ރީތި ރާގުތަކަށް ޤުރުއާން ކިޔެވުމާ ޤުރުއާނުގެ ޢިލްމު ފެތުރުމުގެ ޕްރަގްރާމް ފަށައިފި

ރީތި ރާގުތަކަށް ޤުރުއާން ކިޔެވުމާ ޤުރުއާނުގެ ޢިލްމު ފެތުރުމުގެ މަގުސަދުގައި ކުރިއަށް ގެންދާ ސިލްސިލާގެ މި އަހަރުގެ ޕްރަގްރާމް ފަށައިފި އެވެ.

މި ޕްރަގްރާމަކީ "މަހުރަޖާނުލް ޤުރުއާނިލްކަރީމް” ނަމުގައި ކުރިއަށް ގެންދާ ސިލްސިލާ ޕްރަގްރާމެކެވެ.

ދިވެހިރާއްޖޭގެ އިސްލާމީ ޔުނިވާސިޓީގެ ޖަލްސާކުރާ މާލަމުގައި ބޭއްވި މި ރަސްމިއްޔާތުގައި މިއަހަރުގެ ޕްރަގްރާމް ފައްޓަވައިދެއްވީ ފަސްޓްލޭޑީ ސާޖިދާ މުހައްމަދެވެ.

މިރޭގެ ރަސްމިއްޔާތުގައި މި އަހަރުގެ ޕްރަގްރާމް ފެށުމުގެ ގޮތުން ޔުނިވާސިޓީގެ ތިން ދަރިވަރަކާއި، މިސްރުގެ ޤާރީއެއްގެ ޤުރުއާން ކިޔެވުން ހުށަހަޅައިދީފައެވެ.

މީގެ އިތުރުން، ޔުނިވާސިޓީގެ ވައިސް ޗާންސެލަރ ޑރ. ޢަލީ ޒާހިރު އާއި، ކުއްލިއްޔާ އޮފް ޤުރުއާން އެންޑް ސުންނާގެ ލެކްޗަރަރ އައްޝައިޚް ޢަބްދުލްޢަޒީޒު ޙުސައިން އަދި ކުއްލިއްޔާ އޮފް އިސްލާމިކް ރިވީލްޑް ނޮލެޖް އެންޑް ހިއުމަން ސައިންސްގެ ޑީން އައްޝައިޚް ނިމާލް މުޙައްމަދު، ކިޔެވި ދިޔަ ބައެއް އާޔަތްތަކާއި ގުޅުންހުރި މައުޟޫޢުތަކަށް ވާހަކަފުޅު ދައްކަވާފައިވެއެވެ.

މިރޭގެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ، މި އަހަރުގެ މަހުރަޖާނުގެ ހުށަހަޅުންތެރީންނަށް ހަނދާނީ ލިޔުން ހަވާލުކޮށްދެއްވާފައެވެ.

"މަހުރަޖާނުލް ޤުރުއާނިލްކަރީމް" ޕްރޮގްރާމަކީ 2006 ވަނަ އަހަރުން ފެށިގެން ދިވެހިރާއްޖޭގެ އިސްލާމީ ޔުނިވާސިޓީގެ ކުއްލިއްޔާ އޮފް ޤުރުއާން އެންޑް ސުންނާގެ އިސްނެގުމުގެ މަތިން، ކޮންމެ އަހަރެއްގެ ރަމަޟާން މަހު ކުރިއަށްގެންދާ ޚާއްޞަ ޕްރޮގްރާމެކެވެ. މި މަހްރަޖާނަކީ ރީތި ރާގުތަކަށް ކީރިތި ޤުރުއާން ކިޔަވައި، ކީރިތި ޤުރުއާނުގެ ޢިލްމު ފެތުރުމުގެ މާތް މަޤްޞަދުގައި ކުރިއަށްގެންދާ ޕްރޮގްރާމެކެވެ.