މަރުކޮމިޝަނުން ނެރުނު ރިޕޯޓަކީ މީހަކު ރަޖަމުކޮށްލަން ނެރެފައޮތް ރިޕޯޓެއް: އާދަމް ޝަރީފު

ޑރ. އަފްރާޝީމު އަލީގެ މަރުގެ މައްސަލަ އިތުރަށް ތަހުގީގުކޮށް، މަރުކޮމިޝަނުން ނެރުނު ރިޕޯޓަކީ މީހަކު ރަޖަމުކޮށްލަން ނެރެފައިވާ ރިޕޯޓެއް ކަމަށް މަޑުއްވަރީ ދާއިރާގެ މެންބަރު އާދަމް ޝަރީފު ވިދާޅުވެއްޖެއެވެ.

އާދަމް ޝަރީފު މިހެން ވިދާޅުވިއިރު، އަފްރާޝީމުގެ މަރުގެ ރިޕޯޓުގައި ސަލަފު ޖަމުއިއްޔާއަށާއި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމަށް ތުހުމަތުކޮށްފައި ވެއެވެ. އެގޮތުން ސަލަފަކީ ޖިހާދީ ފިކުރުގެ ޖަމާއަތެއް ކަމަށްބުނެ، އެޖަމުއިއްޔާއަށް ފިޔަވަޅު އެޅުމަށް މަޖިލީހުގެ 241 ކޮމެޓީގެ ސަބް ކޮމެޓީން މިރޭ ވަނީ ނިންމާފައެވެ. ނަމަވެސް ތިން މެންބަރުން ތިއްބަވާ އެކޮމެޓީން މަރުކޮމިޝަނުގެ ރިޕޯޓު ދިރާސާކުރުމަށްފަހު ރިޕޯޓު ލިޔެ ތައްޔާރުކޮށް ފާސްކުރީ ހެންވޭރު ދެކުނު ދާއިރާގެ މެންބަރު ހަސަން ލަތީފު އެކަނި އިންނަވައިގެންނެވެ. މައި ކޮމެޓީއަށް ފޮނުވަން ތައްޔާރުކުރި އެރިޕޯޓުގައި ސޮއިކުރެއްވީ ވެސް ހަސަން ލަތީފު އެކަންޏެވެ.

އިދިކޮޅު ޕީޕީއެމް، ޕީއެންސީ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާދަމް ޝަރީފު ވިދާޅުވީ، ސަލަފަކީ ޖިހަދީ ފިކުރުގެ ޖަމާއަތެއް ނޫން ކަމަށާއި ސަލަފު އުވާލައިގެން ނުވާނެ ކަމަށެވެ. އަދި އެކަމާ ރައްޔިތުން ތެދުވާނެ ކަމަށް ވިދާޅުވިއެވެ.

''މިއީ ތިން މީހުން ހިމެނޭ ކޮމެޓީއެއްގައި، ތިން މީހުން ކުރެ ދެ މީހުން އެއާ ބެހޭގޮތުން ވޯޓެއް ދީ، ފާސްވެފައި އޮތް އެއްޗެއް ނޫން. މި ހުރިހާ ކަމެއްގައިވެސް ފޮރުވިފައިވަނީ އިސްލާމްދީނުގެ ހަޟާރާތް ފެތުރުމުގައި މަސައްކަތް ކުރާ މީހުންނަށް ގޮންޖެހުން ކުރިމަތިކުރުން. ރާއްޖެއަކީ މުޅިން މިނިވަން ފިކުރަށް ހުޅުވާލެވިފައިވާ ތަނަކަށް ހެދުމާއި އެކަން ބޭރުގެ ލާދީނީ މީހުންނަށް ދެއްކުން. މުޅިންވެސް ފެނިގެން މިދަނީ މުޅި ސަރުކާރުގެ ތެރެއިން އެމަސައްކަތް ކުރާތަން.'' އާދަމް ޝަރީފް ވިދާޅުވިއެވެ.

އެ ރިޕޯޓުގައި ހިމެނިފައިވާ ބައެއް ވާހަކަތަކަކީ އެއްވެސް ސާބިތު ހެއްކެއް ނެތް، އެހެންނަމަވެސް، ސިޔާސީ ގޮތުން މީހަކު ގަތުލްކޮށްލަން ނޫނީ ރަޖަމް ކުރަން ބޭނުންވާ ނަމަ މީހަކު ދައްކަން ބޭނުންވި ހުރިހާ ވާހަކައެއް ލިޔެފައި އޮތީ. އެރިޕޯޓު ނެރެފައި އޮތީ އެއްވެސް ވަރަކަށް ދިރާސާ ނުކޮށް.'' އާދަމް ޝަރީފު ވިދާޅުވިއެވެ.

އޭނާ ވިދާޅުވީ ސަލަފުގެ ހަރަކާތްތައް ހުއްޓުވަން އުޅެނީ އެމްޑީއެން ގެ ލާދީނީ ފިކުރަށް ރާއްޖެއިން ޖާގަ ދޭން ކަމަށާއި މިއީ ރާއްޖޭގެ އެއްވެސް ރައްޔިތަކު ފުރުސަތު ދޭނެ ކަމެއް ނޫން ކަމަށެވެ.