ޖަރީމާތައް ހިންގި ކުންފުނިތަކުގެ ވެރިން މަޖިލީހަށް ހާޒިރުކޮށް މައްސަލަ ބަލާނަން: ފަލާހް

ސަރުކާރު ހިއްސާވާ ކުންފުނިތަކުގައި ޖަރީމާތައް ހިންގި ކުރީގެ ވެރިން މަޖިލީހަށް ހާޒިރުކޮށް މައްސަލަ ބައްލަވާނެ ކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާހް ވިދާޅުވެއްޖެއެވެ.

ފަލާހް މިފަދައިން ވިދާޅުވީ، ރައްޔިތުންގެ މަޖިލީހަށް ސަރުކާރުގެ ފަރާތުން، ފެނަކައިގެ ކުރީގެ އިސް ވެރިންގެ އިހުމާލުން އެ ކުންފުންޏަށް ލިބިފައިވާ ގެއްލުންތައް ބަލައި ފިޔަވަޅު އަޅަން ގޮވާލާ ހުށަހެޅި ކުއްލި މައްސަލަ އަށް ބަހުސް ކުރައްވަމުންނެވެ.

މިގޮތުން ފަލާހް ވިދާޅުވީ، ކުރީ ސަރުކާރު ނިނުމުއިރު ފެނަކަ އޮތީ ހަތަރު ބިލިއަން ރުފިޔާއަށް ދަރަނިވެރި ވެފައިކަމަށާއި، ކުރީ ސަރުކާރުން އެ ފައިސާ ހަރަދު ކުރި ގޮތް ނޭނގޭ އިރު، އެ ފައިސާ އިން ހިންގި އެއްވެސް މަޝްރޫއެއް ނެތް ކަމަށެވެ.

ފެނަކައިގެ އޭރުގެ އިސްވެރިން އެ ފައިސާއިން ހަރަދުކޮށްފައި ވަނީ އަމިއްލަ ބޭނުންތަކަށްކަމަށް ތުހުމަތުކުރައްވާ ފަލާހް ވިދާޅުވީ، އަނބިންނަށާއި ގުޅުން އޮންނަ އެހެން ފަރާތްތަކަށްއެ ފައިސާއިން ހަރަދުކޮށްފައިވާ ކަމަށެވެ.

ހަމައެއާއިއެކު، ކުރީ ސަރުކާރުގައި އެސްޓީއޯ އަދި އާރްޑީސީ ފަދަ ކުންފުނިތަކުން ވެސް އަމަލުކޮށްފައިވަނީ މިފަދައިންކަމަށް ފަލާހް ވިދާޅުވިއެވެ.

ފަލާހް ވިދާޅުވީ، މިފަދަ ޖަރީމާތައް ހިންގާފައިހުރި ހުރި ހުރިހާ ކުންފުނީގެ ވެރިން މަޖިލީހަށް ހާޒިރުކޮށް، މައްސަލަ ބަލާނެ ކަމަށެވެ. އަދި ދިވެހި ދައުލަތަށް ގެއްލިފައިވާ ރައްޔިތުންގެ ހުރިހާ ފައިސާއެއް ހޯދައިދިނުމަށް 20 ވަނަ މަޖިލީހުން މަސައްކަތްކުރާން ކަމުގެ ޔަގީންކަން ފަލާހް ދެއްވިއެވެ.

"މިފަދަ ނުބައި ޖަރީމާތައް ހިންގާފަ ހުރި ހުރިހާ ކުންފުނީގެ ވެރިން މިތަނަށް ހާޒިރު ކުރާނެމޭ، މައްސަލަ ބަލާނަމޭ. ދިވެހި ސަރުކާރަށް، ދިވެހި ދައުލަތަށް ދިވެހި ރައްޔިތުންގެ ފައިސާ މި ގެއްލިފަ ހުރި ހުރިހާ ފައިސާއެއް އިރާދަކުރެއްވިއްޔާ ރައްޔިތުންނަށް ހޯދައިދިނުމަށްޓަކާ 20 ވަނަ ރައްޔިތުންގެ މަޖިލީހަށް ކޮށްދެވެން ހުރި ހުރިހާ މަސައްކަތެއް ކޮށްދޭނެ ކަމުގެ ފުރިހަމަ ޔަގީންކަން އަރުވަން،"

ފަލާހް ވިދާޅުވިއެވެ.

މީގެ ކުރިން ފެނަކަ ކޯޕަރޭޝަންގެ މެނޭޖިންގް ޑިރެކްޓަރ މުއާޒް މުހައްމަދު ރަޝީދުގެ އިތުރުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެސް ވަނީ އެންމެ ހާލުގައި އޮތީ ފެނަކަ ކަން ފާހަގަކުރައްވާފައެވެ.