ރާއްޖޭގެ މަސްވެރިކަން ހަލާކު ކުރީ އެމްޑީޕީ ސަރުކާރުން: ރައީސް ޔާމީން

ރާއްޖޭގެ މަސްވެރިކަން ހަލާކު ކުރީ އެމްޑީޕީ ސަރުކާރުން ކަމަށް ކުރީގެ ރައީސް ޔާމީން އަބްދުލް ގައްޔޫމް ވިދާޅުވެއްޖެއެވެ.

ރޭ ޕީއެންއެފްގެ ފްރޮންޓް އޮފީހުގައި ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ، މަސްވެރިކަމަކީ ދިވެހި ރާއްޖޭގެ ލޭނާރު ކަމަށާ، މަސްވެރިންގެ ޚިދުމަތުގެ އަގުވަޒަން ކުރަން ޖެހޭ ކަމަށެވެ. އަދި މަސްވެރިން ދިވެހި ރާއްޖޭގައި ތިބެންޖެހޭ ކަމަށެވެ. އެހެންކަމުން، މަސްވެރިން ބާނާ މަސް ގަތުމަށްފަހު އެއަށްވާ ފައިސާ ދައްކަންޖެހޭ ކަމަށް ޔާމީން ވިދާޅުވިއެވެ.

މިއާއެކު، އެމްޑީޕީން މަސްވެރިންގެ ހައްގުގައި ކުރާ ކަންކަމާއި އެނޫންވެސް އިދިކޮޅު ޕާޓީގެ ހައިސިއްޔަތުން ކުރަމުންދާ ކަންކަމަށް ޕީއެންއެފްއިން ތާއީދު ކުރަންތޯ ނުވަތަ ނޫންތޯ ކުރެވުނު ސުވާލަކަށް ޖަވާބު ދެއްވަމުން ރައީސް ޔާމީން ވަނީ ޕީއެންއެފްއިން އެމްޑީޕީއަށް ތާއީދު ނުކުރާނެ ކަމަށާ، އެ ދެ ޕާޓީއަކީ އެއް ފިކުރެއްގެ ޕާޓީއެއް ނޫން ކަމަށް ވިދާޅުވެފައެވެ.

އެހެން ނަމަވެސް، ރައްޔިތުންގެ ހައްގުގައި މަޖިލިސް ތެރެއިން، އެމްޑީޕީން ކުރަމުން އަންނަ ކަންކަމަށް ތާއީދު ކުރައްވާނެ ކަމަށް ޔާމީން ވިދާޫވިއެވެ.

އެއީ އެމްޑީޕީ ވެއްދީމަ ތާއީދު ކުރަނީކީއެއް ނޫނޭ. އެއީ މަސްވެރިންގެ ހައްގެއް ގެއްލިގެންދާތީ، އެމީހުންނަށް އެ ފައިސާ ލިބެންޖެހޭ ކަމަށް އަޅުގަނޑުމެން ގަވޫލޫކުރާތީ. އެހެންވީމާ އެމްޑީޕީ ވެގެންނެއް އަޅުގަނޑުމެންނެއް، ތާއީދެއް ނުކުރާނަން. އެމްޑީޕީން ދެއްތޯ މިތަނުގައު މުޅި އަޚްލާގު ހަލާކުކޮށްލި ބަޔަކީ. ކީއްވެތޯ މިކަންކަން ހަނދާން ނައްތާލި ބަޔަކީ.

ރައީސް ޔާމީން އަބްދުލް ގައްޔޫމް

ކަންމިހެން ހުރި ނަމަވެސް، ޔާމީން ވަނީ އެމްޑީޕީގެ ވެރިކަމުގައި ރާއްޖޭގެ އިގްތިޞާދު “ފުނޑާލައި” މަސްވެރިކަން ހަލާކުކޮށްލި ކަމަށް ވިދާޅުވެ އެޕާޓީއަށް ވަރަށް ބޮޑަށް ފާޑުވިދާޅުވެފައެވެ.

އެމީހުން (އެމްޑީޕީ) އިން ދިވެހިރާއްޖޭގެ އިގްތިޞާދު ފުނޑާލީ. ފުނޑާލީއޭ މި ދަންނަވަނީ އެމީހުން މަސްވެރިކަން ހަލާކު ކޮށްލީ އެމްޑީޕީ ސަރުކާރުން ކަމަށް ވީމަ. މަސްވެރިންގެ ދޯނީގައި މަހަށް ނުކުތް އެންމެނަށް އެއްގަމުން ވަޒީފާ ދިނީމަ، މަސްދޯނިތައް ވިއްކާލަން ޖެހުނީ. މަސްވެރިކަން ދިޔައީ އެ ސަބަބާހުރެ.

ރައީސް ޔާމީން އަބްދުލް ގައްޔޫމް

ޔާމީން ވިދާޅުވީ، އެމްޑީޕީން ރާއްޖޭގެ އިގްތިޞާދު ފުނޑާލާފައި ވަނީ ރޭވުމެއްގެ ތެރެއިން ކަމަށެވެ.