ވީއައިއޭއިން މިދިޔަ އަހަރު 89،163 ޓަނުގެ ކާގޯ އުފުލި

ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން އެކަނިވެސް މިދިޔަ އަހަރު 89،163 ޓަނުގެ ކާގޯ އުފުލިކަމަށް އެ އެޢާޕޯޓުން ބުނެފިއެވެ.

ވީއައިއޭން މިއަދު އާންމުކުރި މިދިޔަ އަހަަރުގެ ކާގޯއާ ގުޅޭ ތަފާސްހިސާބުތަކުން ދައްކާގޮތުގައި މިިދިޔަ އަހަރު އުފުލި ކާގޯގެ ތެރޭގައި ހިމެނެނީ ރާއްޖެ ގެނައި 66،840 ޓަނުގެ ކާގޯއާއި ރާއްޖޭން ގެންދިޔަ 22،323 ޓަނުގެ ކާގޯއެވެ. މިއީ މިއީ އޭގެ ކުރީ އަހަރާ އަޅާބަލާއިރު %10 އިތުރު މިންވަރެކެވެ.

މި ތަފާސްހިސާބުތަކުގައި ވާގޮތުން، މިދިޔަ އަހަރު ވީއައިއޭގައި 16،372 ޓަނުގެ ޓްރާންސްޝިޕްމެންޓް ކާގޯ ވެސް އުފުލާފައިވެއެވެ.  މިއީ 2024 ވަނަ އަހަރާ އަޅާބަލާއިރު %22 އިތުރު އަދަދެކެވެ.

މިދިޔަ އަހަރު އެ އެއާޕޯޓުން އުފުލި ޓްރާންސްޝިޕްމެންޓު ކާގޯގެ ތެރޭގައި ހިމެނެނީ 3،192 ޓަނުގެ ސީ-ޓު-އެއާ ކާގޯއާއި، 13،180 ޓަނުގެ އެއާ-ޓު-އެއާ ކާގޯއެވެ.

ވީއައިއޭއިން އާއްމުކޮށްފައިވާ މައުލޫމާތަށް ބަލާއިރު، އެ އެއާޕޯޓުގައި މިދިޔަ އަހަރު ކާގޯ އުފުލި މަތިންދާބޯޓުތަކުގެ އަދަދު 524 އަށް އަރާކަމަށެވެ.

ވެލާނާ އިންޓަނޭޝަނަލް އެއާޕޯޓަށް އެންމެ ގިނައިން ކާގޯ އުފުލި އެއާލައިންތަކުގެ ތެރޭގައި ހިމެނެނީ އެފްކޮމް، ފްލައިވާޔޫ، އެމްޖެޓްސް، ގަތަރު ކާގޯ، ނެޝަނަލް އެއާލައިންސް، އެއާ މާސްޓާ އަދި އެމްއެންޖީ އެއާލައިންސް އެވެ.