އިހްސާސްކުރެވޭ ހޫނުމިން މިއަދު އެންމެ މައްޗަށްދިޔައީ މާލެ ސަރަހައްދަށް

މިއަދު އެންމެ ހޫނު ގަދައީ މާލެ ސަރަހައްދަށްކަމަށް މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލުގެ ފޯކާސްޓުން ދައްކައިފިއެވެ.

މެޓް އޮފީހުން މިއަދު މެންދުރު އާއމްުކުރި މޫސުމާބެހޭ މައުލޫމާތުތަކަށް ބަލާއިރު، މިއަދު މެންފުރު އެންމެބޮޑަށް އަވިގަދަވެގެން ދިޔަ ގަޑީގައި އިހްސާސްކުރެވޭ ފިނިހޫނުމިން އެންމެ މަތީގައި އުޅެނީ މާލެ ސަރަހައްދެވެ. މި ސަރަހައްދުގެ އިހްސާސްކުރެވޭ ފިނިހޫނުމިން 35.9 ޑިގްރީ ސެލްސިއަސްއަށް ލަފާކޮށްފައިވާއިރު، ފިނިހޫނުމިން ހުރީ 32 ޑިގްރީ ސެލްސިއަސްގައެވެ.

މާލެ ސަރަހައްދުގެ އިތުރުން ދެން ހޫނުމިން އެންމެ މައްޗަށްދާނޭކަމަށް ލަފާކޮށްފައިވަނީ، ހދ.ހަނިމާދޫ، ލ.ކައްދޫ، ގދ.ކާޑެއްދޫ އަދި އައްޑޫސިޓީއެވެ.

މެޓް އޮފީހުން ބުނީ މާޗް އަދި އޭޕްރިލް މަހަކީ މިއަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗަށްދާ ދުވަސްވަރުކަމަށެވެ. މިދުވަސްވަރު ވިލާ މަދުވެފައި ވައިމަޑުވެ އަދި ވައިގެ ތެތްކަމުގެ ނިސްބަތް މަތީގައި ހިފަހައްޓައެވެ.

އަދި ދުވާލު ހޫނުމިން މަތިވެގެންދާވަރާއި ރޭގަނޑުގެ ފިނިކަން ދަށްވެގެންދާވަރާ އަޅާބަލާއިރު، ފަރަގު ކުޑަވުމުގެ ނަތީޖާއަކީ އާންމު ވައިގެ ހޫނުމިނަށްވުރެ އިހްސާސްކުރެވޭ ހޫނުމިން މަތިވެގެން ދިއުންކަން މެޓް އޮފީހުން ފާހަގަކުރެއެވެ. މެޓުން ބުނީ ދުވަހުގެ ހޫނުމިން އާއްމު ގޮތެއްގައި އެންމެ މަތިވެގެން ދާނީ މެންދުރުފަހު 14:00 ހާއިރުކަމަށެވެ.