ރަހީނުކުރިކަމުގެ ތުހުމަތުގައި ބިދޭސީއަކު ހައްޔަރުކޮށްފި

މާލޭގައި ހުއްދަނޫން ގޮތެއްގައި މީހަކު ހިފަހައްޓައި ބަންދުކޮށްގެން އުޅުނު މައްސަލައެއްގައި ބިދޭސީއަކު ފުލުހުން ހައްޔަރުކޮށްފިއެވެ.

ފުލުހުން ހާމަކޮށްފައިވާ ގޮތުގައި، މީހަކު ހުއްދަނޫން ގޮތުގައި ހިފަހައްޓާފައިވާ ކަމުގެ ރިޕޯޓު ފުލުހުންނަށް ލިބިފައިވަނީ 2026 ފެބްރުއަރީ 19 ވީ ބުރާސްފަތި ދުވަހުގެ ރޭ ދަންވަރު 01:22 އެހާކަންހާއިރުއެވެ. މި ރިޕޯޓާ ގުޅިގެން ފުލުހުން ކުރި ތަހުގީގީ މަސައްކަތުން، އެ މީހާ މާލޭގައި ބަންދުކޮށްފައި ހުރި ތަން ވަނީ ދެނެގަނެފައެވެ.

އެ މީހާ ސަލާމަތްކުރުމަށްޓަކައި ފުލުހުން ވަނީ ބާރުގެ ބޭނުންކޮށްގެން އެ ތަނަށް ވަދެފައެވެ. އަދި އެރޭ ދަންވަރު 02:29 އެހާކަންހާއިރު، ހިފަހައްޓާފައި ހުރި މީހާ ވަނީ ސަލާމަތްކޮށްފައެވެ. ފުލުހުން ބުނި ގޮތުގައި، ސަލާމަތްކުރި މީހާގެ ބޭރުފުށުން އެއްވެސް އަނިޔާއެއް ފެންނާކަށް ނެތް ކަމަށް ފުލުހުން ބުނެއެވެ.

މި މައްސަލައިގެ ތުހުމަތުގައި ފުލުހުން ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ އުމުރުން 35 އަހަރުގެ އިޤްބާލް މިއާއެވެ. ފުލުހުން މައުލޫމާތު ދިން ގޮތުގައި އިޤްބާލް މިއާއަކީ ރާއްޖޭގައި ގަވާއިދާ ހިލާފަށް އުޅެމުންދާ މީހެކެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާ 30 ދުވަހުގެ މުއްދަތަށް ބަންދުގައި ބެހެއްޓުމަށް އަމުރުކޮށްފައެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.