ޖެމްކިއުގައި އިންވެސްޓްކުރި މީހުންނަށް ކޮޅުކެހި. ސްކީމް ހުއްޓާލައިފި

ދިވެހިންގެ ގިނަ ބަޔަކު މިލިއަނުން އިންވެސްޓްކޮށްފައިވާ ޕިރަޕިޑް ސްކީމެއްކަމަށްވާ ޖެމްކިއު އެންމެފަހުން ހުއްޓާލައިފިއެވެ.

ޖެމްކިއު ހުޓާލިކަން އިއުލާނުކޮށްފައިވަނީ، އެ ސްކީމް ހިންގަމުން އަންނަ ރަސްމީ ޓެލެގްރާމް އެކައުންޓުގައެވެ. ޖެމްކިއު ސްކީމް ހުއްޓާލާފައިވާކަމަށް އިއުލާނުކޮށްފައިމިވަނީ، އެ ސްކީމުން ފައިސާ ނުނެގޭ މައްސަލަތަކެއް ފެންމަތިވެ، ގިނަ އަދަދެއްގެ ބަޔަކު ރުފިގަދަވެފައިވަނިކޮށެވެ.

ޖެމްކިޔު އިން ފައިސާ ނުނެގިގެން އެ ބޭނުންކުރާ މީހުން ހިތްހަމަނުޖެހުން ފާޅު ކުރަމުންދަނިކޮށް، އެ ގުރޫޕު ހިންގާ ފަރާތުން ވަނީ، ފައިސާ ނުނެގޭ ސަބަބު ހާމަކޮށްދިނުމުގެ ގޮތުން ފޭކު ސިޓީއެއް އެ ގުރޫޕަށް ލާފައެވެ. އަދި ފައިސާ ވިތުޑްރޯ ނުކުރެވެނީ އިންޓަނޭޝަނަލް ފައިނޭންޝަލް އިންސްޓިޓިއުޝަންތަކުން ރިވިއުއެއް ކުރިއަށް ގެންދާތީ ކަމަށާ އެއީ އާއްމު އުސޫލުން ކުރިއަށް ގެންދާ ރިވިއުއެއް ކަމަށް އެމީހުން އޭރު ވަނީ ބުނެފައެވެ. ކަންކަން އާއްމު ހާލަތަކަށް އައުމުން އަނެއްކާވެސް ފައިސާ ނެގޭނެ ކަމަށް ބުނެ އިންވެސްޓްކުރި މީހުން މައިތިރި ކުރުމަށް އެމީހުން ވަނީ ވަރަށް މަސައްކަތްކޮށްފައެވެ.

ޖެމް ސްކީމް ހުއްޓާލިކަން ހާމަކުރަމުން އެ ގްރޫޕްގައި ބުނެފައިވަނީ، މިފަދަ އެހެން ޕްރޮޖެކްޓެއްގައި ބައިވެރިވެފައިވާކަމަށާއި، އެ ޕްރޮޖެކްޓާ ގުޅުމަށް އެދޭކަމަށެވެ. އެގޮތުން އެ ޕްރޮޖެކްޓަކީ ރައްކާތެރި ޕްރޮޖެކްޓެއްކަމަށްވެސް ވަނީ ބުނެފައެވެ. ނަމަވެސް ރާއްޖޭގެ މާލީއިދާރާ ރެގިއުލޭޓްކުރާ ކެޕިޓަލް މާކެޓް ޑިވެލޮޕްމަންޓް އޮތޯރިޓީން ވަނީ އެއީ ރަޖިސްޓްރީނުކޮށް ހިންގާ ސްކީމެއްކަމަށާއި އެ ސްކީމްގައި އިންވެސްޓްނުކުރުމަށް އެދިފައެވެ. އެގޮތުން އެއީ ޕިރަމިޑް ސްކީމެއްކަން ސީއެމްޑީއޭއިން ވަނީ ފާހަގަކޮށްފައެވެ.

ގިނަ އަދަދެއްގެ ބަޔަކު ޖެމް ސްކީމްގައިޮ ބައިވެރިވެފައިވާއިރު، މީގެ ތެރޭގައި އެކި ފަންތީގެ މީހުން ހިމެނޭކަމަށް މައުލޫމާތު ލިބެއެވެ. ޖީއެމްކިއު ސްކީމަކީ ވަކި އަދަދަކަށް އިންވެސްޓްކުރުމުން ކޮންމެ ދުވަހަކު ވެސް ދެ އިންސައްތަ ނުވަތަ އެއަށް ވުރެ ބޮޑު އަދަދެއްގެ ފައިސާ ލިބޭ ސްކީމެކެވެ. އެއީ، ޕިރަމިޑް ސްކީމެއްކަން މިހާރު ކަށަވަރުކުރެވިފައިވާ ކަމަށާއި އެ ކަމުގައި ޝާމިލުވާ މީހުންނަށް ފިޔަވަޅު އަޅާނެ ކަމަށް ފުލުހުން ދާދިފަހުން ބުނުމުން، އިންވެސްޓްކުރާ ފައިސާ ޑަބަލްކޮށްދޭނެ ކަމަށްބުނެ އިތުރު އިންވެސްޓަރުން ހޯދުމުގެ މަސައްކަތްވެސް ޖެމްކިޔު ހިންގާ ފަރާތުން ވަނީ ފަށާފައެވެ.