އެމްއެންޔޫގެ މަލްޓި ޕާޕަސް ބިލްޑިންގގެ ބިންގާ އަޅައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ މަލްޓި ޕާޕަސް ބިލްޑިންގ މަޝްރޫޢުގެ ބިންގާ އެޅުމުގެ ރަސްމިއްޔާތު މިއަދު ބާއްވައިފިއެވެ.

މި ރަސްމިއްޔާތުގައި ބިންގާ ރަސްމީކޮށް އިފްތިތާހުކޮށްދެއްވީ އެ ޔުނިވަރސިޓީގެ ޗާންސެލަރ ޑރ. މަޙްމޫދު ޝައުގީ އާއި ވައިސް ޗާންސެލަރ ޑރ. އާއިޝަތު ޝެހެނާޒް އާދަމެވެ. މި ރަސްމިއްޔާތު ބޭއްވީ ޔުނިވަރސިޓީ ކައުންސިލްގެ 400 ވަނަ ބައްދަލުވުމާއި ޔުނިވަރސިޓީގެ ތާރީޚު ތަދުވީނުކުރުމަށް ކައުންސިލުން ނިންމެވި ނިންމެވުމާ ގުޅުވައިގެންނެވެ.

ވައިސް ޗާންސެލަރ ޑރ. ޝެހެނާޒް ފާހަގަކުރެއްވި ގޮތުގައި މި ތިން ހަރަކާތަކީ ވެސް އެއް ކަމެއް އަނެއް ކަމާ ގުޅިލާމެހިފައިވާ ޔުނިވަރސިޓީގެ ތަރައްޤީއާއި ތާރީޚުގައި ފާހަގަކޮށްލެވޭނެ މުހިންމު ލަނޑުދަނޑިތަކެކެވެ.

އެމްއެންޔޫއިން ބުނި ގޮތުގައި މި ޢިމާރާތް ފަރުމާކޮށްފައި ވަނީ ދަރިވަރުންނާއި މުވައްޒަފުންނަށް ބޭނުންވާ ޒަމާނީ ވަސީލަތްތައް ފުރިހަމައަށް ލިބޭ ގޮތަށެވެ. އެގޮތުން ކެންޓީނާއި ރެސްޓޯރެންޓާއި ދަރިވަރުންގެ އިޖުތިމާޢީ ހަރަކާތްތަކަށް ޚާއްޞަ ޖާގަތަކާއި މަލްޓިޕާޕަސް ހޯލާއި ކްލާސްރޫމްތަކާއި ސެމިނާ ރޫމްތަކާއި ޢަމަލީ ތަމްރީނުތަކަށް ބޭނުންވާ މަރުކަޒުތައް ހިމެނެއެވެ. މީގެ އިތުރުން ސެންޓަރ ފޯ ސެކިއުރިޓީ އެންޑް ސްޓްރެޓީޖިކް ސްޓަޑީޒްއަށް ބޭނުންވާ ޚާއްޞަ ޖާގައާއި ޒަމާނީ ލެބޯޓްރީތަކާއި އޮފީސްތަކާއި ޕާކިންގގެ ޚިދުމަތް ވެސް މި ބިނާގައި ހިމެނެއެވެ.

އެ ޔުނިވަރސިޓީން ބުނީ ހުޅުމާލޭގައި ޤާއިމުކުރާ މެޑިކަލް ސްކޫލާއި ޓީޗިންގ ހޮސްޕިޓަލްގެ މަސައްކަތް ނިމެންދެން ސްކޫލް އޮފް މެޑިސިންގެ ކިޔެވުން މެދުކެނޑުމެއް ނެތި ކުރިއަށް ގެންދިއުމަށް މި އިމާރާތުގެ ސަބަބުން ބޮޑު ފަސޭހައެއް ލިބިގެންދާނެ ކަމަށެވެ. މިއީ ނިސްބަތުން ބޮޑު މަޝްރޫޢަކަށް ވާތީ މަސައްކަތް ރޭވިފައި ވަނީ އެކި މަރުޙަލާތަކަކަށް ބަހާލައިގެން ކުރިއަށް ގެންދާ ގޮތަށް ކަމަށް ވެސް އެ ޔުނިވަރސިޓީން ބުންޏެވެ.