10 ގަޑިއިރުގެ ތެރޭގައި 10،000 ދައްކައިފިނަމަ ފޭޒު ދޫކޮށްލާނެ ކަމަށް ކޯޓުން ބުނެފި

ޓިކްޓޮކްގައި މަޝްހޫރު އައިމިނަތު ފޭޒްލީން ގެއަކަށް ވަދެ ހަޑި ހުތުރު ބަހުން ޒުވާބުކޮށް މާރާމާރީ ހިންގި މައްސަލައިގައި ކަފާލާތުގެ ދަށުން ދޫކުރަން ކޯޓުން ނިންމާފައިވާކަމަށް ފުލުހުން ބުނެފިއެވެ.

49 އަހަރުގެ ފޭޒްލީން ހައްޔަރުކުރީ މި މަހުގެ 24 ވަނަ ދުވަހުގެ ރޭ 10:38 ހާއިރު ގދ، ތިނަދޫ ގައި މީހަކު ހުއްދަ ނެތި ގެއަކަށް ވަދެ އެގޭގައި ކުޑަކުދީންތަކެއް ތިއްބާ ހަޑި ހުތުރު ބަހުން ޒުވާބުކޮށް މާރާަމާރީ ހިންގައި އިންޒާރު ދީފައިވާ މައްސަލައެއްގައެވެ.

އިއްޔެ ކޯޓު އަމުރެއްގެ ދަށުން އޭނާ ހައްޔަރުކުރިއިރު، އެ މައްސަލައިގައި ބަންދުކުރުމަށް ކޯޓަށް ހާޟިރުކުރުމުން ކޯޓުން ވަނީ  10 ގަޑިއިރު ތެރޭގައި 10،000ރ. ދެއްކުމުން ބަންދުން ދޫކޮށްލުމަށް ނިންމާފައެވެ.

އެކަމަކު ކޯޓުން ދީފައިވާ 10 ގަޑިއިރު ތެރޭ ކަފާލާތުގެ ފައިސާ ނުދައްކައިފި ނަމަ 15 ދުވަހަށް ބަންދުކުރަން ނިންމާފައިވާ ކަމަށް ފުލުހުން ބުންޏެވެެ.

އެ މައްސަލައިގައި ފޭޒްލީން ފައިސާދެއްކި ކަމެއް އަދި ކަށަވަރުކުރެވިފައެއް ނުވެއެވެ.