މިނިވަން 60 ގެ ތައްޔާރީތައްވުމަށް ޖުމްހޫރީ މައިދާން ބަންދުކޮށްފި
މިނިވަން 60 ގެ ހަރަކާތްތަކަށް ތައްޔާރުވުމުގެ ގޮތުން މަރާމާތުގެ ބައެއް މަސައްކަތްތައް ކުރުމަށް ޖުމްހޫރީ މައިދާން ބަންދުކޮށްފިއެވެ.
އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފައިވަނީ، މިނިވަން 60 ގެ ހަރަކާތްތަކަށް ތައްޔާރުވުމަށް، ޖުމްހޫރީ މައިދާން މަރާމާތުކޮށް ޒީނަތްތެރިކުރުމުގެ ގޮތުން މި މަހުގެ 25 ވަނަ ދުވަހާއި ހަމައަށް އެ ސަރަހައްދު އާންމުންނަށް ބަންދުކޮށްފައިވާ ކަމަށެވެ. ޖުމްހޫރީ މައިދާނަކީ ކުޑަކުދިންނާއި ބިދޭސީންގެ މެދުގައި ވަރަށް މަޤްބޫލު ސަރަހައްދެކެވެ.
ދިވެހިންގެ މިނިވަންކަމަށް 60 އަހަރުފުރުން ފާހަގަކުރުމުގެ މުނާސަބަތުގައި ބައެއް ހަރަކާތްތައް ޖުމްހޫރީ މައިދާނުގައި ބޭއްވުމަށް ވަނީ ނިންމާފައެވެ. މިނިވަން ދުވަސް ފެށިގެންދާނީ މީހުން ދިރިއުޅޭ ހުރިހާ ރަށެއްގައި ބާއްވާ ދިދަ ނެގުމުގެ ރަސްމިއްޔާތަކުންނެވެ.
ރާއްޖޭގެ މިނިވަންދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޖުލައިމަހުގެ 26 ވަނަ ދުވަހެވެ. ކޮންމެ އަހަރެއްގެވެސް މިނިވަންދުވަސް ރާއްޖޭގެ ހުރިހާ ހިސާބެއްގައި ރަށު ފެންވަރުގައި އަދި ޤައުމީ ފެންވަރުގައި ފާހަގަކުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
