އަހަރުގެ ފުރަތަަމަ 9 ދުވަހު ރާއްޖެ އައި ފަތުރުވެރިންގެ އަދަދު ބައިލައްކައަށް!

މިއަހަރުގެ ފުރަތަމަ 9 ދުވަސް ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ބައި ލައްކައަށްވުރެ މަތިވެއްޖެއެވެ.

ފަތުރުވެރިކަމާ ބެހޭ ވުޒާރާއިން އާންމުކުރި ތަފާސްހިސާބުތައް ދައްކާގޮތުން މިއަަހަރު އެވްރެޖްކޮށް ދުވާލަކު 5665 ފަތުރުވެރިން ރާއްޖެއަށް އާދެއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއީ 2023 ވަނަ އަހަރުގެ ފުރަތަމަ 9 ދުވަހާއި އަޅާބަލާއިރު %6.4 އިތުރުވުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވަނީ 47،931 ފަތުރުވެރިންނެވެ. އަދި 2022 ވަނަ އަހަރުގެ މި މުއްދަތުގައި އައިސްފައިވަނީ 43،079 ފަތުރުވެރިންނެވެ.

ނިމުނު 2023 ވަނަ އަހަރަކީ ރާއްޖޭގެ ފަތުރުވެރިކަމުގައި ކާމިޔާބު އަހަރެކެވެ. އެގޮތުން މިދިޔަ އަހަރު ރާއްޖެ ޒިޔާރަތްކުރި 1.8 މިލިޔަން ފަތުރުވެރިންނާއެކު މިދިޔަ އަހަރު ވެގެން ގޮސްފައިވަނީ، މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި އަހަރުގެ ގޮތުގައެވެ.

މިއަހަރުގެ ފުރަތަމަ 9 ދުވަހު ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރާޝިޔާއިންނެވެ. އެއީ 7601 ފަތުރުވެރިންނެވެ. ދެވަނައަށް އެންމެ ގިނަ ފަތުރުވެރިން ޒިޔާރަތްކުރި އިޓަލީން 7204 ފަތުރުވެރިން ރާއްޖެ ޒިޔާރަތްކުރި އިރު 3791 ފަތުރުވެރިންނާއެކު ތިންވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ އިންޑިޔާއިންނެވެ.

މިއަހަރު ގެ ފުރަތަމަ 9 ދުވަހު ރާއްޖެ ޒިޔާރަތްކުރި ފަތުރުވެރިން ޒިޔާރަތްކުރި އިތުރު ޤައުމުތައް:

* އިނގިރޭސިވިލާތް: 3753 ފަތުރުވެރިން

* ޖަރުމަނުވިލާތް: 3178 ފަތުރުވެރިން

* އެމެރިކާ: 1996 ފަތުރުވެރިން

* ޗައިނާ: 1676 ފަތުރުވެރިން

* ފްރާންސް: 1402 ފަތުރުވެރިން

* ކަޒަކިސްތާން: 1332 ފަތުރުވެރިން

* ސައުދީ އަރަބިއްޔާ: 1182 ފަތުރުވެރިން

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ މިމަހުގެ 2 ވަނަ ދުވަހުއެވެ. އެ ދުވަހު ރާއްޖެއަށް 6640 ފަތުރުވެރިންވަނީ ޒިޔާރަތްކޮށްފައެވެ. އަދި އެވްރެޖްކޮށް ރާއްޖެ އަންނަ ފަތުރުވެރިން ރާއްޖޭގައި 8.1 ދުވަހުގެ ޗުއްޓީއެއް ހޭދަކުރެއެވެ.