75 ޕޮއިންޓް ލިބުނު އެންމެނަށް ތިން ކޮޓަރީގެ ފްލެޓެއް ނެތް، އޮތީ ދެ ގޮތެއް: މިނިސްޓަރު

ފަހި ދިރިއުޅުން ކޯޕަރޭޝަނުން ތަރައްގީކޮށްފައިވާ ފްލެޓްތަކުގެ ތެރެއިން 75 ޕޮއިންޓް ލިބުނު އެންމެނަށް ތިން ކޮޓަރީގެ ފްލެޓް ދެވޭނެ ގޮތެއް އަދި ނެތް ކަމަށް ހައުސިން މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެ އެވެ.

ކުރީ ސަރުކާރުން އިމާރާތްކުރި 4000 ފްލެޓް ލިބޭނެ މީހުން ވަނީ ކަނޑަައަޅާފަ އެވެ. އަދި ބައެއް މީހުންނާއެކު އެއްބަސްވުން ހަދާ ލިބޭނެ ފްލެޓްވެސް ވަނީ ކަނޑައަޅާފަ އެވެ. ނަމަވެސް 76 ޕޮއިންޓުން މަތި ލިބުނު އެތައް ބަޔަކަށް ލިބޭނެ ފްލެޓް ކަނޑައަޅަން އޮތީ ގުރުނުނަގަ އެވެ. އެކަމަކު 75 ޕޮއިންޓް ލިބުނު މީހުންގެ މެދުގައި ގުރުނަގާ ލިބޭނެ ފްލެޓްވެސް އޮތީ ކަނޑައަޅާފަ އެވެ.

އެހެން ކަމުން އެއީ އިންސާފުވެރި ނިންމުމަކަށް ނުވާތީ 75 ޕޮއިންޓް ލިބުނު މީހުންގެ މެދުގައި ގުރުނަގާ ލިބޭނެ ފްލެޓް ކަނޑައެޅުން ބާތިލުކުރުމަށް ފަހު މިހާރު ވަނީ 76 ޕޮއިންޓުން މަތި ލިބުނު މީހުންގެ މެދުގައި ގުރުނަގާ ލިބޭނެ ފްލެޓް ކަނޑައަޅާފަ އެވެ.

މިއަދު އޮތް ނޫސްވެރީންގެ ބައްދަލްވުމުގައި މިނިސްޓަރު ވިދާޅުވީ 76 ޕޮއިންޓުން މަތި ލިބުނު އެންމެނަށް ފްލެޓް ދޭން ޖެހޭ ކަމަށެވެ. މި ސަރުކާރުން މިހާރު ވަނީ 76 ޕޮއިންޓުން މަތި ލިބުނު މީހުންގެ ތެރެއިން ލިބޭނެ ފްލެޓް ކަނޑައަޅާފައިނުވާ 330 މީހުންގެ މެދުގައި ގުރުނަގާ ފްލެޓް ކަނޑައަޅާފައި ކަމަށާ އެހެން ކަމުން 75 ޕޮއިންޓް ލިބުނު 315 މީހުންގެ މެދުގައި ކުރީން ނަގާފައިވާ ގުރު ކެންސަލްކޮށްފައިވާ ކަމަށެވެ.

އެކަން ކުރަން ޖެހުނީ އަސާސީ ޝަރުތު ހަމަނުވާ މީހުން ލިސްޓުން އުނިކުރުމުން ވެސް 330 ފްލެޓް ހަމަނުވާތީ ކަމަށް ވިދާޅުވި އެވެ. މިނިސްޓަރު ވިދާޅުވީ މިހާރު އޮތް ގޮތުން އަދި  75 ޕޮއިންޓް ލިބުނު އެންމެނަށް ތިން ކޮޓަރީގެ ފްލެޓް ދެވޭނެ ގޮތެއް ނެތް ކަމަށެވެ.

އެހެން ނަމަވެސް އެ މީހުން ބޭނުންނަމަ މިހާރުވެސް ދެ ކޮޓަރީގެ ތަންތަން ލިބޭނެ ކަމަށާ އެހެން ނޫންނަމަ މުޅި ލިސްޓް ފައިނަލް ކޮށް ނިމެންދެން މަޑުކުރަން ޖެހޭނެ ކަަމަށެވެ. އެ ފަރާތްތަކަށް އޮތީ އެ ދެ ފުރުސަތުކަން ފާހަގަ ކުރައްވާ މިނިސްޓަރު ވިދާޅުވީ ކުރީން ހަދާފައިވާ ގިނަ ގޯސްތައް ރަނގަޅުކޮށް ސަރުކާރުން މަސައްކަތް ކުރަމުން ދަނީ އެންމެ އިންސާފުވެރިކޮށް އެކަން ކުރުމަށް ކަމަށެވެ.