ބިންހިއްކުން ހުއްޓާލަން އެންގުމުން އެކަން ކުރިއަށް ގެންދާ ނަމަ، ފިޔަވަޅު އަޅާނަން: ޠާރިގު

ގާ ހުދުވުމުގެ މައްސަލަާގައި ބިން ހިއްކުމުގެ މަޝްރޫއުތައް ހުއްޓާލަން އަންގާފައިވީ ނަމަވެސް، އެކަން ބައެއް ފަރާތްތަކުން ކުރިއަށް ގެންދާ ކަމަށާ، އެފަރާތްތަކަށް ނަސޭހަތް ދިނުމުން އެކަން ނުހުއްޓާ ނަމަ ފިޔަވަޅު އަޅުއްވާނެ ކަމަށް އެންވަޔަމަންޓް މިނިސްޓަރ ޠާރިގު އިބްރާހިމް ވިދާޅުވެއްޖެއެވެ.

ފަރުތަކަށް ކުރާ ނޭދެވޭ އަސަރު ކުޑަކުރުމުގެ ގޮތުން މެއި މަހުގެ މަހުގެ 9 ވަނަ ދުވަހުން ފެށިގެން ޖޫން މަހުގެ 10 ވަނަ ދުވަހުގެ ނިޔަލަށް ފިޔަވަޅުތަކެއް އެޅުމަށް ނިންމާ އެކަން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)ން ވަނީ އިއުލާނުކޮށްފައެވެ.

އެގޮތުން ރާއްޖޭގައި ފުޅާ ދާއިރާއެއްގައި ކުރެވުމުންދާ ފަޅު ފުންކުރުމާއި ބިން ހިއްކުމުގެ މަސައްކަތްތަކާއި، ބީޗް ނަރިޝްމަންޓް މަސައްކަތްތަކަކީ، މި މަސައްކަތްތަކުގެ ސަބަބުން ފަރުތަކުގެ މާހައުލަށް ނޭދެވޭ އަސަރުތަކެއް ކުރަމުންދާ ކަންކަންކަމަށްވާތީ އެކަންކަން ހުއްޓާލަން އޮތީ އަންގާފައެވެ.

އެހެންނަމަވެސް، ބައެއް ފަރާތްތަކުން އެކަން އަދިވެސް ކުރިއަށް ގެންދާތީ، އެފަރާތްތަކަށް ފިޔަވަޅު އެޅުމަށް ސަރުކާރުގެ ވިސްނުމެއް ހުރިތޯ މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ޠާރިގު ވިދާޅުވީ، ބިން ހިއްކުމުގެ މަޝްރޫއު ތެރޭގައި ވަރަށް ގިނަ ކަންކަން ހިމެނޭ ކަމަށެވެ. އެގޮތުން ބިން ހިއްކައި ނިމިގެން ރިވެޓް ޖެހުމުގެ މަސައްކަތް ކުރާ ތަންތަނުގައި، އޭގެ ސަބަބުން އިތުރު ގެއްލުމެއް ނުވާ ނަމަ، ރިވެޓް ޖެހުމުގެ މަސައްކަތް ކުރިއަށް ގެންދަން ފުރުސަތު ދެމުންދާ ކަމަށް ޠާރިގު ވިދާޅުވުއެވެ.

ބިން ހިއްކުމުގެ މަސައްކަތް ހުއްޓަލުމަށް އެންގުމުން ބައެއް ފަރާތްތަކުން އެކަން ކުރިއަށްވެސް ގެންދިޔަ، ބައެއް ފަރާތްތަކުން އެކަން ހުއްޓާވެސްލި. އަޅުގަނޑުމެން މިހާރުވެސް މިދަނީ ހުއްދައެއް ނެތި އެކަންކަން ނުކުރުމަށް ނަސޭހަތްތެރިވަމުން. އަޅުގަނޑުމެން މިދަނީ އެޑްވައިސް ކުރަމުން އެހެން އެކަން ނުކުރަން، އަދި ފިއުޗަރ ގައި އަޅުގަނޑުމެން އެޑްވައިސް ކޮށްފައި އެހެން އެކަން ކުރާ ނަމަ، ފިޔަވަޅު އެޅުމުގެ ފުރުސަތު އެބައޮތް. އެހެން ނަމަވެސް މިވަގުތު އަޅުގަނޑުމެން މިދަނީ އެޑްވައިސް ކުރަމުން

ޠާރިގު އިބްރާހިމް

ތާރިގު ވިދާޅުވީ، ގާ ހުދުވުމަކީ ގުދުރަތީ ގޮތުން ހިނގާ ކަމަކަށް ވުމުން ސަރުކާރުން އެކަމަށް ބާރު ނުފޯރުވޭނެ ކަމަށެވެ. އަދި މަޝްރޫއުތައް މަޑު ޖައްސާލީ ގާ ހުދުވުމުގެ މައްސަލަ އިތުރަށް ބޮޑު ވިޔަ ނުދިނުމަށް ކަމަށާ، ނަމަވެސް މިހާރު ގާ ހުދުވުމުގެ މަރުހަލާ ނިމުމާއި ގާތަށް އަންނަ ކަމަށްވެސް ވަޒީރު ވިދާޅުވިއެވެ.