ތާލިބާނުން އިންޑިއާ، އާއެކު ސިޔާސީގުޅުން ބަދަހިކުރަނީ

ތާލިބާނުންގެ ހާރިޖީ ވަޒީރު އާމިރުހާން، އިންޑިއާގެ ހާރިޖިއްޔާގެ އޮފިޝަލެއް ކަމަށްވާ ޖޭޕީ ސިންގާ ބައްދަލުކުރައްވައިފިއެވެ.

ޖޭޕީ ސިންގަކީ އިންޑިއާއިން އަފްގާނިސްތާނުގެ ކަންކަމަށް ކަނޑައަޅުއްވާފައި ހުންނަވާ އޮފިޝަލެވެ. މި ބައްދަލުވުމަކީ އިންޑިއާ އާއި އަފްގާނިސްތާނާ ދެމެދު އިސް އޮފިޝަލުން ހިމެނޭގޮތަށް ކުރިއަށްގެންދެވުނު މިފަދަ ފުރަތަމަ ބައްދަލުވުމެވެ.

މި ބައްދަލުވުމާ ބެހޭގޮތުން ވާހަކަދައްކަވަމުން ތަލިބާނުންގެ ހާރިޖިއްޔާގެ ތަރުޖަމާނު ޒިއާ އަހުމަދު ވިދާޅުވެފައިވަނީ އިންޑިއާގެ ހާރިޖިއްޔާގެ އޮފިޝަލާއެކު ބޭއްވ ބައްދަލުވުމުގައި އަފްގާންގެ ހާލަތު ރަނގަޅުކުރުމާ ގުޅޭގޮތުން މަޝްވަރާކުރެވިފައިވާކަމަށެވެ. ދެގައުމުގެ ދެމެދު ގުޅުން ބަދަހިކުރުމާއި ގުޅޭގޮތުން ވާހަކަ ދެކެވުނުއިރު، އިގްތިސާދީ، އަދި ސިޔާސީ ދާއިރާއިން ގުޅުން ބަދަހިކުރުމާ ގުޅޭގޮތުން ވާހަކަދެކެވުނުކަމަށް އެކްސްގައި ކުރި ޕޯސްޓެއްގައި ޒިޔާ ވަނީ ވިދާޅުވެފައެވެ.

ޒިޔާ ވަނީ، އިންޑިއާގެ ޑިޕްލޮމެޓުންނާއެކު ތަލިބާނުންގެ ޑިފެންސް މިނިސްޓަރު ޔައުގޫބް މުޖާހިދާވެސް ވާހަކަތައް ކުރިއަށްގެންގޮސްފައިވާކަމަށް ވިދާޅުވެފައެވެ. ޔައުގޫބަކީ ތަލިބާނުންގެ ކުރީގެ ލީޑަރު، މުއްލާ އުމަރުގެ ދަރިފުޅެވެ.

ތަލިބާނުން އިންޑިއާގެ ޑިޕްލޮމެޓުންނާއެކު ބައްދަލުވުންތައް ބޭއްވިނަމަވެސް، މިކަން އަދި އިންޑިއާއިން ރަސްމީކޮށް ހާމަކޮށްފައެއް ނުވެއެވެ.

ތާލިބާނުން ދަނީ އެ ޖަމާއަތުން މީގެ ކުރިން ގެންގުޅުނު ހަރުކަށި ސިޔާސަތުތައް ދޫކޮށް ޤައުމުތަކާއެކު ގުޅުން ބަދަހިކުރުމަށް މަސައްކަތްކުރަމުންނެވެ. ބައެއް ކަންކަމުގައި ތަލިބާނުންގެ ސިޔާސަތުތައް ދޫކުރަމުން އައިނަމަވެސް، އަންހެނުންގެ ކަންކަމުގައި އަދިވެސް ކުރިން ގެންގުޅެމުން އަންނަ އުސޫލްތައް ކުރިއެކޭ އެއްގޮތަށް ދަމަހައްޓަމުން އަންނަކަން ފާހަގަކޮށްލެވެއެވެ.

އަފްގާނިސްތާނަށް މިހާރު ހުޅަނގުގެ ގައުމުތަކުގެ ފަތުރުވެރިންނަށްވެސް ކަނޑައެޅޭ ހާއްސަ އުސޫލްތަކަކާއެކު ޒިޔާރަތްކުރުމުގެ ފުރުސަތު ދެއެވެ. މިގޮތުން މިދިޔަ އަހަރު އަފްގާނިސްތާނަށް ވަނީ ރެކޯޑް އަދަދަކަށް ފަތުރުވެރިން ޒިޔާރަތްކޮށްފައެވެ.

އަފްގާނިސްތާނަށް މިދިޔަ އަހަރު 7،000 ފަތުރުވެރިން ޒިޔާރަތްކުރިއިރު، 2021 ވަނައަހަރު މިއަދަދު ހުރީ 691 ގައެވެ. އޭޕީ ރިޕޯޓްކުރާގޮތުގައި ތަލިބާނުންގެ އުސޫލްތަކާއެކު އަފްގާނިސްތާނަށް ފަތުރުވެރިން ޒިޔާރަތްކުރަން އެއްވެސް ހުރަހެއް ނެތެވެ.

އަފްގާނިސްތާނުގައި ވެރިކަންކުރަމުން އައި ތާލިބާނުންގެ ވެރިކަން އެމެރިކާއިން ވައްޓާލީ 2001 ވަނަ އަހަރުއެވެ. ނަމަވެސް އޭގެ 20 އަހަރުފަހުން ތާލިބާނުން ވަނީ އަނެއްކާވެސް އަފްގާނިސްތާނުގެ ވެރިކަމާ ހަވާލުވެފައެވެ.