އިތުރު ރިސޯޓް ހުޅުވައި، ރަށާއި ކައިރި ރިސޯޓް ތަކުގައި ވަޒީފާ އަދާކުރުމުގެ ފުރުސަތު ޒުވާނުންނަށް ފަހިކޮށްދޭނަން: ރައީސް

ޒުވާނުންނަށް، އެމީހުން ދިރިއުޅޭ ރަށާއި ކައިރި ރިސޯޓް ތަކުގައި ވަޒީފާ އަދާކުރުމުގެ ފުރުސަތު ފަހި ކޮށްދިނުމަށް އިތުރު ރިސޯޓްތައް ތަރައްގީ ކުރައްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ އާންމުންގެ ސުވާލުތަކަށް ޖަވާބު ދިނުމުގެ ގޮތުން ރައީސް އޮފީހުން ފަށާފައިވާ ޕްރޮގްރާމް "ރައީސްގެ ޖަވާބު"ގައި، ތ. ވޭމަންޑޫ ޒުވާނެއް ކަމަށްވާ އާދަމް ރިފާޒް ކުރެއްވި ސުވާލަކަށް ޖަވާބުދެއްވަމުންނެވެ.

އެގޮތުން، ތ އަތޮޅުގައިވެސް ހުންނަނީ އެންމެ ރިސޯޓެއްކަން ފާހަގަކުރައްވައި ރިފާޒް ވަނީ، އެ އަތޮޅުގައި އިތުރު ރިސޯޓުތައް ހުޅުވައި، ފަތުރުވެރިކަން ތަރައްގީ ކުރުމަށް ސަރުކާރުގެ ޕްލޭންގައި އޮތް ތޯ ސުވާލު ކޮށްފައެވެ.

އެ ސުވާލަށް ޖަވާބުދެއްވަމުން ރައީސުލްޖުމުހޫރިއްޔާ ވިދާޅުވީ، ޒުވާނުންނާއި، އެކި އުމުރުފުރާގެ ބޭފުޅުންނަށް އާމްދަނީ ހޯދޭނެ މަގުތައް ފަހި ކޮށްދެއްވުމަކީ މި ސަރުކާރުގެ އަމާޒެއް ކަމަށެވެ. އަދި އެކަމަށްޓަކައި ފަތުރުވެރިކަމާއި ބެހޭ ވުޒާރާއިން ވެސް މުހިންމު އިސްކަމެއް ދެމުންދާ ކަމަށް އެމަނިކުފާނު ފާހަގަކުރެއްވިއެވެ.

މިއާއެކު ރައީސް ވިދާޅުވީ މި ސަރުކާރުގެ ވިސްނުމަކީ ރައްޔިތުން ރިސޯޓުގައި ތިބެގެން ވަޒީފާ އަދާކުރުމަށްފަހު ކައިރީގައި އޮންނަ އަމިއްލަ ރަށަށް ފަސޭހައިން ދެވޭނެ ގޮތަކަށް ރިސޯޓުތައް އިތުރުކުރުން ކަމަށެވެ.

"އިރާދަކުރެއްވިއްޔާ ތ. އަތޮޅަށް އަޅުގަނޑުމެންގެ މިދައުރުގެ ތެރޭގައި ގިނަ ރިސޯޓުތަކެއް ގެންނާނަން. ވަރަށް ޔަޤީންކަން ދެން." ރައީސް ވިދާޅުވިއެވެ.

ރައީސް އިތުރަށް ވިދާޅުވީ، ފަތުރުވެރިކަން ކުރިއެރުވުމަށް ދަތުރުފަތުރުން ގުޅުވާލުމަކީވެސް މުހިންމު ކަމަކަށްވާއިރު ކޮޅުމަޑުލުގައި 3 އެއަރޕޯޓް ތަރައްޤީވެގެންދާނެ ކަމަށެވެ.

އަދި އެ އެއާޕޯޓް ތަކުގެ މަސައްކަތް ނިމުމުން ފަތުރުވެރިކަމަށް ހުރި ގޮންޖެހުންތަކަށްވެސް ކޮންމެވެސް ވަރެއްގެ ޙައްލެއް ލިބިގެންދާނެކަން ރައީސް ފާހަގަ ކުރެއްވިއެވެ.

މީގެ އިތުރުން، ރާއްޖޭގެ މުޅި އިގްތިސާދު ކުރިއެރުވުމަށް ސަރުކާރުން ކުރާ މަސައްކަތް ތަކުން ރާއްޖެއަށް އިންވެސްޓަރުން އިތުރު ވާނެ ކަމަށް ރައީސް ވަނީ ލަފާ ކުރައްވާފައެވެ. އަދި ވެލާނާ އިންޓަނޭޝަނަލް އެއާޕޯޓް ތަރައްގީ ވެގެން ދިޔުމުންވެސް ފަތުރުވެރިން އަންނަ ނިސްބަތް އިތުރު ވާނެ ކަމަށެވެ.

"ޒުވާނުންނަށް، ކައިރި ރިސޯޓަކަށް ގޮސްގެން އާމްދަނީ ހޯދޭނެ، ވަޒީފާ ކިބޭނެ ލިބޭ ފުރުސަތު ފަހިކޮށްދޭނަން އިރާދަކުރެއްވިޔާ ހަމަ ވަރަށް އަވަހަށް ފެނިގެންދާނެ. އެހެން އަތޮޅުތަކުގައި ވެސް އަޅުގަނޑުމެންގެ އަމާޒަކީ، ޒުވާނުންނަށް ރިސޯޓްގައި ތިބެގެން ވަޒީފާ އަދާކޮށްފައި ކައިރީގައި ހުންނަ އޭނާގެ އަމިއްލަ ރަށަަށް ފަސޭހައިން ދެވޭ ކަހަލަ ގޮތަކަށް، އެކި ހިސާބު ތަކަށް ރިސޯޓްތައް އިތުރުކުން."

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އެހެންކަމުން ތ އަތޮޅުގައިވެސް މިއަހަރު ތެރޭގައިވެސް ރިސޯޓެއްގެ މަސައްކަތް ފެށިގެންދާނެ ކަމަށާ އަދި މުޅި ތ. އަތޮޅު ކަވަރު ކުރެވޭ ގޮތަށް ގިނަ ރިސޯޓުތަކެއް މި 5 އަހަރުގެ ތެރޭގައި ގެނެސްދޭނެކަމުގެ ޔަޤީންކަން ރައީސް ވަނީ ދެއްވާފައެވެ.