ސަލަފް ޖަމްއިއްޔާާއާއި މެދު ފިޔަވަޅު އެޅުމަށް މަޖިލީހުން ނިންމަނީ

ޓެރަރިޒަމަށް ވާގިވެރިވާކަމަށްބުނެ މަޝްހޫރު ދީނީ ޖަމްއިއްޔާއެއްކަމުގައިވާ ޖަމްެއިއްޔަތުލް ސަލަފާއި މެދު ފިޔަވަޅު އެޅުމަށް ރައްޔިތުންގެ މަޖިލީހުން ނިންމައިފިއެވެ.

މިކަން ހާމަކުރައްވާފައިވަނީ މިއަދުގެ ރައްޔިތުންގެ މަޖިލީހުގެ ޖަލްސާގައި، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދެވެ.

ރައީސް ނަޝީދު ވިދާޅުވީ ޑރ.އަފްރާޝީމް އަލީގެ މަރާއި ގުޅިގެން ތައްޔާރުކުރެވުނު ރިޕޯޓްގެ މައްޗަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމެޓީން އެކުލަވާލާފައިވާ ރިޕޯޓެއްގައި ސަލަފް ޖަމްެއިއްޔާއިން ޓެރަރިޒަމަށް ވާގިވެރިވާކަމަށް ބުނެފައިވާ ކަމަށެވެ. އެހެންކަމުން އެ ޖަމްއިއްޔާއާއި މެދު ފިޔަވަޅު އެޅުމަށް ސަބް ކޮމެޓީއަކަށް ފޮނުވާފައިވާކަަމަށް އެމަނިކުފާނު ވިދާޅުވިއެވެ.

ސަލަފް ޖަމްއިއްޔާއާއި މެދު ރައްޔިތުންގެ މަޖިލީހުން އެޅުމަށް ވިސްނަމުންދަނީ ކޮން ފިޔަވަޅެއްކަން ހާމަކޮށްފައެއް ނުވެއެވެ.

ނަމަވެސް މިއީ ރައްޔިތުންގެ މަޖިލީހުގެ ގާނޫނީ އިހުތިސާސްގެ ބޭރުން، ދީނީ އިލްމުވެރިންނަށް ދަތިކުރުމަށް ކުރަމުންދާ މަސައްކަތެއްކަމަށްބުނެ ގިނަބަޔަކު ދަނީ މިކަމާއި ދެކޮޅަށް މީސް މީޑިޔާގައި އަޑު އުފުލަމުންނެވެ. އަދި އެ ޖަމްއިއްޔާާ އުވާލަން ޖެހޭކަމަށްބުނެވެސް ބައެއް ފަރާތްތަކުން ދަނީ އަޑު އުފުލަމުންނެވެ.

ފާާހަގަކޮށްލެވޭ ގޮތުގައި ޖަމްއިއްޔާތައް އުވާލުމުގެ ބާރު ލިބިގެންވަނީ ޔޫތު މިނިސްޓްރީއަށެވެ. އަދި ޓެރަރިސްޓް ޖަމާއަތްތައް ކަނޑައެޅުމުގެ ބާރު ލިބިފައިވަނީ ގައުމީ ސަލާމަތާއި ބެހޭ މަޖިލީހުން ލަފާ އަރުވާގޮތުގެ މަތިން ރައީސުލްޖުމްހޫރިއްޔާއަށެވެ.