އެޗްޑީސީއާ މަންފާގެ އީދު ހަވީރު ވަރަށް ކާމިޔާބު، ކުޑަކުދީންނަށް ބޮޑު އުފަލެއް

ފިޠުރު ޢީދު ފާހަގަ ކުރުމުގެ ގޮތުން މަންފާ އަދި އެޗްޑީސީ ގުޅިގެން ހުޅުމާލޭ ސެންޓްރަލް ޕާކުގައި އިއްޔެ ހަވީރު ބޭއްވި ޢީދު ފެސްޓިވަލް ކާމިޔާބު ކަމާއެކު ބާއްވައިފި އެވެ.

މި ފެސިޓިވަލަށް އެތައް ހާސް ބަޔަކު ހާޒިރުވި އެވެ. ފެސްޓިވަލް ކުރިއަށް ގެންދިޔައީ ކުޑަކުދިންނާ ގުޅޭ އަދި އެ ކުދީން ޝައުގުވެރިވާނެ ވަރަށް ގިނަ ހަރަކާތްތަކާ އެކު އެވެ.

އެގޮތުން ފޭސްޕެއިންޓިން އާއި ރިންގްޓޮސް އާއި ޖަމްޕް އެންޑް ޕްލޭ އާއި ރޭސިން ކާސް ޑެމޯ އާއި ޕޮލިސްކިޑްސް ޝޯގެ އިތުރުން ހީނާ، އެރޭންޖިން ކަލާ ބޯލްސް އަދި މޭކިންގް އީދު ކާޑްސްއާަ ހޮޕިންގް ފަދަ ކުޅިވަރު ހަރަކާތްތައް އޮތެވެ.

އެންމެ ފާހަގަކޮށްލެވޭ ހަރާކަތަަށް އޮތީ މަޝްހޫރު ހުށައެޅުންތެރިޔާ އިބްރާހީމް ރަމީޒު (ރަމީޒުބެއާއެކު) އޮތް ކުޑަކުދިންގެ ހާއްސަ ސްޓޭޖް ހަރަކާތެވެ.

ކުޑަކުދީންގެ ވަރަށް ބޮޑު ބައިވެރިވުމަކާ ޝައުގުވެރި ކަމެއް އެ ހަރަކާތަށް އޮތެވެ.

އިއްޔެ އޮތް ހަރަކާތާއި ގުޅޭގޮތުން މަންފާގެ ރައީސް ޢަލީ ރަމީޒު ވިދާޅުވީ އިއްޔެގެ އިވެންޓް ވަރަށް ކާމިޔާބު ކަމަށެވެ.

“އަލްޙަމްދުލިއްލާ. ފިޠުރު ޢީދުގެ އިވެންޓު މިހާ ކާމިޔާބު ވާނެކަމަށް ކުރިން ލަފައެއް ނުކުރަން. ހީކުރި ވަރަށްވުރެ މާބޮޑަށްވެސް ކާމިޔާބު އިވެންޓަކަށް މި އިވެންޓު ވެގެންދިޔައީ. އެތަނަށް ދާ ކުދިންނަށް ބެހުމަށްޓަކައި އަޅުގަނޑުމެން ހެދި ހާހަކަށް ވުރެ ގިނަ ހަދިޔާވެސް މާބޮޑަށް މަދުވެގެންދިޔައީ ހާޒިރުވި ކުދިން ގިނަވުމުގެ ސަބަބުން. މަންފާ އަދި އެޗް.ޑީ.ސީގުޅިގެން ބޭއްވި ޢީދުފެސްޓިވަލްގައި ބައިވެރިވި އެންމެހާ ފަރާތްތަކަށް ވަރަށްބޮޑަށް ޝުކުރު ދަންނަވަން. އޭގެތެރޭގައި މޯލްޑިވްސް ޕޮލިސް ސާވިސް، މޯލްޑިވްސް ގާލްގައިޑް އެސޯސިއޭޝަން، ޑްރިފްޓް އެސޯސިއޭޝަން، އުކުޅަސްހޯޕް، ޚިދުމަތް ޖަމިއްޔާ އަށް ޝުކުރު ދަންނަވަން،” އަލީ ރަމީޒު ވިދާޅުވި އެވެ.