ސައުދީގެ އެހީގައި ރާއްޖޭގައި 3 ހޮސްޕިޓަލް އަޅަނީ

ސައުދީގެ އެހީގައި ރާއްޖޭގައި 150 އެނދުގެ ތިން ހޮސްޕިޓަލް އެޅުމަށް ބޭނުންވާ ލޯނު އެއްބަސްވުމުގައި ސޮއިކޮށްފިއެވެ.

މިއަދު މާލީ ވުޒާރާއިން ހާމަކުރެއްވި ގޮތުގައި، ސަޢުދީ ފަންޑް ފޯ ޑިވެލޮޕްމަންޓާއެކު މިއަދު ވެވުނު އެއްބަސްވުމުގެ ދަށުން ރާއްޖޭގެ ސިއްހީ ދާއިރާ ތަރައްގީ ކުރުމަށް އެ ފަންޑުން 50 މިލިއަން ޑޮލަރު ފޯރުކޮށްދޭން ވަނީ ހަމަޖެހިފައެވެ. އަދި މި ލޯނުގެ އެހީގައި ރާއްޖޭގައި 150 އެނދުގެ 3 ހޮސްޕިޓަލެއް އިމާރާތް ކުރުމަށް ވަނީ ނިންމާފައެވެ.

މާލީ ވުޒާރާގައި ބޭއްވި މި ރަސްމިއްޔާތުގައި މި އެއްބަސްވުމުގައި ވުޒާރާގެ ފަރާތުން ސޮއިކޮށްފައިވަނީ ވަޒީރު، ޑރ. މުހައްމަދު ޝަފީގުއެވެ. ސައުދީ ފަންޑުގެ ފަރާތުން ސޮއިކޮށްފައިވަނީ ސީއީއޯ ސުލްތާން އަބްދުއްރަހްމާން އަލް މަރުޝަދުއެވެ.

މިއަދު މާލީ ވުޒާރާގައި ބޭއްވި ރަސްމިއްޔާތުގައި ވާހަކަ ދައްކަވަމުން، ސުލްތާން އަބްދުއްރަހްމާން އަލް މަރުޝަދު ވިދާޅުވީ ރާއްޖޭގެ ސިއްހީ ދާއިރާ ތަރައްގީ ކުރުމަށް ދެވޭ ލޯނާއި އެކީ ރާއްޖޭގެ އެކި ކަންކޮޅުތަކުގައި ސިއްހީ ޚިދުމަތަށް އިތުރު އެހީތެރިކަމެއް ލިބިގެންދާނެ ކަމަށެވެ. އަދި ހޮސްޕިޓަލްތަކުގެ ސަބަބުން އެންމެ ރަނގަޅު ފަރުވާ ނުލިބޭ ރަށްތަކުގެ ރައްޔިތުންނަށް ވެސް އެފަދަ ހިދުމަތްތައް ލިބިގެންދާނެ ކަމަށް އުންމީދު ކުރައްވާ ކަމަށާއި ރާއްޖޭގެ އެކިއެކި މަަޝްރޫއުތަކަށް އެހީވުމުގެ ފުރުސަތު ލިބުމަކީ ވަރަށް އުފާކުރައްވާ ކަމެއް ކަމުގައިވެސް ސުލްތާން އަބްދުއްރަހްމާން އަލް މަރުޝަދު ވިދާޅުވިއެވެ.