އުފާ ފެސްޓިވަލް މިއަދުވެސް ސެންޓްރަލް ޕާކްގައި ކުރިއަށްދާނެ

އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއާއީ ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާ ގުޅިގެން އިއްޔެ ހުޅުމާލޭ ސެންޓްރަލް ޕާކްގައި ފެށި "އުފާ ފެސްޓިވަލް" ގެ ހަރަކާތްތައް މިއަދާ މިރޭވެސް ކުރިއަށްދާނޭކަމަށް އާއިލާއާ ބެހޭ ވުޒާރާއިން ބުނެފިއެވެ.

ސެންޓްރަލް ޕާކްގައި ފެށި އުފާ ފެސްޓިވަލަށް އިއްޔެ ހަވީރާ ރޭ ގިނަ ބަޔަކު ޒިޔާރަތްކޮށްފައިވާއިރު، މިއަދު ހަވީރާ މިރޭވެސް އިވެންޓްތައް ކުރިއަށްގެންދިއުމަށް ވަނީ ނިންމާފައެވެ. މިއަދު ހަވީރު އުފާ ފެސްޓިވަލް ކުރިއަށްދާނީ 16:00 ފެށިގެން 18:00 އަށެވެ. އަދި ރޭގަނޑު މި ފެސްޓިވަލް ކުރިއަށްދާނީ 20:00 ފެށިގެން 22:00 އަށެވެ.

އުފާ ފެސްޓިވަލުގައި ދައުލަތުގެ މުއައްސަސާތައް ބައިވެރިވާއިރު، އިސްރަށްވެހިންގެ ފަރާތުންވެސް ފެސްޓިވަލްގައި ބައިވެރިވެއެވެ.

އުފާ ފެސްޓިވަލްގައި ކުރިއަށްދަނީ ކުޑަކުދިންނަށް ބައިވެރިވެވޭ ގޭމްތަކާއި އެޑިއުކޭޝަނަލް ހަރަކާތްތައް ހިމަނައިގެންނެވެ.

އުފާ ފެސްޓިވަލް އިއްޔެ ހުޅުވައިދެއްވީ ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމާއި، ދަތުރުފަތުރާއި ބެހޭ ވަޒީރު މުޙައްމަދު އަމީނެވެ. ފެސްޓިވަލް ހުޅުވައިދެއްވުމަށްފަހު އެ ދެ ވުޒާރާގެ ވޭތުވެދިޔަ ދެ އަހަރުދުވަހުގެ މަސައްކަތްތައް ދައްކުވައިދޭ ބުކްލެޓެއް ވަނީ ނެރެފައެވެ. އުފާ ފެސްޓިވަލްގައި ހިމެނިގެން ރޭ ވަނީ ހާއްސަ މޫވީ ނައިޓެއް ކުރިއަށްގެންގޮސްފައެވެ. މޫވީ ނައިޓް ކުރިއަށްގެންގޮސްފައިވަނީ އާއިލާތަކަށްވެސް ބައިވެރިވެވޭ ގޮތަށެވެ.

އުފާ ފެސްޓިވަލަކީ ކުޑަކުދިންގެ ދުވަސް ފާހަގަކުރުމާ ގުޅުވައިގެން އާއިލާއާ ބެހޭ ވުޒާރާއިން އިސްނަގައިގެން ކުރިއަށްގެންދާ ހަރަކާތެކެވެ. މިއީ ކުޑަކުދިންނާއި އެކުދިންގެ އާއިލާތަކަށް އުފާވެރި މާހައުލަކުން ވަގުތު ހޭދަކޮށްލުމުގެ ބޭނުމުގައި ކުރިއަށްގެންދާ ހަރަކާތެއްކަމަށް އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން މައުލޫމާތު ދެއެވެ.