އިދިކޮޅު މެންބަރުން ތަޅުމުން ނެރެ، މަޖިލިސް ތަޅުލައިފި

ރައްޔިތުންގެ މަޖިލީހުގެ ތިން މެންބަރަކު އިހުތިޖާޖު ކުރުމުން، މަޖިލީހުގެ ތަޅުމުން މެންބަރުން ބޭރުކޮށް، މަޖިލީހުގެ ދެފަރާތުގެ ދޮރު ތަޅުލައިފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ކުރީގެ ރައީސް އަބްދުﷲ ޔާމީން މިނިވަން ކުރުމަށްގޮވައިލައި، އިދިކޮޅު ކޯލިޝަނަށް ނިސްބަތްވާ މެންބަރުން މަޖިލީހުގެ ތަޅުމުގައި އިހުތިޖާޖު ކުރި މައްސަލައިގައި ނަން އިއްވައި، މަޖިލީހުގެ ތަޅުމުން ބޭރުކޮށްފައިވަނީ ނައިފަރު ދާއިރާގެ މެންބަރު އަހުމަދު ޝިޔާމާއި ފެލިދޫ ދާއިރާގެ މެމްބަރު ފަޒުލް ރަޝީދުގެ އިތުރުން ފަރެސް މާތޮޑާ ދާއިރާގެ މެމްބަރު ހުސެން މުހައްމަދު ލަތީފެވެ.

އޭގެ ފަހުން މަހިބަދޫ ދާއިރާގެ މެންބަރު އަހުމަދު ތޯރިގުގެ ނަންވެސް އިއްވާފައިވެއެވެ. ނަމަވެސް ތޯރިގު ތަޅުމުން ބޭރެއް ނުކުރެއެވެ. ގުރައިދޫ ދާއިރާގެ މެންބަރު މުހައްމަދު ޣައްސާނަށް ވެސް މަޖިލީހުގެ ތަޅުމުން ބޭރަށް ނުކުންނެވުމަށް ރައީސް ނަޝީދު އެންގެވިއެވެ. ނަމަވެސް ޣައްސާނުވެސް ނުކުމެވަޑައެއް ނުގަންނަވައެވެ.

ތިން މެންބަރުން ބޭރު ކުރެއްވުމަށް ފަހު މަޖިލީހުގެ ރައީސް ނަޝީދުވަނީ މަޖިލީހުގެ ދެފަރާތު ދޮރު ތަޅުލައި، ތަޅުގެ ގޮބުގައި އެތެރެއިން ހިފަހައްޓައިގެން ސެކިއުރިޓީން ތިބުމަށް އެންގުމަށް މަޖިލީހުގެ ސާރޖަންޓް އެޓް އާމްސްއަށް އަންގަވައިފައެވެ.

މިއީ ރައްޔިތުންގެ މަޖިލިހުގައި މީގެކުރިން ދުވަހަކުވެސް އަމަލުކޮށްފައިވާ ގޮތެއް ނޫނެވެ.

ވޯޓަށް އަހައި ނިންމައިލެއްވުމަށްފަހު ނައިބު ރައީސް އީވާ އަބްދުﷲ އާއި ރިޔާސަތު ހަވާލުކުރައްވަމުން ރައީސް ނަޝީދު ވިދާޅުވީ ދެން ރިޔާސަތުގައި އިންނަވާނީ އަންހެނެއް ކަމަށާއި އިހުތިޖާޖުކުރާ މެންބަރުން އެކަން ބަލައިގެން އިހުތިޖާޖު ކުރުން ރަގަޅުވާނެ ކަމަށެވެ.