އުފާފާގަތި މުސްތަޤުބަލެއް ލިބޭނީ ވަތަނުގެ ކުރިއެރުމާއި މަސްލަހަތަށް އިސްކަންދީގެން: ރައީސް

އުފާފާގަތި މުސްތަގްބަލެއް ލިބޭނީ ވަތަނުގެ ކުރިއެރުމާއި، މަސްލަހަތަށް އިސްކަން ދީގެންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިއަދު ފާހަގަކުރަމުންދާ ނަސްރުގެ ދުވަހުގެ މުނާސަބަތުގައި ރައީސް ޑރ.މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ 1988 ވަނަ އަހަރުގެ ނޮވެންބަރު 3 ގައި މި ޤައުމު ދިފާޢުކޮށްދިން ހިތްވަރުގަދަ ދަރީން ސާބިތުކޮށްދިނީ، އަލިރަސްގެފާނާއި ބޮޑުތަކުރުފާނާއި ދޮންބަންޑާރައިން ފަދައިން، މި ޤައުމުގެ ސިޔާދަތާއި މިނިވަންކަން އިސްކޮށް، ޤައުމު ގޮވައިލި ކޮންމެ ވަގުތަކު ހިތާއި ރޫޙުން އިޖާބަދޭން ތިބި ފަހުލަވާނުން މި ފަސްގަނޑުގައި އަބަދުމެ ތިބޭނެކަން ކަމަށެވެ.

ރައީސް ވިދާޅުވީ މާދަމާގެ އުފާފާގަތިކަމަށް ދިވެހީންކުރާ އުންމީދުތަކުގައި ކުލަ ޖައްސައިދޭނީ، ކޮންމެ ދާއިރާއަކުންވެސް ވަޠަނުގެ ކުރިއެރުމާއި މަޞްލަޙަތަށް އިސްކަންދީ، މުރާލިކަމާއެކު ޚިދުމަތް ކުރާނޭ އިޚްލާޞްތެރީންކަމަށެވެ.

އަދި މިފަދަ އަގުހުރި ދަރީން މި ޤައުމުގައި ގިނަކޮށްދެއްވުން އެދި ހެޔޮ ދުޢާކުރަމުން، ނަޞްރުގެ ދުވަހުގެ ތަހުނިޔާއާއި ހެޔޮއެދުންތައް ފޮނުއްވާފައެވެ.

ދިވެހިން ނަސްރުގެ ދުވަހުގެ ގޮތުގައި ކޮންމެ އަހަރެއްގެވެސް ނޮވެމްބަރުމަހުގެ 3 ވަނަ ދުވަސް ފާހަގަކުރަނީ ދިވެހިންގެ ބަޔަކު ސްރީލަންކާގެ ތަމަޅައިންގެ ޓެރަރިސްތް ހަނގުރާމަވެރިންގެ ޖަމާއަތުގެ ބަޔަކު ގޮވައިގެން މާލެ އަރައި ވެރިކަން ބަދަލުކުރަން ކުރި މަސައްކަތުން ދިވެހިންނަށް ކާމިޔާބީ ލިބުނު ދުވަހެއްގެ ގޮތުގައެވެ. އެދުވަހު އެމީހުން މާލެ އަރައި ދިވެހިންތަކެއް ޝަހީދުކޮށްލި ނަމަވެސް، އެންމެ ވަގުތަކަށްވެސް ރާއްޖޭގެ ސިޔާދަތު އެމީހުންގެ އަތްދަށަށް ގޮސްފައިނުވާކަން ފާހަގަކޮށްލެވެއެވެ.