ދުބާއީ އިންވެސްޓްމަންޓް ފޯރަމަށް އިންވެސްޓަރުންގެ ބޮޑު ތަރުހީބެއް ލިބިއްޖެ: ސައީދު

ދުބާއީ އިންވެސްޓް ފޯރަމްއަށް ރަޖިސްޓްރީ ވުމުގައިވެސް އިންވެސްޓަރުންގެ ފަރާތުން ވަރަށް ބޮޑުތަރުހީބެއް ލިބިފައިވާ ކަމަށް އިކޮނޮމިކް މިނިސްޓަރު މުހަންމަދު ސައީދު ވިދާޅުވެއްޖެ އެވެ.

މިނިސްޓަރ މިފަދައިން ވިދާޅުވެފައި މިވަނީ މިއަދު ދުބާއީގައި ފެށުމަށް ހަމަޖެހިފައިވާ  މި ސަރުކާރުގެ ދެވަނަ "މޯލްޑިވްސް އިންވެސްޓް ފޯރަމް" ފެށުމުގެ ކުރިން ނޫސްވެރިންނާއި ބައްދަލުކުރައްވާ ދެއްކެވި ވާހަކާގައެވެ.

އެގޮތުން މިނިސްޓަރ ސައީދު ވިދާޅުވީ ފޯރަމް ބާއްވާ ހޯލްގައި ޖާގަ ހުރީ 250 ގޮނޑިއަށް ނަމަވެސް 280 އަށްވުރެ ގިނަ ބުކިންގްތައް މިހާރު ލިބިފައިވާ ކަމަށާއި، އަދި އެކަމުން ވެސް ދޭހަކޮށްދެނީ ރާއްޖެއަށް އިންވެސްޓް ކުރުމުގައި ބޭރުގެ ފަރާތްތަކުގެ ހުރި ޝައުޤުވެރިކަން ކަމަށެވެ.

"250 ގޮނޑި ކެޕޭސިޓީގެ ހޯލްއަކަށް 280 އަށްވުރެ ގިނަ ބުކިންގް އައުމުން، އެކަމުން އެބަ ދޭހަވޭ އަދިވެސް އިތުރު ފަރާތްތައް ރާއްޖެއަށް އިންވެސްޓް ކުރުމުގެ ޝައުޤުވެރިކަން ހުރިކަން" ސައީދު ވިދާޅުވިއެވެ.

މިނިސްޓަރ ސައީދު އިތުރަށް ފާހަގަކުރެއްވި ގޮތުގައި މި ފޯރަމްގައި ބައިވެރިވެ ވަޑައިގަންނަވާ ކޮންމެ އިންވެސްޓަރަކީ ރާއްޖޭގައި އިންވެސްޓް ނުކޮށްފާނެ އިންވެސްޓަރެއް ނަމަވެސް މި ފޯރަމަށް އައުމަށް ޝަޢުޤުވެރި ވުމަކީ އެފަދަ ފަރާތްތަކުގެ މެދުގައި ރާއްޖޭ އާއި މެދު އިތުބާރު އުފެދިފައިވާކަން ހާމަވެގެންދާ ކަމެއް ކަމަށެވެ.

"ދުބާއީ ފޯރަމް ޗައިނާގައި ބޭއްވި ފޯރަމާއި ހިލާފަށް ވަރަށް ބޮޑެތި ފޮރިން ޑައިރެކްޓް އިންވެސްޓްމަންޓްތައް ބައިވެރިވާނެ. ދެން މިއަދު ހޯލް ކެޕޭސިޓީއަށްވުރެ ބުކިންގް ގިނަވެގެން މިއުޅެނީ. އަންނަ ކޮންމެ މީހަކު އިންވެސްޓް ކުރަނީއެއް ނޫން، އެހެންނަމަވެސް ރާއްޖެއާ މެދު ޝައުޤުވެރިކަން އޮތީމަ އެކަން ބެލުމަށްޓަކައި ވެސް އަންނަ މީހުން އުޅޭނެ. އަދި ރާއްޖޭގައި އިންވެސްޓް ކުރެވިދާނެ ދާއިރާތަކަކީ ކޮބައިތޯ ބެލުމަށް ވެސް އަންނަ މީހުން އުޅެދާނެ. ރާއްޖޭގައި އިންވެސްޓް ކުރެވިދާނެ ފަހި ފުރުސަތުތައް ޑިސްޕްލޭ ކުރީމަ، އެމީހުންގެ ޗޮއިސް އެއް އެއީ އިންވެސްޓް ކުރާނަންތޯ ނުވަތަ ނޫންތޯ" ސައީދު ވިދާޅުވިއެވެ.

މިސަރުކާރުގެ އެންމެ ފުރަތަމަ އިންވެސްޓް ފޯރަމް ޗައިނާގައި ބާއްވާފައިވާ އިރު އެ ފޯރަމަކީ ވަރަށް ކާމިޔާބު ފޯރަމެއްކަމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވަނީ ވިދާޅުވެފައެވެ.