މާލޭގައި ރީޓެއިލް ފިހާރަތަކެއް ހިންގަމުންއައި ބިދޭސީއަކާއި އެކު އިތުރު 4 ބިދޭސީން ހައްޔަރުކޮށްފި

މާލޭގައި އެކިއެކި ކުދި ރީޓެއިލް ފިހާރަތަކެއް ފުޅާދާއިރާއެއްގައި ހިންގަމުން ހިންގަމުންއައި ބިދޭސީއަކާއި އެ ސައިޓުގައި ގަވާއިދާއި ޚިލާފަށް މަސައްކަތްކުރަމުންދިޔަ 4 ބިދޭސީން މޯލްޑިވްސް އިމިގްރޭޝަނުން ހައްޔަރުކޮށްފިއެވެ.

އިމިގްރޭޝަނުން ބުނީ، ގަވާއިދާ ހިލާފަށް ވިޔަފާރި ކުރަމުންދާ ބިދޭސީން ހޯދުމަށް ކުރިއަށްދާ އޮޕަރޭޝަންގެ ތެރެއިން، މާލޭގައި އެކިއެކި ކުދި ރީޓެއިލް ފިހާރަތައް ފުޅާދާއިރާއެއްގައި ހިންގަމުންދާ ކަމަށް އިމިގްރޭޝަން އިންޓެލިޖެންސަށް މަޢުލޫމާތު ލިބިފައިވާ ބިދޭސީއެއް ހޯދުމަށް ރޭ 23:30 އާއި 00:30 ދެމެދު ހާއްސަ އޮޕަރޭޝަނެއް ހިންގާފައިވާ ކަމަށެވެ.

މި އޮޕަރޭޝަންގެ ތެރެއިން މި ބިދޭސީ މީހާ އާއި އެކު އެ ސައިޓުގައި ގަވާއިދާ ހިލާފަށް މަސައްކަތް ކުރަމުންދިއަ ބިދޭސީ 03 ފިރިހެނަކާއި، އަންހެނަކު ވެސް އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށް އެއިދާރާއިން މައުލޫމާތުދެއެވެ.

ގަވައިދާ ހިލާފަށް ވިޔަފާރި ކުރާ ބިދޭސީން ހޯދުމަށް އިމިގްރޭޝަނާއި، ފުލުހުން ގުޅިގެން ހިންގާ އޮޕަރޭޝަނުގެ ތެރެއިން، އިއްޔެ ވެސް ގަވާއިދާ ހިލާފަށް ވިޔަފާރި ކުރަމުންދިޔަ 6 ބިދޭސީން ވަނީ ހައްޔަރުކޮށްފައެވެ.

ހަމައެއާއިއެކު، މި އޮޕަރޭޝަނުގެ ތެރެއިން ގަވާއިދާއި ހިލާފަށް ޑޮލަރުގެ ވިަޔފާރި ކުރާ 2 ބިދޭސީ އަކާއި ގަވާއިދާ ޚިލާފަށް ޓޭކްއަވޭ ކޮފީޝޮޕް ހިންގަމުންދިޔަކަމަށް ތުހުމަތުކުރެވޭ 8 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރަން އިމިގްރޭޝަނުން އިސްނަގައިގެން ކުރިއަށް ގެންދާ އޮޕަރޭޝަންގެ ތެރެއިން މިހާތަނަށް 1،800 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ. އޭގެ އިތުރުން ވެސް 100 އަށްވުރެ ގިނަ މީހުން މި ފަހުން ވެސް ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.