އެފްޑީސީ ގެ 4000 ހައުސިންގ ޔުނިޓް ހަވާލުކުރުމަށް ތައްޔާރުވަނީ

ފަހި ދިރިއުޅުން ކޯޕަރޭޝަނުން ހުޅުމާލޭގެ ދެވަނަ ފިޔަވަހީގައި ތަރައްޤީ ކުރަމުންދާ 4000 ހައުސިންގ ޔުނިޓްގެ މަސައްކަތް ނިންމާ އޭގެ ހައްޤުވެރި ފަރާތްތަކާއި ހަވާލުކުރުމުގެ މަސައްކަތް ކުރަމުންދާކަމަށް އެކޯޕްރޭޝަނުން ހާމަކޮށްފިއެވެ.

މިކަން ހާމަކޮށްފައި ވަނީ ފަހި ދިރިއުޅުން ކޯޕަރޭޝަނުން  މިއަދު އާއްމުކުރި ބަޔާނެއްގައެވެ. އެބަޔާނުގައި ބުނެފައިވަނީ ހުޅުމާލޭގެ ދެވަނަ ފިޔަވަހީގައި ތަރައްގީކުރަމުންދާ 4000 ހައުސިންގ ޔުނިޓްގެ މަސައްކަތް ކުރިއަށްދަނީ ހަމަޖެހިފައިވާ ޝެޑިއުލްއާ އެއްގޮތަށްކަމަށާއި، އެ ޔުނިޓުތައް ވީއެންމެއަވަސް މުއްދަތެއްގެ ތެރޭގައި ޔުނިޓުތަކުގެ ހައްޤުވެރިންނާއި ހަވާލުކުރުމަކީ އެކޯޕަރޭޝަނުން އެންމެ އިސްކަމެއްދީގެން ކުރަމުންދާ މަސައްކަތް ކަމަށެވެ.

މިހާރު ކުރެވެމުންދާ މަސައްކަތްތަކާއި ގުޅޭގޮތުން އެފްޑީސީގެ ބަޔާނުގައި ބުނެފައިވަނީ ބައެއް ޓަވަރުތަކުގެ މަސައްކަތް ޝެޑިއުލަށްވުރެ އަވަސް މުއްދަތެއްގެ ތެރޭގައި ރައްޔިތުންނަށް ފޯރުކޮށްދިނުމުގެ މަސައްކަތް އެކޯޕްރޭޝަނުން ކުރަމުންދާ ކަމަށާއި، 2023 ވަނަ އަހަރުގެ ޑިސެމްބަރު މަހުގެ ނިޔަލަށް މަސައްކަތް ހަލުވިކުރެވިފައިވާ ޓަވަރުތަކުގައި 31 ޝީޓް އަޅައި ނިންމާފައިވާއިރު، މިއީ އެ މަޝްރޫއުގައި މިހާތަނަށް ކުރިއަށް ގެންދެވުނު އެންމެ ހަލުވި ސްލެބް ސައިކަލްކަމަށެވެ.

އެފްޑީސީގެ ބަޔާނުގައި އިތުރަށް ބުނެފައިވަނީ ވީ އެންމެ އަވަސް މުއްދަތެއްގެ ތެރޭގައި ރައްޔިތުންނަށް އެ ހައުސިންގ ޔުނިޓުތައް ހަވާލުކުރުމުގެ މަސައްކަތް އެ ކޯޕަރޭޝަނުން ކުރަމުން ގެންދާއިރު، އެ ކޯޕަރޭޝަނުގެ މަސައްކަތްތެރިން ސައިޓުތަކުގައި ތިން ޝިފްޓަކަށް ބަހާލައިގެން 24 ގަޑިއިރު މަސައްކަތް ކުރަމުން ގެންދާކަމަށެވެ.

ރައީސް ޑރ.މުހައްމަދު މުއިއްޒުގެ ރިޔާސީ އެންމެ ބޮޑު ވަޢުދަކީ ދިވެހިރައްޔިތުންނަށް ބޯހިޔާވަހިކަން ފޯރުކޮށްދިނުން ކަމަށްވާއިރު މި ސަރުކާރު ވެރިކަމަށް އައުމަށްފަހު މި ގޮތައް ނުނިމިހުރި ގިނަ މަޝްރޫޢުތަކެއް އަވަސް ސްޕީޑުގައި ބާރަށް ކުރިއަށްދާކަމަށް ސަރުކާރުން ހާމަކުރައްވައެވެ.