ހޯމް މިނިސްޓްރީގެ ބިޑަކަށް އާއިލާގެ މީހަކު ކުރިމަތިލައިފައެއް ނޯންނާނެ: އުމަރު

ހޯމް މިނިސްޓަރު ކަމުގައި ހުންނަވަނިކޮށް، އާއިލާގެ އެއްވެސް މީހަކު އެމިނިސްޓްރީގެ ބިޑަކަށް ކުރިމަތިލާފައި ނުވާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު މިހެން ވިދާޅުވީ، އޭނާ ހޯމް މިނިސްޓަރު ކަމުގައި ހުންނެވި އިރު، އެމިނިސްޓްރީން ކުށްވެރިންގެ ފައިގައި ޓެގް އެޅުވުމަށް ހިންގި އޮޕަރޭޝަނުގައި ބޭރުން ޓެގު ގެނުވީ އުމަރުގެ ނުފޫޒު ފޯރުވައިގެން އަމިއްލަ ކުންފުންޏަކުން ކަމަށް ބުނެ އެންޓިކޮރަޕްޝަން ކޮމިޝަން (އޭސީސީ) އިން މައްސަލައެއް ބަލަމުންދާކަމަށް ދެކެވޭ ވާހަކައަށް ރައްދު ދެއްވައެވެ.

''ވޮއިސް'' އަށް މިއަދު މައުލޫމާތު ދެއްވަމުން އުމަރު ވިދާޅުވީ، ޓެގް ގެނައުމަށް އޭނާގެ އާއިލާގެ ހިއްސާއެއް އޮތް ކުންފުންޏަކުން ބިޑަށް ކުރިމަތިވެސް ނުލާ ކަމަށެވެ. އަދި އޭނާއާއި އެއްވެސް ގުޅުމެއް އޮތް ކުންފުންޏަކުންވެސް ކުރިމަތިި ނުލާއިރު އެއްވެސް ފަރާތަކަށް ނުފޫޒު ފޯރުވާފައި ނުވާނެ ކަމަށް އުމަރު ވިދާޅުވިއެވެ.

''އަޅުގަނޑުގެ އަނތްބެއް ދަރިއެއްގެ ހިއްސާއެއް އޮތް ކުންފުންޏަކުން ހޯމް މިނިސްޓްރީގެ އެއްވެސް ބިޑަކަށް ކުރިމައްޗެއް ނުލާ. އަޅުގަނޑުގެ އާއިލާގެ ހިއްސާއެއް އޮތް ކުންފުންޏަކުން މިނިސްޓްރީގެ ބިޑަކަށް ކުރިމަތި ނުލާން އަންގާފައި އޮންނާނީ. އެކަން ކޮށްފައި އޮންނާނީ ހުދުވަލުގެ ސިޔާސަތުގެ ދަށުން.'' އުމަރު ވިދާޅުވިއެވެ.

އުމަރު ވިދާޅުވީ، އެމައްސަލައަކީ ރައީސް ޔާމީންގެ ސަރުކާރުން ވެސް ބެލި މައްސަލައެއް ކަމަށެވެ. އޭރުވެސް އެމައްސަލަ ބެލިއިރު ކޮރަޕްޝަންގެ އެއްވެސް އަމަލެއް ހިންގާފައި ނެތްކަން ފާހަގަކުރި ކަމަށް ވިދާޅުވިއެވެ.

އުމަރު ވިދާޅުވީ، އިތުރަށް އެމައްސަލަ ނަގައިގެން ކުނި ހާވަމުން ދަނީ ސިޔާސީ ގޮތުން ކަމަށާއި ހައްގުބަސް ބުނާ ކޮންމެ މީހަކަށް އަދަބު ދީގެން އަނގަ ބަންދު ކުރުމަކީ މިސަރުކާރުގެ ސިޔާސަތެއް ކަމަށް ވެސް އުމަރު ވިދާޅުވިއެވެ.

ރައީސް ޔާމީންގެ ސަރުކާރުގެ ފުރަތަމަ ހޯމް މިނިސްޓަރުކަން ކުރެއްވި އުމަރު މަގާމުން އިސްތިއުފާދެއްވީ 2016 ވަނަ އަހަރުއެވެ. ކުށްވެރިންގެ ފައިގައި ޓެގް އެޅުވުމާއި މަރުގެ ހުކުމް ތަންފީޒު ކުރުން ފެށުމަށް އުމަރު އޭރު ވަނީ ގިނަ މަސައްކަތްތަކެއް ކުރައްވައިފައެވެ.