މިދައުރުގެ ތެރޭގައި ހިތަދޫ-ހުޅުމީދޫ ބްރިޖުގެ މަސައްކަތް ނިންމާނަން: ރައީސް މުޢިއްޒު

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވެރިކަމުގެ މި ދައުރު ނިމުމުގެ ކުރިން، އައްޑޫސިޓީގެ ހިތަދޫ-ހުޅުމީދޫ ބްރިޖުގެ މަސައްކަތް ނިންމަވާނެ ކަމަށް އެމަނިކުފާނު ވިދާޅުވެއްޖެެއެވެ.

ރައީސުލްޖުމްހޫރިއްޔާ އައްޑޫ ސިޓީއަށް ކުރައްވަމުންދާ ދަތުރުފުޅުގެ ތެރެއިން މިއަދު ހުޅުމީދޫއަށް ވަޑައިގެންފައިވާއިރު، ހިތަދޫ އާއި ހުޅުމީދޫ ބްރިޖުގެ ޕްރިލިމިނަރީ ޑިޒައިން އަދި ސާރވޭ މަސައްކަތުގެ މިސްރުގެ ކުންފުންޏެއް ކަމަށްވާ 'ދަ އަރަބް ކޮންޓްރެކްޓަރސް'އާއި ވަނީ ހަވާލުކޮށްފައެވެ.

މިއެއްބަސްވުމުގައި ސޮއި ކުރުމަށް ބޭއްވުނު ރަސްމިޔާތުގައި ވާހަކަ ދައްކަވަމުން ރައީސުލްޖުމުހޫރިއްޔާ ވަނީ، އެ ބްރިޖު އެޅުމަކީ އެމަނިކުފާނުގެ ރިޔާސީ ވަޢުދުފުޅެއްކަން ފާހަގަކުރައްވައި، އެ ވަޢުދުފުޅު ފުއްދުމުގެ މަސައްކަތް އެ އެއްބަސްވުމާއި އެކު ފެށިގެން ގޮސްފައިވާ ކަމަށް ވިދާޅުވެފައެވެ.

މިއާއެކު ރައީސް މުޢިއްޒު ވިދާޅުވީ، އައްޑޫގައި އެޅޭ އެ ބްރިޖަކީ މިހާތަނަށް ރާއްޖޭގައި އެޅޭ އެންމެ ބޮޑު ބްރިޖު ކަމަށާ، އެފަދަ ބޮޑު މަސައްކަތެއް ކުރާއިރު ރައްޔިތުންނާއި ގާތުން ރައްޔިތުންގެ ޚިޔާލާއި އެއްގޮތަށް ޓެކްނިކަލް ގިނަ މަސައްކަތްތަކެއް ވެސް ކުރަންޖެހޭނެ ކަމަށެވެ.

އަދި ބްރިޖުގެ ޕްރިލިމިނަރީ ޑިޒައިން އަދި ސާރވޭ މަސައްކަތް ނިމިގެންދާއިރު، އެ ބްރިޖު އޮންނާނެ ގޮތުގެ ތަފްސީލީ ޑިޒައިންގެ މަސައްކަތް ނިމިގެންދާނެ ކަމަށާ، އެއާއެކު ބްރިޖު އެޅުމަށް ކޮންޓްރެކްޓަރާއި ހަވާލު ކުރެވިގެންދާނެ ކަމަށް އެމަނިކުފާނު ވިދާޅުވި އެވެ.

އަޅުގަނޑު އުއްމީދު ކުރަނީ، އަދި ޔަގީން ކުރަނީ މިއަދު މި ވެވުނު އެއްބަސްވުން ބަދަލުވެގެންދާނީ، އަމަލީ މަސައްކަތުގެ ކޮންޓްރެކްޓަރަކަށް. އިރާދަކުރެއްވިޔާ މިއަހަރުގެ ތެރޭގައި ބްރިޖުގެ ޢަމަލީ މަސައްކަތް ފަށާނަން. އަދި އަޅުގަނޑުގެ އަނދާޒާއަކީ ގާތްގަނޑަކަށް ތިން އަހަރާއި، ހަތަރު އަހަރު ދުވަހުގެ ތެރޭގައި މަސައްކަތް ނިމުން. މެކްސިމަމް ފޯ އިޔާސް. އިރާދަކުރެއްވިޔާ މި ދައުރުގެ ތެރޭގައި ބްރިޖުގެ މަސައްކަތް ނިންމައި، މިސިޓީގެ ރައްޔިތުން ހިތަދޫއިން ހުޅުމީދޫއަށް، ހުޅުމީދޫއިން ހިތަދޫއަށް، މުޅި ސިޓީއެއްކޮށް ގުޅި، ރައްޔިތުން ދަތުރުކުރާތަން ފެނިގެންދާނެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު އިތުރަށް ވިދާޅުވީ، އައްޑޫ ބްރިޖަކީ ޝަރަފަށް ކުރައްވާ ކަމެއް ނޫން ކަމަށާ، އެހެނެއްކަމަކު އެއީ އިގްތިސާދީ ގޮތުން ކުރިއެރުންތަކެއް ހޯދައި ދިނުމަށް ކުރައްވާ މަސައްކަތެއް ކަމަށެވެ.

ރައީސް ޑރ.މުއިއްޒުގެ ރިޔާސީ ވައުދުފުޅުގެ ދަށުން ހިތަދޫ އާއި ހުޅުމީދޫ ގުޅާލުމަށް އަޅާ ބްރިޖުގެ ދިގު މިނަކީ އެންމެ މަދުވެގެން 14 ކިލޯ މީޓަރެވެ. ރާއްޖޭގައި ފުރަތަމަ އެޅި ސިނަމާލެ ބްރިޖުގެ ދިގު މިނަކީ 1.3 ކިލޯ މީޓަރެވެ. މާލެ އާއި ވިލިމާލެ އަދި ތިލަފުށި ގުޅާލުމަށްޓަކައި އަޅަމުންދާ ބްރިޖުގެ ދިގުމިނަކީ 6.7 ކިލޯ މީޓަރެވެ. އެހެންކަމުން މިއީ މިހާތަނަށް ރާއްޖޭގައި އަޅާ އެންމެ ބޮޑު ބްރިޖް ކަން ފާހަގަކޮށްލެވެއެވެ.