ކުރީގެ ނުފޫޒުގަދަ ސިޔާސީ ޝަހުސިއްޔަތު އަދި ވިޔަފާރިވެރިޔާ ކުވާ މޮހޮދޭ ނިޔާވެއްޖެ

ކުރީގެ ސިޔާސީ ޝަހްސިއްޔަތު އަދި ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) ނިޔާވެއްޖެއެވެ.

ކުވާ މޮހޮދޭ ނިޔާވެފައިވަނީ މިއަދުގެ ވަގުތެއްގައެވެ. އޭނާ ނިޔާވެފައިވަނީ ޤައުމީ ހޮސްޕިޓަލް، އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށެވެ.

ކުވާ މޮހޮދޭއަކީ ކުރީގެ ރައީސް ނާސިރުގެ ދުވަސްވަރު ރާއްޖޭގެ ސިޔާސީ މައިދާނުގައި ފާހަގަކޮށްލެވުނު ވަރުގަދަ ޝަހުސިއްޔަތެކެވެ. މީގެ އިތުރުން އޭނާ އަކީ 1970 ގެ އަހަރުތަކުގައި ރާއްޖޭގެ އިގްތިސާދުގައި އެންމެބޮޑަށް ނަގާކިޔާ އަދި އެންމެ ނުފޫޒުގަދަ ވިޔަފާރިވެރިންގެ ތެރޭގައި ހިމެނުނު ބޭފުޅާއެވެ.

ކުވާ މޮހޮދޭއަކީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ މަރްޔަމް މާރިޔާގެ ބައްޕާފުޅުވެސް މެއެވެ.

ކުވ މޮހޮދޭގެ ވަކިވެ ދިއުމާ ގުޅޭގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު، އެކްސްގައި ކުރެއްވި ޕޯސްޓެއްގައި ވިދާޅުވީ، މުޙައްމަދު ޔޫސުފް (ކުވާ މޮހޮދޭ) އަކީ، ވިޔަފާރީގެ ދާއިރާއިން ބޮޑެތި ޚިދުމަތްތަކެއް ޤައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވާފައިވާ އިޙްސާންތެރިއެއް ކަމަށެވެ. އަދި ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެއްގެ އިތުރުން ޚިދުމަތްތެރި ދަރީންތަކެއްގެ ބައްޕައެއް ކަމަށެވެ.

ކުވާ މޮހޮދޭގެ ދަރިކަލުން، ކަސްޓަމްސްގެ ކުރީގެ ކޮމިޝަނަރ ޖެނެރަލް ޔޫސުފް މާނިއު އެކްސްގައި ކުރެއްވި ޕޯސްޓްގައި ވިދާޅުވެފައިވަނީ، ބައްޕަގެ މައްޗަށް ކުރާ ކަށުނަމާދު އޮންނާނީ މިރޭގެ އިޝާ ނަމާދަށްފަހު، އިސްލާމީ މަރުކަޒުގައި ކަމަށެވެ.

ރާއްޖޭގެ ޓޫރިޒަމާއި، ޝިޕިން ވިޔަފާރިއާއި، އަދި ފެލިވަރު މަސްކާރުހާނާ ވުޖޫދަށް އައުމުގައި ކުވާ މޮހޮދޭގެ ބައިވެރިވުން ބޮޑުކަމަށް އޭރުގެ ބޭފުޅުން ފާހަގަކުރައްވައެވެ.