ހޮޅުދޫ ރައްޔިތުންގެ ތެރެއިން ވަކިން ބައްދަލުކުރަން އެދުނު އެންމެނާ ބައްދަލު ކުރިން: އިހްސާން

‏ނ ހޮޅުދޫ ރައްޔިތުންގެ ތެރެއިން ވަކިވަކިން ބައްދަލު ކުރަން އެދުނު ހުރިހާ ރައްޔިތުންނާއި ބައްދަލު ކުރައްވާފައިވާނެ ކަމަށް ދާޚިލީ ވަޒީރު އަލީ އިހްސާން ވިދާޅުވެއްޖެއެވެ.

ޒަޚަމްތަކާއެކު ނ ހޮޅުދޫގައި މަރުވެފައި އޮއްވާ ފެނުނު އެރަށު ޒަކިއްޔާ މޫސާގެ މަރާ ގުޅިގެން ކޮމިޝަނާ އޮފް ޕޮލިސް އަލީ ޝުޖާއު އަދި ވަޒީރު އަލީ އިހުސާން ވަނީ މިދިޔަ ފެބްރުއަރީ މަހުގެ 25 ވަނަ ދުވަހު އެރަށަށް ވަޑައިގެންފައެވެ.

އެ ދުވަހު އެ ރަށަށް ވަޑައިގެން ރަށުގެ ބައެއް ރައްޔޮތުންނާއި ބައްދަލު ކުރެއްވުމަށްފަހު ޖެހިގެން އައި ދުވަހު އެނބުރި މާލެއަށް ވަޑައިގަންނަވަން އުޅުއްވަނިކޮށް އެރަށު ބައެއް މީހުން ވަނީ ވަޒީރާ ބައްދަލުކޮށްފައެވެ.

އަދި އޭރު ކަންތައް ހިނގިގޮތް ހާމަކުރައްވައި ވަޒީރު އެކްސްގައި ރޭ ކުރެއްވި ޕޯސްޓެއްގައި ވިދާޅުވީ، ފުރަންވަޑައިގަންނަވަން އުޅުއްވަނިކޮށް ބައްދަލު ކުރި މީހަކު، ވަޒީރާ ބައްދަލުކުރަން އެދުނު ބައެއް މީހުންނާ ބައްދަލުނުވެ ފުރަންދަނީކަމަށް، ބުނިކަމަށާ، އެމީހާ ކައިރީގައި ވަރަށް އަވަހަށް އެރަށަށް ދާނެ ކަމަށް ވަޒީރު ވިދާޅުވެފައިވާނެ ކަމަށެވެ.

ވަޒީރު އެރަށަށް ވަޑައިގަންނަވާނެ ކަމަށް ތަކުރާރުކޮށް ވިދާޅުވުމުން ވެސް ދެން އެރަށަށް ވަޒީރު ވަޑައިނުގަންނަވާނެކަމަށް އެމީހާ ބުނަމުން ދިޔަކަމަށާ، އެހެންކަމުން، އެވަގުތު ވަޒީރުގެ ޝެޑިއުލް ބެއްލެވުމަށްފަހު 9 މާރޗް 2025 ވަނަދުވަހު އިރާދަކުރެއްވިއްޔާ އެރަށަށް ވަޑައިގަންނަވާނެ ކަމަށް ވިދާޅުވި ކަމަށް އިހްސާން ވިދާޅުވިއެވެ.

އެހެން ވިދާޅުވުމުންވެސް އެމީހާ ދިޔައީ ވަޒީރު އިހްސާން އެރަށަށް ވަޑައިނުގަންނަވާނެ ކަމަށް ތަކުރާރުކޮށް ބުނަމުންކަމަށާ، އެހެންކަމުން އެ ރަށަށް ވަޑައިގަންނަވާނެ ކަމުގެ ޔަގީންކަން އިތުރަށް ދެއްވުމަށް އެދުވަހު އެރަށަށް ނުގޮސްފިނަމަ 10 މާރޗް ގައި ވަޒީފާގައި ނުހުންނަވާނެ ކަމަށް ދެންނެވިކަމަށް އިހްސާން ވިދާޅުވިއެވެ.

”ނަމަވެސް 9 މާރޗު 2025 ވަނަ ދުވަހު ކެބިނެޓްގެ ބައްދަލުވުމެއް ބާއްވަން ހަމަޖެހުމުން އަޅުގަނޑުވާނީ 6 މާރޗް 2025 ގައި އެރަށަށް ދެވަނަ ފަހަރަށްގޮސް ރައްޔިތުންގެ ތެރެއިން ވަކިން ބައްދަލުކުރަން އެދުނު ފަރާތްތަކާއި ބައްދަލުކޮށްފައި.“ ވަޒީރު ވިދާޅުވިއެވެ.

ވަޒީރު މިހެން ވިދާޅުވެ ޕޯސްޓެއް ކުރައްވާފައި މިވަނީ، ހޮޅުދޫ ރައްޔިތުންނާ ބައްދަލުކުރައްވާނެ ކަމަށް ވިދާޅުވުމަށްފަހު ބައްދަލު ނުކުރައްވައި އިތުރުފުޅު ހެއްދެވި ކަމަށް ބައެއް ފަރާތްތަކުން ވާހަކަ ފަތުރަމުން ދިޔުމާއި ގުޅިގެންނެވެ.