ނުކުޅެދުންތެރިކަން ހުންނަ މީހުންގެ އަދަދު 14،400 އަށްވުރެ މައްޗަށް

ހުސްވި ޖޫންމަސް ނިމުނުއިރު ނުކުޅެދުންތެރިކަމުގެ ދަފްތަރުގައި 14،412 މީހަކު ރަޖިސްޓްރީކޮށްފައިވާކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ، އެންސްޕާގެ ތަފާސްހިސާބުތަކުން ދައްކައިފިއެވެ.

އެންސްޕާއިން އާއްމުކުރި ތަފާސްހިސާބުތަކަށް ބަލާއިރު، ނުކުޅެދުންތެރިކަމުގެ ދަފްތަރުގައި އެންމެގިނައީ ފިރިހެނުންނެވެ. ނުކުޅެދުންތެރިކަން ހުންނަ ފިރިހެނުންގެ އަދަދު 8،384 ގައި އުޅޭއިރު އަންހެނުންގެ އަދަދަކީ 6،028 އެވެ. މި ދަފްތަރަށް ބަލާއިރު ނުކުޅެދުންތެރިކަން ހުންނަ މީހުން އެންމެގިނަ އުމުރުފުރާއަކީ 18 އަހަރާއި 64 އަހަރާ ދެމެދުއެވެ. މި ލިސްޓްގައި 18 އަހަރުން ދަށުގެ 1،453 ކުދިން ތިބިއިރު، 65 އަހަރުން މަތީގެ މީހުންގެ އަދަދަކީ 1،012 އެވެ.

ނުކުޅެދުންތެރިކަން ހުންނަ މީހުންގެ ދަފްތަރަށް ބަލާއިރު އެންމެގިނައީ ޖިސްމާނީ ނުކުޅެދުންތެރިކަން ހުންނަ މީހުންނާއި، މަލްޓިޕަލް ޑިސެބިލިޓީގެ އިތުރުން ސިކުނޑީގެ ނުކުޅެދުންތެރިކަން ހުންނަ މީހުންނެވެ.

ނުކުޅެދުންތެރިކަން ހުންނަ މީހުން ހިމެނޭ ގިންތިތައް:

ސަރުކާރުން ނުކުޅެދުންތެރިކަން ހުންނަ މީހުންގެ ޤައުމީ ދަފްތަރެއް އެކުލަވާލާފައިވަނީ 2023 ވަނަ އަހަރެވެ. ދަފްތަރު އެކުލަވާލިފަހުން ދަފްތަރު އަދާހަމަކުރުމުގެ މަސައްކަތް މި ސަރުކާރުން ވަނީ މިދިޔަ އަހަރުގެ ތެރޭގައި ފަށާފައެވެ. ނުކުޅެދުންތެރިކަން ހުންނަ މީހުންގެ ދަފްތަރުގައި އެމީހެއްގެ ވަނަވަރު ވަރަށް ތަފްސީލީ ގޮތެއްގައި ހިމަނައެވެ. ސަރުކާރުން ބުނެފައިވަނީ ނުކުޅެދުންތެރިކަން ހުންނަ މީހުންގެ ދަފްތަރު އަދާހަމަކުރުމުގެ މަސައްކަތް ކުރަންޖެހުނީ ދައުލަތުން އެފަރާތްތަކަށް ދޭ ހިދުމަތްތައް އެންމެ އެކަށޭނެ ގޮތެއްގައި ފޯރުކޮށްދިނުމަށް ކަމަށެވެ. މިގޮތުން ދައުލަތުގެ ބަޖެޓުން އެފަރާތްތަކަށް ދޭ ފައިސާ އެންމެ ރަނގަޅު ގޮތުގައި އެންމެ ބޭނުންވާ މީހާއަށް ދިނުންވެސް މީގެ ތެރޭގައި ހިމެނެއެވެ.

ނުކުޅެދުންތެރިކަން ހުންނަ މީހުންގެ އެލަވަންސްއަށް މިދިޔަ އަހަރު އެކަނިވެސް 560 މިލިއަނަށްވުރެ ގިނަ ރުފިޔާ ވަނީ ހޭދަކޮށްފައެވެ. ދައުލަތުގެ މިހިނގާ އަހަރުގެ ބަޖެޓަށް ބަލާއިރު، ނުކުޅެދުންތެރިކަން ހުންނަ މީހުންނަށް އެލަވަންސްގެ ގޮތުގައި 634.3 މިލިއަން ރުފިޔާ ދިނުމަށް ވަނީ ނިންމާފައެވެ.