އަނިޔާ އާއި ރޭޕް ހިމެނޭހެން މިދިޔަ މަހު ކުޑަކުދިންނާ ގުޅުންހުރި 84 މައްސަލައެއް ހުށަހަޅާފައިވޭ: ވުޒާރާ

ހުސްވި އޮގަސްޓު މަހު ކުޑަކުދިންނާ ގުޅޭ 84 މައްސަލައެއް ހުށަހަޅާފައިވާ ކަަމަށް އާއިލީ ތަރައްގީއާ ބެހޭ ވުޒާރާއިން ބުނެފިއެވެ.

އާއިލީ  ތަރައްޤީއާ ބެހޭ ވުޒާރާއިން ޢާންމުކުރި ތަފާސް ހިސާބުތަކުން ދައްކާގޮތުން މިދިޔަ މަހު އެ ވުޒާރާއަށް 40 ފިރިހެން ކުއްޖެއްގެ އަދި 44 އަންހެން ކުއްޖެއްގެ މައްސަލަ ހުށަހަޅައިފައިވެއެވެ. އެގޮތުން އެންމެ ގިނައިން ހުށަހަޅައިފައިވަނީ އިހުމާލުގެ މައްސަލަތަކަށްވާއިރު، އިހުމާލުގެ މުޅި ޖުމްލަ 26 މައްސަލައެއް ވަނީ ހުށަހަޅާފައިވެއެވެ.

އޭގެ އިތުރަށް ގެވެށި އަނިޔާކުރާތަން 14 ކުއްޖަކަށް ފެނުނުއިރު، ޖިންސީ ގޯނާގެ 13 މައްސަލައެއް ވަނީ ހުށަހަޅާފައެވެ. އަދި ނަފްސާނީ އަނިޔާގެ ނުވަ މައްސަލަ އާއި، ޖިސްމާނީ އަނިޔާގެ އަށް މައްސަލައާއި، ގަނާކުުރމުގެ ފަސް މައްސަލައިގެ އިތުރުން ކަރާމަތަށް އުނިކަން އަންނަ ފަދަ ދެ މައްސަލައެއް ވެސް ހުށަހަޅައިފައިވެއެވެ.

މީގެ އިތުރުން ކުޑަކުދިން އެކަނިވެރިކުރުމާއި، ބްލެކްމެއިލްކުރުމާއި، ސައިބާ ބުލީ އާއި އެކުދިންގެ ބޭނުން ނަހަމަ ގޮތުގައި ހުފުމުގެ މައްސަލަތައް ވެސް މިދިޔަ މަހު އެ ވުޒާރާއަަށް ހުށަހަޅާފައިވާ ކަމަށް އެ ހިސާބުތަކުން ދައްކައެވެ.

މީގެ އިތުރުން މިދިޔަ މަހު ގެވެށި އަނިޔާާގެ 45 ކުއްޖެއްގެ މައްސަލަ އެ ވުޒާރާއަށް ހުށަހަޅާފައިވާއިރު އޭގެ ތެރޭގައި އެންމެ ގިނައީ ޖިސްމާނީ އަނިޔާގެ މައްސަލަތަކެވެ. އެގޮތުން 23 ޖިސްމާނީ އަނިޔާގެ މައްސަލަތައް ހުށަހަޅާފައިވާއިރު، ނަފްސާނީ އަނިޔާގެ ނުވަ މައްސަލައެއް، ޖިންސީ އަނިޔާގެ ހަތަރު މައްސަލައެއްގެ އިތުރުން ރެޕް އާއި ތަކެއްޗަށް އަނިޔާ ދިނުން ފަދަ ގިނަ މައްސަލަތަކެއް އެ ވުޒާރާއަށް ހުށަހަޅައިފައިވެއެވެ.

އެ ހިސާބުތަކުން ދައްކާ ގޮތުން މި ވަގުތު ސަރުކާރުގެ ބެލުމުގެ ދަށުގައި 156 ކުއްޖަކު ތިބިއިރު އޭގެ ތެރެއިން 83 ކުއްޖަކީ ފިރިހެން ކުދީންނަށްވާއިރު ބާކީ ތިބި 73 ކުދީންނަކީ އަންހެން ކުދީންނެވެ. އެ ކުދިންގެ ތެރޭގައި މި މަހު އަށް ކުއްޖަކު ސަރުކާރުގެ ބެލުމުގެ ދަށަށް ގެނައިރު، އެއް ކުއްޖަކު ވަނީ ފޮސްޓާ އާއިލާއަކާއި ހަވާލުކޮށްފައެވެ.