ސްޓެލްކޯގެ ހޮޓްލައިންގެ ހިދުމަތް ތައާރަފްކޮށްފި

ސްޓެލްކޯ ކޮންޓެކްޓް ސެންޓަރުގެ ހޮޓްލައިން، ޚިދުމަތް ތައާރަފުކޮށްފިއެވެ.

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިއަދު މެންދުރުފަހު 15:45 ގައި އެ ކުންފުނީގެ ކޮންޓެކްޓް ސެންޓަރުގެ ހޮޓްލައިން ތަޢާރަފްކޮށްފައިވާއިރު، ހޮޓްލައިން ނަންބަރަކީ 1545 އެވެ. މި ހޮޓްލައިން ތައާރަފުކޮށްފައިވަނީ ސޯޝަލް މީޑިއާ ޕްލެޓްފޯމްތަކުގައި ލައިވް ޕްރިމިއަރއެއްގެ ގޮތުގައެވެ.

ސްޓެލްކޯއިން މި ހޮޓްލައިން ތައާރަފުކޮށްފައިވަނީ ރައްޔިތުންނާ ގާތުން މަސައްކަތްކޮށް، ފަސޭހަކަމާއެކު ޚިދުމަތް ދިނުމަށް ކުރަމުންދާ މަސައްކަތްތަކުގެ ތެރެއިންނެވެ. މި ހޮޓްލައިން މެދުވެރިކޮށް ސްޓެލްކޯއިން ފޯރުކޮށްދެމުންދާ ހުރިހާ ޚިދުމަތަކާ ގުޅުންހުރި މަޢުލޫމާތާއި، ކަރަންޓު ބިލްތަކާ ގުޅުންހުރި ޝަކުވާތަކާއި، ކުންފުންޏާ ގުޅުންހުރި އެނޫންވެސް ކަންކަމުގައި މުޢާމަލާތު ކުރެވޭނެއެވެ.

މީގެ އިތުރުން، ސްޓެލްކޯގެ ޚިދުމަތްތައް އިތުރަށް ފުރިހަމަ ކުރުމަށްޓަކައި، ސްޓެލްކޯ ކެއަރގެ ޚިދުމަތާއެކު ވައިބަރ، ވަޓްސްއެޕް އަދި ޓެލެގްރާމް މެދުވެރިކޮށް ސްޓެލްކޯގެ ކޮންޓެކްޓް ސެންޓަރާ މުޢާމަލާތް ކުރެވޭނެ އިންތިޒާމުވެސް މިހާރު ވަނީ ހަމަޖައްސާފައެވެ.

މި އައު ޚިދުމަތްތަކުގެ ސަބަބުން ރައްޔިތުންނަށް ސްޓެލްކޯއާ ގުޅުން ބޭއްވުމަށް އިތުރު ފަސޭހަތަކެއް ލިބިގެންދާނެއެވެ. އަދި މިއީ ކުންފުނީގެ ޚިދުމަތްތައް އިތުރަށް ހަރުދަނާކޮށް، ކަސްޓަމަރުންނަށް އަމާޒުކޮށްގެން އިތުރު ފިޔަވަޅުތަކެއް އެޅުމުގެ ގޮތުން ކުރެވުނު މުހިންމު މަސައްކަތެއް ކަމުގައި ފާހަގަކުރެވެއެވެ.