މިއަހަރުގެ މިހާތަނަށް 206 ފަރާތަކަށް ޗިކުންގުންޔާ ޖެހިފައިވޭ: އެޗްޕީއޭ

މި އަހަރުގެ މިހާތަނަށް މާލެ ސަރަހައްދުން އެކަނިވެސް ޗިކުންގުންޔާ ޖެހިގެން 206 ކޭސް ރިޕޯޓުކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ނެރުނު ރިޕޯޓެއްގައި ބުނެފައިވަނީ ފެބްރުއަރީ މަހުގެ ދެވަނަ ހަފްތާގައި 75 މީހުން ޗިކުންގުންޔާ ޖެހިގެން ރިޕޯޓުކޮށްފައިވާއިރު، ފެބްރުއަރީ މަހުގެ ފަހު ހަފްތާގައި 32 މީހުން ޗިކުންގުންޔާ ޖެހިގެން ރިޕޯޓު ކޮށްފައިވާކަމަށެވެ.

މީގެ އިތުރުން ވޭތުވެ ދިޔަ އަހަރުތަކަށް ވުރެ މިއަހަރުގެ ޖެނުއަރީ އަދި ފެބްރުއަރީ މަހު ޑެންގީ ޖެހިގެން ރިޕޯޓުކޮށްފައިވާ މީހުން އިތުރުކަމަށް އެޗްޕީއޭއިން ބުނެ އެވެ. އެގޮތުން ޖުމްލަކޮށް ޖެނުއަރީގައި ޑެންގީގެ 518 ކޭސް ރިޕޯޓުކޮށްފައިވާއިރު، އެ މަހުގެ ފަހު ހަފްތާގައި 98 މީހަކު ޑެންގީ ޖެހިގެން ވަނީ ރިޕޯޓުކޮށްފައެވެ. ނަމަވެސް މިއަދަދު ފެބްރުއަރީ މަހު ވަނީ ދަށަށް ގޮސްފައެވެ.

ހަމަ އެހެންމެ ފެބްރުއަރީ މަހުގެ ފަހު ހަފްތާގައި 51 މީހަކަށް ޑެންގީ ޖެހިގެން ރިޕޯޓުކޮށްފައިވާއިރު، ޖުމްލަގޮތެއްގައި އެ މަހު 368 މީހުން ވަނީ ޑެންގީ ޖެހިގެން ރިޕޯޓުކޮށްފައެވެ. މިކަމާ ގުޅިގެން އެޗްޕީއޭއިން ވަނީ ޑެންގީން ރައްކާތެރިވުމަށް ފިޔަވަޅުތައް އެޅުމަށް ހާއްސަ ސަމާލުކަމެއް ދިނުމަށް އެދިފައެވެ.

މީގެ އިތުރުން ބޭރަށް ހިންގުން ޖެހިގެން ރިޕޯޓުކޮށްފައިވާ މީހުން ގިނަ ނަމަވެސް ފާއިތުވި އަހަރާ އަޅައި ބަލާއިރު އެ އަދަދު މަދުކަމަށް އެޗްޕީއޭއިން ފާހަގަ ކުރެއެވެ.