މި ސަރުކާރަށް މަޖިލީހުގެ މެޖޯރިޓީ ލިބިއްޖެނަމަ ފެންނާނީ ވަރަށް ޚުދުމުހުތާރު ބިރުވެރި މަންޒަރުތަކެއް: ރައީސް ޞާލިހު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަށް ރައްޔިތުންގެ މަޖިލީހުގެ މެޖޯރިޓީ ލިބިއްޖެނަމަ ފެންނާނީ ވަރަށް ޚުދުމުހުތާރު ބިރުވެރި މަންޒަރުތަކެއް ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީގެ މަޖިލިސް ކެމްޕޭނުގައި ބ އަތޮޅަށް ވަޑައިގެން އެއަތޮޅު ދަރަވަންދޫގައި ރޭގައި އޮތް ކެމްޕޭން ޖަލްސާއެއްގައި ވާހަކަފުޅު ދައްކަވަމުންނެވެ.

ރައީސް ޞާލިހު ވިދާޅުވީ އެމަނިކުފާނުގެ ސަރުކާރުން މަސައްކަތް ކުރީ އެއްވެސް ތަފާތު ކުރުމެއް ނެތި ކަަމަށެވެ. އެތަނެއްގައި ރައީސް ޞާލިހަށް ތާއީދު ކުރާ މެމްބަރަކު ހުއްޓަސް ނެތަސް، މެޖޯރިޓީ އޮތް ރަށަކަށް ވިޔަސް ނުވިޔަސް، ތަފާތުކަމެއް ނެތި ރައްޔިތުންނަށް ޚިދުމަތް ކޮށްދެއްވި ކަމަށް ރައީސް ޞާލިހު ވިދާޅުވިއެވެ.

އެހެން ނަމަވެސް މިއަދު އެމަންޒަރު ނުފެންނަ ކަމަށް ބުނެ ރައީސް ޞާލިހު ވަނީ މިހާރު ގެ ސަރުކާރަށް ފާޑު ވިދާޅުވެފައެވެ. އަދި މި ސަރުކާރު ހަމަމަގަށް އެޅުވުމަށް ކުރެވެން އޮތް އެންމެ މުހިންމު ކަމަކީ ރައްޔިތުންގެ މަޖިލީހުގެ މެޖޯރިޓީ ހޯދުން ކަމަށާއި، އެހެންނޫންނަމަ ރައީސް ޑރ.މުއިއްޒުގެ ސަރުކާރަށް މެޖޯރިޓީ ލިބުމުން ފެންނާނީ ވަރަށް އަނިޔާވެރި، ޚުދުމުހުތާރު އަދި ބިރުވެރި މަންޒަރުތަކެއް ކަމަށް ރައީސް ޞާލިހު ވިދާޅުވިއެވެ.

"މިއަދު އަޅުގަނޑުމެންނަށް މި ސަރުކާރު ހަމަމަގަށް އެޅުވުމަށް ކުރެވެން އޮތް އެންމެ މުހިންމު ކަމަކީ ރައްޔިތުންގެ މަޖިލީހުގެ މެޖޯރިޓީ ހޯދުން. އެހެންނޫންނަމަ މިހާރު ވެރިކަމުގައި އޮތް ސަރުކާރަށް، ރައީސް ޑރ.މުއިއްޒުގެ ސަރުކާރަށް މަޖިލީހުގެ މެޖޯރިޓީ ލިބިއްޖެ ކަމަށް ވަންޏާ، އަޅުގަނޑުމެންނަށް ފެނިގެންދާނީ ވަރަށް ވަރަށް އަނިޔާވެރި، ޚުދުމުހުތާރު ބިރުވެރި މަންޒަރުތަކެއް. "

ރައީސް ޞާލިހު ވިދާޅުވިއެވެ.

ކުރީގެ ރައީސް ޞާލިހު މިފަދައިން ވިދާޅުވެފައިވާއިރު، ރައީސް ޑރ.މުއިއްޒު ވަނީ މި ސަރުކާރުން ރައްޔިތުންގެ ހެވާ ލާބައަށް ކަންކަން ކުރާނެ ގޮތް ބަޔާންކޮށް މަގުފަހި ކުރާއިރު، އެކަންކަން ބާރު ސްޕީޑުގައި ގެންދެވޭނެ ތަނަކަށް މަޖިލިސް ބަދަލުކޮށްލުމަށް ނިންމާނީ ރައްޔިތުން ކަމަށް ވިދާޅުވެފައެވެ.

މީގެ އިތުރުންވެސް، ރާއްޖޭގައި ހިންގުމަށް ހަމަޖެހިފައިވާ ތަރައްގީގެ މަޝްރޫއުތަކާއި ރާއްޖޭގެ މިނިވަންކަމަށް ކުރިއަށް އޮތް ރައްޔިތުންގެ މަޖިލިސް ވަރަށް މުހިންމުކަމަށް ވިދާޅުވެ، ތެދުވެރިކަމާ އަމާނާތްތެރިކަމާއެކު ރައްޔިތުން އެދޭ ކަންކަން ފުރިހަމަ ކޮށްދެއްވުމަށް ރައްޔިތުންގެ މަޖިލިސް ސަރުކާރަށް ކާމިޔާބު ކޮށްދިނުމުގެ މުހިންމުކަން ރައީސް ޑރ.މުއިއްޒު ވަނީ ފާހަގަކުރައްވާފައެވެ.