ޣައްޒާ މިނިވަންކުރުމަށް ފްލޮޓީލާ މޫވްމަންޓްގެ ހަރަކާތްތައް ރާއްޖޭގައިވެސް ކުރިއަށް

ޣައްޒާ ހިސާރުކޮށްފައި އޮންނައޮތުން ނިމުމަކަށް ގެނައުމަށް މަސައްކަތްކުރަމުން އަންނަ ފްލޮޓީނާ މޫވްމަންޓްގެ ހަރާކާތްތައް ރާއްޖޭގައި ފަށައިފިއެވެ.

ފްލޮޓީނާ މޫވްމަންޓަކީ ޣައްޒާ މިނިވަންކުރުމުގެ ގޮތުން ބައިނަލްއަޤްވާމީ އެކްޓިވްސްޓުންތަކެއް ހިމެނޭ ގޮތަށް ކުރިއަށްގެންދާ މޫވްމަންޓެކެވެ. ފްލޮޓީނާ މޫވްމަންޓްގައި ރާއްޖޭގެ ފަރާތުން ތަމްސީލްކުރަނީ، ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް މަސައްކަތްކުރާ އިންޓަރނޭޝަނަލް އެއިޑް ކެމްޕެއިން އައިއޭސީންނެވެ.

ފްލޮޓީނާ މޫވްމަންޓްގެ ވަރލްޑް އެކްޝަންޑޭ މިހިނގާ އޮގަސްޓްމަހުގެ 9 ވަނަ ދުވަހު ފަށާފައިވާއިރު، ދުނިޔޭގެ ހުރިހާ ކަންކޮޅުތަކުންހެން ވަނީ މި ހަރަކާތާ ގުޅިފައެވެ. މި ހަރަކާތުގެ ބައިވެރިންގެ އަޒުމަކީ ފަލަސްތީނު މިނިވަންކޮށްފައި ނޫނީ ހަރަކާތްތައް ހުއްޓައި ނުލުންކަމަށް އައިއޭސީން ބުނެއެވެ.

ފަލަސްތީނުގެ މިނިވަންކަމަށް ގޮވާލާ ރާއްޖޭގައި ވަރަށްބޮޑު އެއްވުމެއް ބޭއްވުމުގެ މަސައްކަތް ކުރިއަށްދާއިރު، ޑައިވަރުންތަކެއް ވަނީ މޫދު އަޑިއަށްގޮސް ޣައްޒާ އަދި ފްލޮޓިލާގެ ދިދަ ވިހުރުވާލައި ރާއްޖެ ތަމްސީލުކޮށް ބައިވެރިވުން ދައްކުވައިދީފައެވެ.

ފްލޮޓީލާ މޫވްމަންޓުގައި ބައިވެރިވުމަށް މިހާތަނަށް 6،000 ހަށްވުރެ ގިނަ މީހުން ރަޖިސްޓްރީކޮށްފައިވާއިރު، މީގެ ތެރޭގައި ދުނިޔޭގެ އެކި ކަންކޮޅުތަކުގައި ދިރިއުޅެމުންދާ ފަރާތްތައް ހިމެނޭކަން ފާހަގަކޮށްލެވެއެވެ.

ފަލަސްތީނަށް އެހީވުމުގެ ގޮތުން ކުރިއަށްގެންދާ އެހީގެ ހަރަކާތުގައި ޣައްޒާއަށް އެހީގެ ސާމާނު ވެއްދުމުގައި ބައިނަލްއަޤްވާމީ ފަރާތްތަކާއެކު އައިއޭސީން ގެންދަނީ ފާހަގަކޮށްލެވޭ މަސައްކަތްތަކެއް ކުރަމުންނެވެ.