ބެލެނިވެރިކަމުގެ ހުނަރުތައް ދަސްކޮށްދީގެން، މައިންބަފައިންނާއި ކުދިންގެ ގުޅުން ބަދަހިކުރެވި، އުފާވެރި އާއިލާތަކެއް ބިނާކުރެވިދާނެ: ވަޒީރު

ބެލެނިވެރިކަމުގެ ހުނަރުތައް ދަސްކޮށްދީގެން، މައިންބަފައިންނާއި ކުދިންގެ މެދުގައި ގުޅުން ބަދަހިކުރެވި، އުފާވެރި ޢާއިލާތަކެއް ބިނާކުރެވިދާނެކަމަށް އިޖްތިމާޢީ އަދި ޢާއިލީ ތަރައްޤީއާ ބެހޭ ވަޒީރު، ޑރ. ޢާއިޝަތު ޝިހާމް ވިދާޅުވެއްޖެއެވެ.

މިނިސްޓަރު މިގޮތަށް ވިދާޅުވެފައިވަނީ، އެ ވުޒާރާއިން ފަށައިގެން ކުރިއަށް ގެންދާ 'ޕޭރެންޓް އެފެކްޓިވްނެސް ޓްރެއިނިން' ގެ ތަމްރީނަރުން ބިނާކުރުމުގެ (ޓީ.އޯ.ޓީ) ޕްރޮގްރާމު ފެއްޓެވުމަށް ބޭއްވި ހަފްލާގައި ވާހަކަ ދައްކަވަމުންނެވެ.

ބެލެނިވެރިކަމުގެ ހުނަރުތައް ދަސްކޮށްދޭނެ މީހުން ބިނާކުރުމަށް މިފަދަ ތަމްރީނު ޕްރޮގްރާމުތައް ހިންގުމުގެ މުހިންމުކަމުގެ މައްޗަށް އަލިއަޅުވާލާ، ވަޒީރު ވިދާޅުވީ، އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހެޅޭ ޢާއިލީ މައްސަލަތަކަށް ބަލާއިރު ގިނައީ ނާޒުކު ޙާލަތްތަކުގައި ދިރިއުޅޭ ފަރާތްތައް ކަމަށެވެ. އަދި އެ ޢާއިލާތަކުގައި ބެލެނިވެރިންނާއި ކުދިންގެ މެދުގައި ރަނގަޅު ގުޅުމެއް އުފައްދަންޖެހޭކަން ފާހަގަކުރެވޭ ކަމަށެވެ.

މައިންބަފައިންނާއި ދަރިންގެ މެދުގައި އޮންނަ ގުޅުމުގެ މުހިންމުކަމުގެ މައްޗަށްވެސް ވަޒީރުގެ ވާހަކަފުޅުގައި އަލިއަޅުވާލެއްވިއެވެ. އެކަމަނާ ވިދާޅުވީ، މައިންބަފައިންގެ ފަރާތުން ދަރިންނަށް ދަސްވާ ކަންތައްތަކަކީ އެކުދިންގެ މުޅި ދިރިއުޅުން ބައްޓަންކުރާ މުހިންމު ކަންތައްތައް ކަމަށެވެ. ތުއްތުއިރު ކުއްޖާ ބަލަހައްޓާ ފަރާތްތަކާއެކު އުފެދޭ ގުޅުމުގެ ތެރެއިން، މުސްތަޤްބަލުގައި އެހެން މީހުންނާ ގުޅުން ބާއްވާނެ ގޮތްތަކާއި، ދިރިއުޅުން ބައްޓަންކުރާނެ ގޮތްތައް ދަސްކުރާކަމަށާ، އެ ކުދިން ބޮޑެތިވެ ޢާއިލާއެއް ފަށާ ހިސާބުން ނުވަތަ މަސައްކަތު މާޙައުލަށް ނިކުންނަ އިރުވެސް ތުއްތުއިރު ދަސްވެފައި ހުންނަ ކަންކަމުގެ ބޭނުން ހިފާކަން ވަޒީރު ފާހަގަކުރެއްވިއެވެ. އެހެންކަމުން ކުދިންގެ ގައިގައި ރަނގަޅު އާދަތައް އަށަގަންނަވައިފިނަމަ، އެ ކުދިންނަކީ މުޖުތަމަޢަށް ބޭނުންތެރި ހަރުދަނާ ކުދިންނަށް ވެގެންދާނެކަމަށް ވަޒީރު ވިދާޅުވިއެވެ.

'ޕޭރެންޓް އެފެކްޓިވްނެސް ޓްރެއިނިން' ފަދަ ތަމްރީނު ޕްރޮގްރާމުތައް ކުރިއަށް ގެންދިއުމުގެ އެންމެ ބޮޑު ބޭނުމަކީ ނާޒުކު ހާލަތުގައި ތިބި އާއިލާތަކާއެކު ގާތުން މަސައްކަތްކުރާ މުވައްޒަފުންގެ ޤާބިލުކަން އިތުރުކުރުން ކަމަށާއި، މިފަދަ ތަމްރީނު ޕްރޮގްރާމުތަކުގެ ތެރެއިން ޢާއިލާތަކާއެކު މަސައްކަތް ކުރަންވީ ގޮތްތައް ދަސްވެ، ހަރުދަނާ ބެލެނިވެރިކަމުގެ ހުނަރުތައް މައިންބަދައިންނަށް ދަސްކޮށްދޭންވީ ގޮތުގެ ވަރަށް ގިނަ މައުލޫމާތާއި ފަންނީ ހުނަރުތައް މުވައްޒަފުންނަށް ލިބިގެންދާނެކަމަށް ވަޒީރު ވިދާޅުވި އެވެ.

އަދި އެ މައުލޫމާތުތަކުގެ އެހީގައި، ހަރުދަނާ ބެލެނިވެރިކަމުގެ ހުނަރުތައް މައިންބަފައިންނަށް ދަސްކޮށްދީގެން، ކުދިންނާއި ގާތް ގުޅުމެއް އުފައްދާ، ރަނގަޅުގޮތުގައި ކުދިންނާއި މުޢާމަލާތުކުރުމާއި، ކުދިން ތަރުބިއްޔަތުކުރުމުގެ ތަފާތު ހުނަރުތައް ދަސްކޮށްދެވި، ހަރުދަނާ ކުދިންތަކެއް ބިނާކުރުމަށް އެހީތެރިކަން ލިބިގެންދާނެކަން ވެސް ވަޒީރު ފާހަގަކުރެއްވި އެވެ.

ވަޒީރު ވިދާޅުވީ، ޢާއިލާތަކާއެކު މަސައްކަތްކުރާ މުވައްޒަފުންގެ ޤާބިލުކަން އިތުރުކޮށްގެން، ގާތުން މަސައްކަތްކުރަން ފެށުމަކީ، މައިންބަފައިންނާއި ދަރިންގެ މެދުގައި ދުޅަހެޔޮ ގުޅުންތައް ޤާއިމްކުރެވި، ޢާއިލީ މައްސަލަތައް ކުޑަކުރެވި، އުފާވެރި ޢާއިލާތަކެއް ބިނާކުރުމަށް ވަރަށް ބޮޑަށް ބާރުލިބިގެންދާނެކަމެއް ކަމަށެވެ.