ދެގައުމުގެ ގުޅުމަށް އެމަނިކުފާނު ވަރަށް ސަޕޯޓުކުރައްވާކަން،" ޗައިނާ ސަފީރު ވިދާޅުވި އެވެ.
ރައީސް ނަޝީދު ޗައިނާއިން ރާއްޖެ ދަރަނިވެރި ކުރުވަފިކަމަށާއި، ރާއްޖޭގެ ބިން ޗައިނާއިން ފޭރިގަނެފައިވާކަމަށް ތަކުރާރުކޮށް އަންނަނީ ވިދާޅުވަމުންނެވެ. އަދި މި މައްސަލާގައި ދެފަހަރެއްގެ މަތިން ސަފީރު ބައްދަލުކުރެއްވުމުންވެސް ނަޝީދު ވަނީ ޗައިނާއިން ރާއްޖޭގައި ހިންގަމުން ގެންދާ މަޝްޢޫތަކަށް ތައުރީފުކޮށް ވާހަކަފުޅު ދައްކަވާފައެވެ.
ޗައިނާ ސަފީރު ރައީސް ނަޝީދުގެ ވެރިކަމުގައި ދެ ޤައުމުގެ ގުޅުމާ ބެހޭގޮތުން ވާހަކަދައްކަވާފައިވާއިރު، ޗައިނާ- ރާއްޖޭގެ ގާތް ގުޅުން ފެށިފައިވަނީ ރައީސް ނަޝީދުގެ ވެރިކަމުގައި ކަން ފާހަގަކުރެވެއެވެ.
އެގޮތުން ފުރަތަމަ ފަހަރަށް ރާއްޖޭގައި ޗައިނާ އެންބަސީއެއް ހުޅުވުމާއި، ޗައިނާއިން ރާއްޖޭގައި ބޮޑެތި އިންވެސްޓްމަންޓް ކުރުމުގެ ފުރުސަތުތައް ފަހިކޮށްދީފައިވާ ދިނުން ފާހަގަކޮށްލެވެއެވެ. ހުޅުމާލެ ޗައިނާ ޓައުން ނަމުން މަޝްހޫރުވެފައިވާ ސޯސަލް ހައުސިންއަކީ ނަޝީދުވެރިކަމުގައި ޗައިނާއިން އަޅާފައިވާ ފްލެޓްތަކެކެވެ.
ސަފީރު ވަނީ ނަޝީދުގެ ވެރިކަމުގައި ވެސް އެކި ދާއިރާތަކުން ޗައިނާ އިން ރާއްޖެއަށް ގިނަ އެހީތަކެއް ފޯރުކޮށްދީފައިވާ ކަން މި ބަސްދީގަތުމުގައި ފާހަގަކުރައްވާފައެވެ. އެހެންކަމުން ނަޝީދުގެ ވިސްނުންފުޅު ދެ ޤައުމުގެ ގުޅުމާ މެދު ހުރިގޮތް ރައްޔިތުންނަށް ސާފުކޮށްދިނުމަށްވެސް ސަފީރު ވަނީ ގޮވާލައްވާފައެވެ.
"ދެ ގައުމުގެ ގުޅުން ވަރުގަދަ ކުރުމަށް ނަޝީދުވެސް ވަނީ އެމަނިކުފާނުގެ ދައުރު ރަނގަޅަށް އަދާކުރައްވާފައި. އަޅުގަނޑުގެ އުއްމީދަކީ އެ މަސައްކަތް މުސްތަގުބަލުގައިވެސް ނަޝީދު ކުރައްވާނެކަމަށް. އެހެންވީމާ، ދެގައުމުގެ ގުޅުމާމެދު ނަޝީދުގެ ވިސްނުންފުޅު ހުރި ގޮތެއް ސީދާ ދިވެހި ރައްޔިތުންނަށް އެބަ ސާފުކޮށްދެއްވަންޖެހޭ،" ސަފީރު ވިދާޅުވި އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
