މަސްވެރިންނަން ނުދެވި ހުރި ފައިސާއިން ބައެއް މިމަހު ދެނީ

މަސްވެރިންނަން ނުދެވި ހުރި ފައިސާއިން ބައެއް މިމަހު 10ގެ ކުރިން ދިނުމަށް މަސައްކަތް ކުރަމުން އަންނަ ކަމުގައި މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.

އިއްޔެގެ ވަޒީރުންގެ ބައްދަލުވުން ނިންމަވާލެއްވުމަށް މީޑިޔާއަށް ދެއްވި އިންޓަވިއުއެއްގައި ޝިޔާމް ވިދާޅުވީ މި ވަގުތަކީ ދައުލަތުގެ ދަރަނި ބޮޑުވުމުގެ ސަބަބުން މާލީ ދަތިކަން ވަރަށް ބޮޑު ދުވަސްވަރެއް ކަމުން މަސްވެރިންނަށް ދޭންޖެހޭ ފައިސާތައް އަދިވެސް ނުދެވޭކަމަށެވެ.

އެހެންނަމަވެސް މިމަހު 10 ގެ ކުރިން މަސްވެރިންނަށް ދޭންޖެހޭ ފައިސާއިން ރަނގަޅު މިނަވަރެއް މަސްވެރިންނަށް ދެވޭތޯ މަސައްކަތް ކުރަމުންދާ ކަމަށް ވަޒީރު ވަނީ ވިދާޅުވެފައެވެ.

މީގެ އިތުރުން ވަޒީރު ޝިޔާމް ވިދާޅުވީ މަސް ގަންނަ އަގާ އެކީގައި ސަބްސިޑީގެ ގޮތުގައި ދައުލަތުން ވަރަށް ބޮޑު އެއްޗެއް ދޭންޖެހޭކަމަށާއި ކޮންމެ މަހަކުވެސް މަސްވެރިންނަށް ފައިސާ ދޭންޖެހެނީ ފިނޭންސް މިނިސްޓަރީގެ އެހީތެރިކަމާ އެކީގައި ކަމަށެވެ.

މީގެ އިތުރުން މަހުގެ އަގު ކުޑަކުރުމާއި ގުޅޭގޮތުން އިކޮނޮމިކް މިނިސްޓްރީއާއި މަޝްވަރާ ކުރެވިފައިވާ ކަމަށް ވަޒީރުންގެ މަޖިލީހުގައި ނިންމި ކަންތައްތަކާއި ގުޅޭ ގޮތުން ބޭއްވި ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޒިމް އިބްރާހީމް ވަނީ ވިދާޅުވެފައެވެ.

މިނިންމުމަށްފަހު ފިނިކުރި މަހުގެ އަގު 20 ރުފިޔާ އަދި ފިނި ނުކުރާ މަހުގެ އަގު 15 ރުފިޔާއަށް ބަދަލުކުރުމުގެ މަޝްވަރާތައް ވެސް ކުރިއަށްދާނެ ކަމަށް ނާޒިމް ވިދާޅުވިއެވެ.

އަދި މިކަންކޮށް ނިންމުމަށް ފަހު ފިނި ކުރި މަހުގެ އަގު 20ރ. އަށް ބަދަލުކޮށް އަދި ފިނި ނުކުރާ މަސް 15ރ. އަށް ބަދަލުކުރުމުގެ މަޝްވަރާތައްވެސް ކުރެވިފައި ވަނީ

ނާޒިމް

މަސްވެރިކަމާއި ބެހޭ ވުޒާރާ އާއި ހަވާލުވެ ވަޑައިގަތުމަށްފަހު ޝިޔާމް ވަނީ މަސްވެރިންނަށް ނުދީ އޮތް ރުފިޔާގެ ތެރެއިން 190 މިލިއަން ރުފިޔާ ދީފައެވެ. އެހެންނަމަވެސް އަދިވެސް 140 މިލިޔަން ރުފިޔާ މަސްވެރިންނަށް ދޭން ޖެހޭ ކަމަށް ޝިޔާމް ވަނީ ވިދާޅުވެފައެވެ.