އެސްޓީއޯގެ ދަށަށް ފެނަކަ ގެނައުމުގެ މަސައްކަތް ހުއްޓާލައިފި

އެސްޓީއޯގެ ދަށަށް ފެނަކަ ގެނައުމަށް ކުރަމުންގެންދިޔަ މަސައްކަތް ހުއްޓާލާފައިވާކަމަށް އެސްޓީއޯއިން ބުނެފިއެވެ.

ފެނަކަ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުމަށް ކުރަމުންގެންދިޔަ މަސައްކަތް ހުއްޓާލިކަން ހާމަކޮށް އެސްޓީއޯއިން ބުނީ، އެކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސުމަށް ކުރަމުންގެންދިޔަ މަސައްކަތް ހުއްޓާލުމަށް މިހިނގާ ނޮވެމްބަރުމަހުގެ 24 ވަނަ ދުވަހު ފިނޭންސް މިނިސްޓްރީން އަންގާފައިވާކަމަށެވެ.

ފިނޭންސްގެ އެ އެންގުމާއެކު އެސްޓީއޯއިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށްގޮސްފައިވާ މިންވަރަށް ބަލައި، އެސްޓީއޯއިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ކުންފުނީގެ ޑިރެކްޓަރުންގެ ބޯޑުން މިއަދު ނިންމާފައިވާކަމަށް އެސްޓީއޯއިން ބުންޏެވެ.

އެސްޓީއޯގެ ދަށަށް ފެނަކަ ބަދަލުކުރަން ނިންމިކަން އެސްޓީއޯއިން ބުނެފައިވަނީ މިއަހަރުގެ އޮގަސްޓްމަހުގެ ތެރޭގައެވެ. މިކަމާ ގުޅިގެން އޭރު އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވެފައިވަނީ އެސްޓީއޯދަށަށް ފެނަކަ ގެނައިނަމަވެސް ގެއްލުމެއ ްނުވާނެ ކަމަށެވެ.

ފެނަކައަކީ ސަރުކާރު ކުންފުނިތަކުގެ ތެރެއިން އެންމެ ދަރަނިބޮޑު ކުންފުންޏެވެ. އެސްޓީއޯގެ މިދިޔަ އަހަރުގެ މާލީ ހިސާބުތަކަށް ބަލާއިރު، އެކުންފުންޏަށް އެންމެބޮޑަށް ދަރާއޮތީ، ފެނަކަ އެވެ. މިދިޔަ އަހަރު ނިމުނުއިރު، އެސްޓީއޯގައިވާ ފެނަކައިގެ ދަރަނި އުޅެނީ 1.9 ބިލިއަން ރުފިޔާގައެވެ.