ހައްޖުކޯޕަރޭޝަންގެ އުމުރާވެރިންގެ އެތެރޭގެ ދަތުރުތަކަށް ހައިސްޕީޑް ޓްރެއިން ބޭނުންކުރަން ފަށަނީ

މޯލްޑިވްސް ހައްޖު ކޯޕަރޭޝަންގެ ފަރާތުން ކުރާ ޢުމްރާ ދަތުރުތަކުގައި މައްކާއިން މަދީނާއަށް އަދި މަދީނާއިން މައްކާއަށް ބަހުގައި ދަތުރުކުރުމުގެ ބަދަލުގައި ހަރަމައިން ހައިސްޕީޑް ޓްރެއިން ބޭނުންކުރުމަށް ނިންމައިފިއެވެ.

އެކޯޕަރޭޝަނުން މިކަން ހާމަކޮށްފައިވަނީ އެކަން ހާމަކޮށް މިރޭ ނެރުނު ނޫސް ބަޔާނެއްގައެވެ.

މި ބަޔާނުގައި އެކޯޕަރޭޝަނުން ބުނެފައިވަނީ އެގޮތަށް ނިންމުމުގެ އެންމެ ބޮޑު ބޭނުމަކީ  ޢުމްރާ ދަތުރުތަކާއި ގުޅުންހުރި ޚިދްމަތްތައް ލުއިފަސޭހަ އަދި ރަނގަޅު ފެންވަރެއްގައި ފޯރުކޮށްދިނުން ކަމަށެވެ.

"މިދިޔަ ޑިސެމްބަރ އަޅުގަނޑުމެން ކުރި އުމުރާ ދަތުރުގައި ފާހަގަ ކުރެވުނީ އަސްލު މި ދަތުރުގައި އުމުރާވެރިން އުޅެމުން ދަނީ ވަރަށް ދަތި އުނދަގޫ ހާލެއްގައިކަން،  ބޮޑު ތަކުލީފެއްގައިކަން، އަޅުގަނޑުމެނަށް މިކަން ފާހަގަކުރެވުނު ހިސާބުން އަޅުގަނޑަށް ރައީސް އިރުޝަދުދެއްވި މި ދަތުރުތަކަށް ލުއި ފަސޭހަކަމެއް ހޯދައި ދިނުމަށް"

މި ނިންމުން އައިގޮތާއި ގުޅޭގޮތުން ކޯޕަރޭޝަންގެ އެމްޑީ މުހައްމަދު ޝަކީލް ވިދާޅުވިއެވެ.

މައްކާއިން މަދީނާއަށް އަދި މަދީނާއިން މައްކާއަށް ކުރާ ބަސް ދަތުރުތަކަކީ ގާތްގަނޑަކަށް 6  ނުވަތަ 8 ގަޑީއިރު އޭގައި ހޭދަވާ ވަރަށް އުނދަގޫ ދަތުރުތަކެއް ކަމަށާއ، މިހައި ގިނަ ވަގުތު ބަހުގައި ހޭދަކުރަންޖެހުމުން ޢުމްރާވެރިންގެ މެދުގައި ފަސޭހައިން ހުމާއި ރޯގާ ފެތުރޭކަންވަނީ ފާހަގަކުރެވިފައިކަމަށް ހައްޖު ކޯޕަރޭޝަންގެ ބަޔާނުގައި ބުނެފައިވެއެވެ.

"މައްކާއިން މަދީނާއަށް ބަހުގައި ކުރާ ދަތުރަކީ ޢުމްރާވެރިންނަށް ވަރަށް ގިނަ ތަކުލީފުތަކެއް ތަހައްމަލުކުރަންޖެހޭ ދަތުރެއްކަމުން، މިދަތުރުތަކަކީ ޢުމްރާވެރިންގެ ވަރަށްގިނަ ޝަކުވާތަކެއް މި ކޯޕަރޭޝަނަށް ލިބޭ ދަތުރުތަކެކެވެ."

ކޯޕަރޭޝަންގެ ބަޔާނުގައި ބުނެފައިވެއެވެ.

ހައްޖު ކޯޕަރޭޝަނުން ބުނިގޮތުގައި ޓްރެއިންގައި ކުރާ ދަތުރުގެ ދިގު މިނަކީ ގާތްގަނޑަކަށް 2 ގަޑީރު ނުވަތަ 2 ގަޑިއިރާއި 20 މިނެޓް ކަމަށާއި އެހެންކަމުން ވަގުތުގެ ގޮތުން ބެލިކަމުގައި ވީނަމަވެސް، މިއީ ޢުމްރާވެރިންނަށް ލިބިގެންދާ ވަރަށް ބޮޑު ލުއި ފަސޭހަކަމެއް ކަމަށެވެ. އަދި މި ޓްރެއިންތަކަކީ ވަރަށް ޖާގަ ތަނަވަސް، ރަނގަޅު ފެންވަރުގެ ޚިދްމަތްތަކެއް ޢުމްރާވެރިންނަށް ފޯރުކޮށްދޭ ޓްރެއިންއެއް ކަމަށްވެސް އެބަޔާނުގައި ބުނެފައިވެއެވެ.

"އަޅުކަން އަދާކުރުމުގެ ކަންތައްތަކުގައި ރައްޔިތުންނަށް ވީހާވެސް ތަކުލީފް ކުޑަކޮށްދެއްވުމަކީ ރައީސުލްޖުމުހޫރިއްޔާ ވަރަށް ބޮޑު އިސްކަމެއް ދެއްވާކަމެއް"  އެމްޑީ ވިދާޅުވިއެވެ.

ކޯޕަރޭޝަންގެ އެމްޑީ މުހައްމަދު ޝަކީލް ވޮއިސްއަށް ދެއްވި ބަސްދީގަތުމެއްގައި ވިދާޅުވިއެވެ.

މައްކާއިން މަދީނާއަށް އަދި މަދީނާއިން މައްކާއަށް ބަހުގައި ދަތުރުކުރުމުގެ ބަދަލުގައި ހަރަމައިން ހައިސްޕީޑް ޓްރެއިން ބޭނުންކުރުމަށް ނިންމުމުގެ ސަބަބުން އެ ކޯޕަރޭޝަންގެ ފަރާތުން އިތުރު ޚަރަދެއް ކުރަންޖެހުނު ނަމަވެސް، މިހާރު ޢުމްރާތަކަށް ނަގަމުންދާ އަގު ބޮޑު ނުކޮށް އެ އަގުގެ ތެރެއިން އެ ޚިދްމަތްދިނުމަށް ނިންމާފައިވާ ކަމަށްވެސް ކޯޕަރޭޝަނުގެ ބަޔާނުގައި ވެއެވެ.

"މި ކޯޕަރޭޝަނުން ކުރިއަށް ރާވާފައިވާ ހުރިހާ ދަތުރުތަކެއްގައިވެސް މި ދަތުރުކުރުމަށް ހަމަޖެހިފައިވަނީ ޓްރެއިންގައިކަން އަޅުގަނޑުމެން އުފަލާއެކު ފާހަގަކުރަމެވެ. މި ދަތުރުތައް މިގޮތަށް ފެށިގެން ދިޔުމަކީ މި ކޯޕަރޭޝަނުން ކުރަމުންދާ އުމުރާ ދަތުރުތަކަށް ލިބިގެންދާ އިންގިލާބީ ބަދަލެކެވެ."

ކޯޕަރޭޝަންގެ ބަޔާނުގައި ބުނެފައިވެއެވެ.

މޯލްޑިވްސް ހައްޖު ކޯޕަރޭޝަންގެ ބަޔާން ނިންމާލަމުން ބުނެފައިވަނީ ބަހުގައި ކުރަމުން ދިޔަ ދިގު ތަކުލީފް ބޮޑު ދަތުރުތައް ޓްރެއިންގައި ފަސޭހަ އަވަސް ދަތުރުތަކަކަށް ބަދަލުކުރަން ނިންމާފައިވާ  ނިންމުމަކީ ރައީސް ޑރ. މުޙައްމަދު މުޢިއްޒު މި ކޯޕަރޭޝަނުގެ މަސައްކަތްތައް ކުރިއެރުވުމަށް ދެއްވާ ސަމާލުކަމާއި އެހީތެރިކަމުގެ ސަބަބުން ފަހިވެގެންދިޔަ ފުރުސަތެއް ކަމަށެވެ.