އުއްތަމަ ފަނޑިޔާރުގެ މައްސަލައެއް ޖޭއެސްސީން ބަލަންފަށައިފި

އުއްތަމަ ފަނޑިޔާރު ޑރ އަހުމަދު އަބްދުﷲ ދީދީގެ ސުލޫކީ މައްސަލައެއް ބެލުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފިއެވެ.

މިކަން ހާމަކުރައްވާފައިވަނީ ޖޭއެސްސީ ނެރުނު ބަޔާނެއްގައިއެވެ.

ބަޔާނުގައި ބުނެފައިވާގޮތުގައި ޖޭއެސްސީގެ ގާނޫނަށް ގެނެވުނު އިސްލާހުގެ ދަށުން ޑީޖޭއޭއިން ނެރެފައިވާ ގަވާއިދުތަކާއި، އުސޫލްތަކަށް އަމަލު ނުކުރުމަށް ސުޕްރީމް ކޯޓޫގެ ސެކްޓްރީ ޖެނެރަލްއަށް އަންގައި އޭނާގެ މަސައްކަތަށް ހުރަސް އަޅުއްވައި، ޑީޖޭއޭއާއި އެއްވެސް މުއާމަލާތެއް ނުކުރުމަށާއި، ޑީޖޭއޭއާއި ސުޕްރީމް ކޯޓުގެ ސެކްޓްރީ ޖެނެރަލް ގުޅިވަޑައިގެން ބަޢާވާތެއް ގެންނަން އުޅޭ ކަމުގެ އިންޒާރު އުއްތަމަ ފަނޑިޔާރު ޑރ އަހުމަދު އަބްދުﷲ ދީދީ ދެއްވާފައިވާ ކަމަށެވެ.

މީގެ އިތުރުން ސުޕްރީމްކޯޓުގެ ސެކްޓްރީ ޖެނެރަލްއަށް އިންޒާރު ދެއްވައި ވަޒީފާއިން ވަކިކުރައްވާނެ ކަމަށް ވިދާޅުވެ ބިރު ދެއްކެވި ކަމަށް ބުނާ މައްސަލައެއްގެ ވާހަކަވެސް މިބަޔާނުގައި ވަނީ ހާމަކުރައްވާފައެވެ.

އެގޮތުން ޑޭޖޭއާއި އެއްވެސް މުއާމަލާތެއްކޮށް ޑީޖޭއޭއިން އަންގާ އެންގުންތަކާއި އެއްގޮތަށް އަމަލު ކޮށްފިނަމަ ވަޒީފާއިން ވަކިކުރާނެ ކަމުގެ އިންޒާރު އުއްތަމަ ފަނޑިޔާރު ޑރ އަހުމަދު ދެއްވާފައިވާ ކަމަށް ބުނާ މައްސަލަ އުއްތަމަ ފަނޑިޔާރުގެ ސުލޫކީ މައްސަލައެއްގެ ގޮތުގައި ބެލުމަށް ޖޭއެސްސީން ނިންމާފައިވާ ކަމަށް ޖޭއެސްސީގެ ބަޔާނުގައި ވަނީ ބުނެފައެވެ.

ޖޭއެސްސީގެ ބަޔާނުގެ ކުރިން ނެރެފައިވާ އުއްތަމަ ފަނޑިޔާރުގެ ކުއްލި ބަޔާން

އުއްތަމަ ފަނޑިޔާރުގެ މައްސަލަ މިފަދައިން ބެލުމަށް ނިންމާފައިވާ އިރު އިއްޔެގެ ވަގުތެއްގައި އުއްތަމަ ފަނޑިޔާރުވަނީ ބަޔާނެއް ނެރުއްވާފައެވެ.

މިބަޔާނުގައި ދިވެހިރާއްޖޭގެ ގާނޫނުއަސާސީއާއި ގާނޫނުތައް ނެގެހެއްޓުމުގެ މަސްއޫލިއްޔަތު ކޯޓުތަކުން އަދާކުރާނެކަމުގެ ޔަގީންކަން އަރުވާކަމަށް އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވަނީ ވިދާޅުވެފައެވެ.

އުއްތަމަ ފަނޑިޔާރު ވިދާާޅުވީ އެއްވެސް ފަރާތަކުން ދައްކާ ބިރަކަށް ޖެހިލުންނުވެ މިނިވަންކަމާއި މުސްތަގިއްލުކަމާއި އެކު މިނިވަން ފަނޑިޔާރުގެއެއްގެ ހިޔާވަހިކަން އެއްވެސް ދިވެހި ރައްޔިތަކަށް ތަފާތު ކުރުމެއް ނެތި ފޯރު ކޮށްދޭނެކަމަށެވެ.

އަދި ޤާނޫނުއަސާސީ އާއި ޤާނޫނުތައް ނެގެހެއްޓުމުގެ މަސްއޫލިއްޔަތު ދިވެހިރާއްޖޭގެ ކޯޓުތަކުން އަދާކުރަމުން ގެންދާނެ ކަމުގެ ފުރިހަމަ ޔަގީންކަން ދިވެހި އެންމެހައި ލޮބުވެތި ރައްޔިތުންނަށް އަރުވާކަމަށްވެސް ޑރ.އަހުމަދު އަބްދުﷲ ދީދީ ވިދާޅުވިއެވެ.

އެބަޔާނުގައި ބުނެފައިވާ ގޮތުގައި ޝަރީއަތް ގާއިމުކުރުމާއި އަދުލު އިންސާފު ގާއިމުކުރުމުގެ އެންމެހައި ކަންކަމާ ގުޅޭގޮތުން ސިޔާސަތު ކަނޑައަޅައި ހިންގުމާއި، އެ ސިޔާސަތުތައް ހިންގުމަށް އެކަށައި އަޅާ ގާއިމުކުރަންޖެހޭ ނިޒާމުތައް ގާއިމުކުރުމާއި، އެ ނިޒާމުތައް ހެޔޮ ގޮތުގައި ހިންގުމުގެ ހުރިހައި ކަމަކީ ފަނޑިޔާރުގޭގެ ބާރުތަކުގެ ތެރޭގައި ހިމެނޭ ކަންތައްތަކެއް ކަމަށް ގާނޫނުއަސާސީގައި ކަނޑައަޅާފައިވެއެވެ.

ނަމަވެސް ސުޕްރީމް ކޯޓުގެ އިދާރީ ނިޒާމު ވެސް އުއްތަމަ ފަނޑިޔާރާއި ފަނޑިޔާރުންގެ އެއްވެސް ބާރެއް ނުހިނގާ ނިޒާމަކަށް ބަދަލުކޮށް ކޯޓުގެ ދުސްތޫރީ އަދި ގާނޫނީ ޒިންމާ އާއި މަސްއޫލިއްޔަތު އަދާކުރުމަށް ހުރަސް އަޅައި ދިވެހި ދައުލަތުގެ ތިން ބާރުގެ ތެރެއިން އެއް އަދުލު އިންސާފު ގާއިމު ކުރުމުގެ ބާރު ޕެރެލައިޒް ކުރުމަށް މަސައްކަތް ކުރަމުންދާކަން ވަނީ ފާހަގަކުރެވިފައިވާކަމަށް އެމަނިކުފާނު ވިދާޅުވިއެވެ.

އުއްތަަމަ ފަނޑިޔާރު ވިދާޅުވީ ޑީޖޭއޭއިން ކޯޓުތަކުގެ އެތެރޭގެ އިދާރީ ކަންކަމާއި އިދާރީ ނިޒާމުގެ ތެރެއަށް އަތް ބާނައި ކޯޓުތަކުގެ އިސް ފަނޑިޔާރުންނާއި ފަނޑިޔާރުންގެ މަޖިލީހުގެ ބާރު ކަނޑުވާލައި، ކޯޓުތަކުގެ އިދާރީ ހިންގުމުގެ އެންމެހައި ކަންކަން އެ ޑިޕާޓްމަންޓުގެ ދަށަށް ގެންދަން މަސައްކަތްކުރާކަމުގެ ޝަކުވާ ލިބެމުން އަންނަ ކަމަށެވެ.