އައިސް ނުލިބުމުގެ މައްސަލަ މި ދައުރުގެތެރޭގައި ހައްލު ކުރާނަަން: ޝިޔާމް

މަސްވެރީންނަށް ބޭނުންވާ މިންވަރަށް އައިސް ނުލިބުމުގެ މައްސަލައަށް މި ދައުރުގެތެރޭގައި ދާއިމީ ހައްލެއް ހޯއްދާނެ ކަމަށް ފިޝަރީޒް މިނިސްޓަރު އަހްމަދު ޝިޔާމް މިރޭ ވިދާޅުވެއްޖެ އެވެ.

ވުޒާރާތަކުގެ މަސައްކަތްތަކާއި ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ފުރުސަތު ފަހިކުރަން ކުރިއަށް ގެންދާ "އަހާ" ފޯރަމްގައި މިނިސްޓަރު ޝިޔާމް ވިދާޅުވީ މިިދިޔަ ސަރުކާރުން ފެނަކައާ ހިންގަން ހަވާލުކުރި 17 އައިސް ޕްލާންޓް ގެ ތެރެއިން ގިނަ ޕްލާންޓްތަކުގެ މަސައްކަތް ހުރީ ހުއްޓިފައި ކަމަށެވެ.

އެހެން ކަމުން އެ މަސައްކަތް އަލުން މިފްކޯގެ ދަށަށް ގެނެސް އޮޕަރޭޝަން ފެށުމަށް ގިނަ މަސައްކަތްތަކަކާއި ބޮޑު ހޭދައެއް ކުރަން ޖެހުނުކަން މިނިސްޓަރު ފާހަގަ ކުރެއްވި އެވެ.

"މިފްކޯގެ ބެލުމުގެ ދަށުގައި ހުރި 26 އައިސް ޕްލާންޓުގެ ތެރެއިން މިހާރު އޮޕަރޭޝަނުން ބޭރުގައި ހުރީ ތިން ޕްލާންޓު،" މިނިސްޓަރު ވިދާޅުވިއެވެ.

ޝިޔާމް ވިދާޅުވީ އަމާޒަކީ އައިސް ނުލިބުމުގެ މައްސަލަ މި ދައުރުގެތެރޭގައި ހައްލު ކުުރުން ކަމަށެވެ. އެ އަމާޒަށް ވާސިލުވުމަށް ރޭވުންތެރިކަމާ އެކު މަސައްކަތް ކުރަމުންދާ ކަމަށް ވިދާޅުވި އެވެ.

އަދި ވިދާޅުވީ މިހާރު އޮޕަރޭޝަނުން ބޭރުގައި ހުރި ތިން އައިސްޕްލާންޓް ވަރަށް އަވަހަށް އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. އަދި އިތުރު ފަސް އައިސް ޕްލާންޓް ގާއިމު ކުުރުމުގެ މަސައްކަތް ރޭވިފައިވާ ކަމަށް ވިދާޅުވި އެވެ. މިހާރު ކުރިއަށް ދަނީ ޓެންޑާކުރެވި ބީލަންތައް ބަލައިގަނެ ބީލަން އިވެލުއޭޓުކުރުމުގެ މަރުހަލާ ކަމަށް ވިދާޅުވި އެވެ.

"އައިހަށް މި ޖެހޭޖެހުން އިރާދަކުރެއްވިއްޔާ މި ފަސް އަހަރުގެ ތެރޭގައި އަޅުގަނޑުމެން އެއްކޮށް ނިމުމަކަށް ގެންނާނަން," ޝިޔާމް ވިދާޅުވި އެވެ.

ސަރުކާރުގެ އަމާޒަކީ މިހާރު އައިސް އުފެއްދޭ މިންވަރުގެ ތެރެއަށް 700 ޓަނުގެ އައިސް އުފެއްދުމުގެ ގާބިލުކަން އިތުރުކުރުން ކަމަށް ވެސް މިނިސްޓަރު ވިދާޅުވި އެވެ.