އައްޑޫ މަސްވެރިން ޑިމާންޑް ކުރަނީ 13 މިލިއަނެއްހާ ރުފިޔާއަށް، އެއީ ވަރަށް ކުޑަ އަދަދެއް: އެމްޑީޕީ

ފައިސާ ނުލިބިގެން އައްޑޫގައި މުޒާހަރާ ކުރަމުންދާ މަސްވެރިން ޑިމާންޑް ކުރަމުންދަނީ ގާތްގަނޑަކަށް 13 މިލިއަނެއްހާ ރުފިޔާ ދޭން ކަމަށާ އެއީ ބޮޑު އަދަދެއް ނޫން ކަމަށް އިދިކޮޅު އެމްޑީޕީގެ ޕާލަމެންޓްރީ ގުރޫޕުން ބުނެފިއެވެ.

މަސްވެރިންނަށް ދޭންޖެހޭ ފައިސާ ދިނުން ލަސްވަމުންދާ މައްސަލާގައި އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެންބަރު މަޢުރޫފް ޒާހިރު ވިދާޅުވީ، ދިވެހި ރައްޔިތުން ތަކެއް ތިން ދުވަސް ވަންދެން މުޒާހަރާއެއް ކުރުމުންވެސް އެ މައްސަލަ ހައްލުކޮށްނުދެވުމަކީ ސަރުކާރު ވަރަށްބޮޑު ނާޤާބިލިއްޔަތު ކަމެއް ކަމަށާ، އެ މައްސަލަ ހައްލުކޮށްދިނުމަކީ ސަރުކާރަށް ލާޒިމު ކަމެއް ކަމަށެވެ.

މިއާއެކު އޭނާ ވިދާޅުވީ، މުޒާހަރާގެ ތެރެއިން ގާނޫނާއި ގަވާއިދުތަކާއި ޚިލާފަށް ކަންކަން ކުރުމަކީ އެމްޑީޕީންވެސް ތާއީދު ކުރާ ކަމެއް ނޫން ކަމަށާ، އަދި އައްޑޫގައި މިހާރު ހިނގަމުންދާ މަސްވެރިންގެ އިހްތިޖާޖުގެ ތެރެއިން އެފަދަ ކަމެއް ނުހިނގާ ކަމަށެވެ.

އައްޑޫގެ މަސްވެރިން މިހާރު ކުރަމުންދާ އިހްތިޖާޖުގައި، ގާތްގަޑަަކަށް އެ ޑިމާންޑް ކުރެވެނީ، 13 ވަރަކަށް މިލިއަން ރުފިޔާ. އެއީ ފާއިތުވެދިޔަ ދެމަސް ދުވަހު މަސްވެރިންނަށް ދޭންޖެހިފައިވާ ފައިސާ. އެއީ ވަރަށް ކުޑަކުޑަ އަދަދެއް ސަރުކާރަކަށް ނުވަތަ ދައުލަތަކަށް އެކަން ހައްލުކޮށްދޭން ބޭނުން ކަމަށް ވާނަމަ.

ކެންދޫ ދާއިރާގެ މެންބަރު މަޢުރޫފް ޒާހިރު

ކަންމިހެން ހުރުމުން، އެމްޑީޕީގެ ޕާލަމެންޓްރީގެ ފަރާތުންވަނީ، މަސްވެރިކަމާއިބެހޭ ވަޒީރު އައްޑޫ މަސްވެރިންނާއި ބައްދަލު ކުރައްވައި، އެ މަސްވެރިންގެ މައްސަލަތައް ވޭހާވެސް އަވަހަށް ހައްލުކޮށްދެއްވުމަށް ގޮވާލާފައެވެ.

އަޅުގަނޑުމެންނަށް މީގެ ކުރިންވެސް ފެނުފައިވަނީ، މަސްވެރިން ކުރި މުޒާހަރާ ތަކުގައި މަސްވެރިކަމާއިބެހޭ ވަޒީރު ބައްދަލުކޮށް ހައްލުތަކެއް ހޯދަދިންކަން. ނުވަތަ، ފިނިކަމެއް ގެނެސްދިންކަން.

ކެންދޫ ދާއިރާގެ މެންބަރު މަޢުރޫފް ޒާހިރު

މަސްވެރިން ޑިމާންޑް ކުރަމުންދަނީ 13 މިލިއަނަށް ކަމަށް މައުރޫފް ވިދާޅުވެފައިވާއިރު، މެއި މަހުގެ 9 ވަނަ ދުވަހުން ފެށިގެން މިއަދުގެ ނިޔަލަށް ނުދެއްކި ހުރީ 52.6 މިލިއަން ކަމަށް މިފްކޯއިން ބުނެއެވެ. އަދި މިފްކޯއަށް މަސް ގަންނަމުން އަންނަނީ 8 ރުފިޔާގެ ގެއްލުމެއްގައި ކަމުން ފައިސާ ދިނުމުގައި ސަރުކާރާއި މަޝްވަރާ ކުރަމުންދާ ކަމަށް އެ ކުންފުނިން ބުނެއެވެ.

އައްޑޫ ފިޝަރީޒް ކޮމްޕްލެކްސްގައި ބައެއް ދޯނިފަހަރުތަކުން ބުރާސްފަތި ދުވަހުން ފެށިގެން ހިންގަމުންދާ އިހުތިޖާޖުގައި އެ ފެސިލިޓީގައިހުރި މިފްކޯގެ މުދަލަށް ގެއްލުންދީ، މުވައްޒަފުންގެ އަސާސީ ޒަރޫރީ ބޭނުންތަކަށް ހުރަސް އެޅޭހެން ޢަމަލުތައް ބަހައްޓަމުން ގެންދާތީ މިކަން ޙައްލު ކުރުމަށް އެކުންފުންޏާއި، ކަމާއިގުޅޭ ފަރާތްތައް ގުޅިގެން މަސައްކަތްކުރަމުންދާ ކަމަށް މިފްކޯއިން ބުނެއެވެ.

މިގޮތުން ކުންފުނީގެ މަސް ރައްކާކުރާ ކޯލްޑް ސްޓޯރޭޖާއި ޕަވަރ ހައުސް އިމާރާތްތާއި، މުވައްޒަފުން ދިރިއުޅެން ކަނޑައަޅާފައިވާ ސަރަހައްދުފަދަ ހުއްދަ ލިބިގެން ނޫނީ ވަނުން މަނާ ސަރަހައްދުތަކަށް ވަދެ، ތަނުގެ އޮޕަރޭޝަން ހުއްޓޭފަދަ ގޮތަކަށް އިހުތިޖާޖުގެ ބައިވެރިންގެ އަމަލުތައް ބަހައްޓާފައިވާކަން މިފްކޯއިން ވަނީ ފާހަގަކޮށްފައެވެ.

އަދި ހަމައެހެންމެ، މުވައްޒަފުންގެ ކެންޓީނަށް ގެއްލުންދީ، އެކަމޮޑޭޝަން އޭރިއާއަށް ރޭގައި ކަރަންޓު ދޭން ފުރުސަތު ދީފައިނުވާތީ، ތަނުގައި މަސައްކަތްކުރާ މުވައްޒަފުންގެ ކެއުމާއި، ނިދުމާއި ފާޚާނާކުރުންފަދަ ޒަރޫރީ ކަންކަމަށް ބުރޫއަރާފައިވާކަމަށްވެސް މިފްކޯއިން ބުނެފައިވެއެވެ.

އައްޑޫ ފިޝަރީޒް ކޮމްޕްލެކްސްގައި މިހާރު ހިނގަމުންދާ އިހުތިޖާޖުތަކާއި ގުޅިގެން ތަނުގެ އޮޕަރޭޝަން ހުއްޓި ކުންފުންޏަށް މާލީ ގޮތުން ގެއްލުން ވަމުންދާތީ، ތަން އޮޕަރޭޝަނަށް ގެނައުމަށް ކަމާއިބެހޭ ފަރާތްތަކާއި ގުޅިގެން މިފްކޯއިން މިހާރު ދަނީ މަސައްކަތް ކުރަމުންނެވެ. އަދި ތަން އޮޕަރޭޝަނަށް ގެނެސް ޢާންމު ހާލަތަކަށް ގެނައުމަށް މިފްކޯގެ މުވައްޒަފުން ކުރަމުން ގެންދާ މަސައްކަތްތަކާއި، ފުލުހުންގެ ޒިންމާތަކަށް ހުރަސް އަޅާ ދޯނިފަހަރުން މިފްކޯއަށް މަސްގަތުން 3 މަސް ދުވަހަށް ސަސްޕެންޑު ކުރެވޭނޭ ކަމަށް މިފްކޯއިން މިއަދު ވަނީ ބުނެފައެވެ.