ގައުމީ ހިދުމަތުގެ ޕްރޮގްރާމަށް ނެގި ފުރަތަމަ ބެޗް، ތަމްރީނުތަކަށް ފުރައިފި

ދިވެހިރާއްޖޭގެ ގައުމީ ހިދުމަތުގެ ޕްރޮގްރާމު (މޯލްޑިވްސް ނޭޝަނަލް ސާވިސް)ގެ ފުރަތަމަ ބެޗްގެ ދަރިވަރުން ތަމްރީނުތައް ހެދުމަށް މިއަދު ފުރައިފިއެވެ.

މިނިސްޓްރީ އޮފް ޑިފެންސުން ބުނެފައިވަނީ، މޯލްޑިވްސް ނޭޝަނަލް ސާވިސް ޕްރޮގްރާމުގެ ފުރަތަމަ ބުރުގެ ތަމްރީނުތަކަށް 340 ކުދިން ހޮވިފައިވާކަމަށެވެ. މި ހުރިހާ ބައިވެރިން ޅ. މާފިލާފުށީގައި ތިން މަސްދުވަހުގެ ތަމްރީނުތައް ފުރިހަމަ ކުރުމަށް ނިންމާފައިވާކަމަށް ޑިފެންސް މިނިސްޓްރީން ބުނެއެވެ.

ދިވެހިރާއްޖޭގެ ޤައުމީ ހިދުމަތުގެ ޕްރޮގްރާމަކީ، ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ހާއްސަ އިސްނެންގުމުގެ މަތިން ފެށި ޕްރޮގްރާމެކެވެ. މައިގަނޑު މަޤްސަދަކީ ދިވެހި ޤައުމިއްޔަތަށް ލޯބި ކުރާ، ޒިންމާދާރު، ޖިސްމާނީ، ރޫހާނީ އަދި ނަފްސާނީ ގޮތުން ދުޅަހެޔޮ, ދިވެހި ރައްޔިތެއް ބިނާކޮށް މަސައްކަތަށް އަހުލުވެރި އަޚްލާޤް ރަނގަޅު ހަރުދަނާ ޒުވާން ޖީލެއް ބިނާކުރުމެވެ.

އަދި ދިވެހިރާއްޖޭގެ ސަލާމަތީ ހިދުމަތްތަކަށް ބޭނުންވާ ޒުވާނުން ތައްޔާރުކުރުމާއި އަދި ނޭޝަނަލް ސަރވިސްގެ ތެރެއިން ސަލާމަތީ ހިދުމަތްތަކަށް މީހުން ރެކްރޫޓްކުރެވޭނެ މަގުފަހިކޮށްދީ، ދިވެހި ޒުވާނުންނަކީ އެއްބައެއްވަންތަކަމާއެކު ގުޅިގެން މަސައްކަތް ކުރުމުގެ ސިފަ އަށަގަނެފައިވާ، އަހްލާގާއި ސުލޫކު ރަނގަޅު، އެކަކު އަނެކަކަށް އިހްތިރާމު ކުރާ، ޢަމަލާއި ބަހުގައި ކެތްތެރި ބައެއްގެ ގޮތުގައި ހެދުމަކީވެސް މި ޕްރޮގްރާމްގެ އެއް އަސާސެވެ.

ޤައުމީ ހިދުމަތުގެ ޕްރޮގްރާމުގެ ފުރަތަމަ ބުރަށް ބައިވެރިން ހޮވުން ކުރިއަށްގެންގޮސްފައިވަނީ، މިއަހަރުގެ ޖުލައިމަހުގެ ތެރޭގައެވެ. އެގޮތުން މާލެ ހިމެނޭހެން 10 ހިސާބެއްގައި ވަނީ ކުދިންހޮވުމުގެ ކަންކަން ކުރިއަށްގެންގޮސްފައެވެ.

އެ ރަށްތަކުގެ ތެރޭގައި ހިމެނެނީ، މާލެ ސިޓީ، ހއ. ދިއްދޫ، ކުޅުދުއްފުށި ސިޓީ، ށ. ފުނަދޫ، ނ. މަނަދޫ، ރ. އުނގޫފާރު، އދ. މަހިބަދޫ، ފ. ނިލަންދޫ، ތ.ވޭމަންޑޫ، ލ. ގަން އަދި އައްޑޫ ސިޓީ ހިތަދޫ އެވެ. މި މަރުޙަލާގައި ބައިވެރިން އިންޓަރވިއުއާއި، މެޑިކަލް ޓެސްޓްތަކާއި، އެޕްޓިޓިއުޑް ޓެސްޓްގެ އިތުރުން ފިޓްނަސް ޓެސްޓްތައް ވެސް ފުރިހަމަކޮށްފައިވާކަމަށް ޑިފެންސް މިނިސްޓްރީން ބުންޏެވެ.

ޤައުމިއްޔަތު ޕްރޮގްރާމް އިއުލާނުކޮށްފައިވަނީ މިދިޔަ އަހަރުގެ ނަސްރުގެ ދުވަހުގެ ޖަލްސާގައެވެ. މި ޕްރޮގްރާމަށް ކުރިމަތިލެވެނީ، އުމުރުން 16 އަހަރާއި 28 އަހަރާއި ދެމެދުގެ ޒުވާނުންނަށެވެ. މީގެތެރެއިން، އުމުރުން 16 އަހަރާއި 18 އަހަރާއި ދެމެދުގެ ކޮންމެ ޒުވާނަކު، ގައުމީ ހިދުމަތާއި ގުޅުމަށް ހުށަހަޅާއިރު، އެކަމަށް ބެލެނިވެރިޔާ އިއުތިރާޒު ނުކުރާކަމުގެ އިގްރާރެއް ހުށަހަޅަން ޖެހެއެވެ.