ޑްރޯން އާއި ހަވާ ބަލާލުމަށް ރެކޯޑް އަދަދަކަށް މީހުން ހުޅުމާލެއަށް ޖަމާވި!

ފިތުރު ޢީދާ ގުޅުވައިގެން ހުޅުމާލެސިޓީގައި ބޭއްވި ހަރަކާތްތައް ބަލާލުމަށް ރެކޯޑް އަދަދަކަށް މީހުން ރޭ އެ ސިޓީއަށް ޖަމާވެއްޖެއެވެ.

ޢީދު އުފާ ހަރަކާތްތަކުގައި ހިމެނިގެން ރޭ ހުޅުމާލޭގައި ކުރިއަށްގެންގޮސްފައިވަނީ ޑްރޯން އެރުވުމާއި ހަވާއެރުވުމުގެ ހަރަކާތެވެ. މި ހަރަކާތްތައް ބަލާލުމަށް ވަރަށް ގިނަ އަދަދެއްގެ ބަޔަކު ވަނީ ހުޅުމާލެ ސެންޓްރަލް ޕާކް ހިމެނޭ ސަރަހައްދަށް ޖަމާވެފައެވެ. ރޭ ފާހަގަކުރެވުނީ މިހާތަނަށް އެންމެ ގިނަ ބަޔަކު ހުޅުމާލޭ ސެންޓްރަލް ޕާކް ސަރަހަްދަށް ޒިޔާރަތްކުރި ރޭގެ ގޮތުގައެވެ.

ސެންޓްރަލް ޕާކް ހިމެނޭ ސަރަހައްދަށް މީހުން ޖަމާވި އަދަދު ގިނަކަމުން މުޅި އެހިސާބު އޮތީ ތޮއްޖެހިފައެވެ. މުޅި ސަރަހައްދަށް ގިނަ އަދަދަކަށް މީހުން ޖަމާވުމުގެ ސަބަބުން ބަހުގެ ހިދުމަތްވެސް ވަނީ ވަގުތީގޮތުން މެދުކަނޑާލާފައެވެ. ސަބަބަކީ ބަސް ނުދުއްވޭވަރަށް މީހުން މަގުތަކަށް ޖަމާވުމެވެ. ސެންޓްރަލް ޕާކް ހިމެނޭ ސަރަހައްދަށް ބާރުބޮޑުވުމާއެކު، ގިނަ މީހުން އެންމެފަހުން ދިޔައީ އެހިސާބުގައި ހުންނަ ކެފޭތަކާއި ރެސްޓޯރެންޓްތަކަށެވެ.

ހުޅުމާލޭގައި ރޭ ބޭއްވި ހަވާއެރުވުމުގެ ހަރަކާތާއި ޑްރޯން ޝޯއަށް ގިނަ ބައެއްގެ ޝައުގުވެރިކަން ލިބިގެންދިޔައިރު، ޑްރޯން ޝޯގައި ރޭ ވަނީ ތަފާތު މަންޒަރުތައް ދައްކާލާފައެވެ. އެގޮތުން ފަލަސްތީނު ދިދައާއި މަސްވެރިކަމާއި އެނޫންވެސް ދާއިރާތައް ސުފަވާ މަންޒަރު ވަނީ ދައްކާލާފައެވެ. ސޯޝަލް މީޑިއާގައި ގިނަބަޔަކަށް ކަމުގޮސްގެން އެންމެ ރީތި މަންޒަރެއްގެ ގޮތުގައި ފާހަގަކޮށްފައިވަނީ ފަލަސްތީނު ދިދައެވެ.

ހުޅުމާލޭގައި ކުރިއަށްގެންދިޔަ ޑްރޯންޝޯ އާއި ހަވާއެރުވުމުގެ ހަރަކާތް އިންތިޒާމްކުރީ ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން އިސްނަގައިގެންކަން ފާހަގަކޮށްލެވެއެވެ.

ޢީދުހަވީރު 1446ގެ ހަރަކާތްތަކުގައި ހިމެނިގެން މާލެ ސަލްޓަންޕާކް ސަރަހައްދުގައި މިއަދުވެސް ބޭއްވުމަށް ވަނީ ނިންމާފައެވެ. އެމްއެންޑިއެފުން ބުނީ، ރައްޔިތުންގެ ތެރެއިން ގިނަ އަދަދެއްގެ އެދުމުގެ ގޮތުން އީދު އުފާ ކުރިއަށްދާނީ މާރިޗު 31 އަދި އޭޕްރީލް 1 ވަނަ ދުވަހުގެ 16:00 އިން 18:00 އަށް ޖުމުހޫރީ މައިދާން ސަރަހައްދުގައި ކަމަށެވެ.