އިގްތިސާދީ ވަޒީރުދެއްވީ ރޯދައަށް ކާބޯތަކެތީގެ އަގުތައް މައްޗަށް ނުދާނޭކަމުގެ ޔަގީންކަން

މީގެ ކުރީ ދެ އަހަރުގެ ރޯދައެކޭ އެއްގޮތަށް މިއަހަރުގެ ރަމަޟާންމަހުވެސް މާލޭ ބާޒާރުގައި ކާބޯތަކެތީގެ އަގުތައް ބޮޑުވިޔަނުދީ އަޅަންޖެހޭ ފިޔަވަޅުތައް އަޅަމުންގެންދާނޭކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ކާބޯތަކެތީގެ އަގުތައް ރައްޔިތުންނަށް ބުރައަކަށްވެގެން ދިޔަ ނުދިނުމަށްޓަކައި ސަރުކާރުން އަޅަމުންދާ ފިޔަވަޅުތަކާ ގުޅޭގޮތުން ވާހަކަދައްކަވަމުން މިނިސްޓަރު ސައީދު ވިދާޅުވީ، ބާޒާރުގައި ކާބޯތަކެތީގެ އަގުތައް ބޮޑުވިޔަ ނުދިނުމަށްޓަކައި ސަރުކާރުން ފެށުނީއްސުރެ މަސައްކަތްތައް ކުރަމުން އަންނަ ކަމަށެވެ. އެގޮތުން މިދިޔަ ދެ އަހަރުގެ ރަމަޟާންމަސް ފާހަގަކުރެވިގެން ގޮސްފައިވަނީ އެއް އަހަރުގެ ރަމަޟާންމަހަށްވުރެ އަނެއް އަހަރުގެ ރަމަޟާންމަހު ބާޒާރުގެ އަގުތައް ދަށްވެގެންދިޔަ މަހެއްގެ ގޮތުގައިކަން މިނިސްޓަރު ވިދާޅުވިއެވެ. ރަމަޟާންމަސް ކައިރިވަމުން އަންނައިރު، ބާޒާރުގެ އަގުތައް ބޮޑުވިޔަ ނުދިނުމަށް ފިޔަވަޅުތައް އަޅައި ކަންކަން ކުރަމުންގެންދާކަން މިނިސްޓަރު ފާހަގަކުރެއްވިއެވެ.

އެގޮތުން އާއްމުން އެންމެގިނައިން ބޭނުންކުރާ ބާވަތްތައް ބަލައި އެސްޓިއޯ މެދުވެރިކޮށް ރާއްޖެ އެތެރެކޮށް ވިއްކަމުންދާކަން މިނިސްޓަރު ވިދާޅުވިއެވެ. އާއްމުން އެންމެގިނައިން ބޭނުންކުރާ 23 ބާވަތެއްގެ މުދާ އެއީ އަސާސީ ބާވަތްތައްކަމަށް ސަރުކާރުން ކަނޑައަޅައި ރާއްޖެ އެތެރެކޮށް އެސްޓީއޯ މެދުވެރިކޮށް އެތަކެތި ވިއްކަމުންދާއިރު، ބާޒާރުގެ އަގުތަކުން އެކަމުގެ ހެޔޮކަން ފެންނަމުންދާކަން ޑޭޓާތަކުން ދައްކަމުންދާކަން މިނިސްޓަރު ފާހަގަކުރެއްވިއެވެ.

މިހާރު ރައީސް ނިންމަވާފައިވަނީ ތިން ހާހުން މަތީގެ އާބާދީތަކަށް އެސްޓީއޯއިން ވިއްކާ އަސާސީ 23 ބާވަތްތައް ސީދާ ލިބޭނޭކަން ކަށަވަރުކޮށް އަދި ތިންހާހުން ދަށުގެ އާބާދީތަކަށްވެސް އޭޖެންޓުން މެދުވެރިކޮށް އެބާވަތްތައް ޔަގީންކުރުން. އެކަން ކުރުމަށް އެސްޓީއޯ އާއި ޓްރޭޑް ގުޅިގެން މަސައްކަތްތައް ދަނީ ކުރަމުން

އިކޮނޮމިކް މިނިސްޓަރު މުހައްމަދު ސައީދު

ބާޒާރުގެ އަގުތައް ހެޔޮކުރުމަށް ކުރަމުންގެންދާ މަސައްކަތްތަކުގެ ދަށުން ބާޒާރުމަތީ އަތޮޅުފިހާރަތައް ހުރި ދިމާލުގައި އެސްޓީއޯގެ އައުޓްލެޓެއް ގާއިމްކޮށް އަގުހެޔޮކުރި 23 ބާވަތުގެ މުދާ ހޯލްސޭލްކޮށް ވިއްކަމުންދާކަމަށްވެސް މިނިސްޓަރު މިއަދު ވަނީ ވިދާޅުވެފައެވެ. މީގެ އިތުރުން ރަމަޟާންމަސް އަންނައިރު ހުޅުމާލޭގައިވެސް އެސްޓީއޯ މެދުވެރިކޮށް އެ ބާވަތްތައް ހެޔޮއަގުގައި ވިއްކުމުގެ އިންތިޒާމު ހަމަޖައްސަވާނޭކަން މިނިސްޓަރު ސައީދު ވިދާޅުވިއެވެ.